Charles Dickens ("txarlz díkinz", 1812–1870) ia es la novelor engles la plu poplal de la eda victorian. El es la creor de alga de la carateres la plu iconal de la leteratur engles.

Se novelas ia apare prima en jornales como un serie de partes, un forma cual ia es alora comun. Diferente de otra autores ci ia completi novelas intera ante publici la partes en serie, Dickens ia scrive frecuente se episodios en un modo sincronida con se apares. Esta ia dona un ritmo spesial a se naras, cual es puntuada par momentos de suspende per manteni la zelo de la popla per la episodio seguente.

Multe de se naras recomenda reformis sosial par descrive la vive dial de se contemporas povre, incluinte la labora de enfantes e la mal ambientes de la fabricerias e prisones.

Dickens ia nase prosima a Portsmouth, sur la costa sude de England, e ia abita ala tra la tre anios prima de se vive. En 1815, se familia ia move a London. Se enfantia ia es idilin, e el ia leje multe. Plu tarda, el ia dise ce el reteni recordas vivin de la persones e avenis de esta periodo, e ia usa estas en se scrives.

Ma cuando el ia ave sola 12 anios, se padre ia bancaroti, e la plu de se familia ia es prisonida. El ia debe alora gania mone par labora en un ambiente cruel, colinte eticetas sur contenadores de briliasapato. A pos, el ia labora como un secretor de un compania legal, e alora como un jornaliste, un posto en cual el ia deveni rapida famosa par se reportas eselente.

El ia es sempre encantada par la teatro. Tra alga tempo, el ia gida un grupo teatral, e de 1858 el ia presenta parlas en un forma comica teatral.

El ia mori en 1870, prosima a Rochester, alga a sude de la estuario de la Rio Thames.

Vide: Un canta de natal