Engles
From Vici de LFN
Contents |
[edit] Orijines
La lingua engles es vera la medio xef de comunica per persones en la Rena Unida, SUA, Canada, Australia, Africa Sude, e otra paises numeros. El es parlada en plu partes de la mundo ce cualce otra lingua e par plu persones ce cualce otra lingua con eseta de xines. Engles parteni a la grupo anglo-frisce en la ramo ueste de la linguas germanica, un sufamilia de linguas indo-europan.
[edit] Cualias
La vocabulo engles ia grandi multe en plu ce 1500 anios de developa, cresente a plu ce 1 milion de parolas. El es plu grande ce la vocabulo de cualce otra lingua. Parolas nova es creada par presta de otra linguas e par metodos como onomatopea (imita de sonas natural), afisa (ajunta de prefisas e sufisas), la forma libre de composadas, la altera de parolas esistente, e la cambia funsional — p.e. la usa de un verbo como un nom: to find "trova" (verbo) e a find "un trovada" (nom).
Engles ave la spele la plu nonfasil en la mundo, car la spele de parolas no ia cambia cuando se sona ia cambia, e car la modo de spele stranjer ia es retenida sin cambia en parolas nova engles.
Engles moderna ave infletas rara. Nomes ave finis diferente sola per indica la posese e la numero plural. La verbo engles es alga simple, compareda a la strutur verbal en linguas simil, ma vera el usa frecuente verbos aidante numeros como have, can, may, e must.
[edit] Developa de la lingua
On reconose tre niveles xef en la developa de engles.
- "Engles vea" ia esiste de 449 a 1066 e.c.
- "Engles media" ia dura de 1066 a 1500.
- "Engles moderna" comensa sirca 1500 e es sudivideda en "engles moderna temprana" de 1500 a 1660 e "engles moderna tarda" de 1660 asta la presente.
Engles vea, un varia de germanica ueste, es parlada par serta poplas germanica ci ia invada Britania en sentenio 5 e.c. Engles vea ia es un lingua infletada, e mesma si el ia es rica en capasias de construi parolas, se vocabulo ia es peti. El ia presta vera poca parolas de la linguas celtica, latina e scandinavian.
A comensa de la periodo de engles media, la lingua ia es ancora infletada; a la fini de la periodo, la relata entre la elementos de un frase ia depende esensal de la ordina de parolas. Casos gramatical e alteras de nom ia es simple. Un numero de parolas aidante ia veni de nordica vea e la normanes, ci ia concista England en 1066, ia atrae otra ajuntadas a la vocabulo.
En comensa de engles moderna, un cambia major aveni en pronunsia. La "desloca grande de la vocales", ce es ancora continuante, ia causa ce la pronunsia de parolas engles difere de otra linguas europan. La vocabulo alora ia grandi par reusa vasta de un parte de parla per un otra, e par presta de otra linguas.
La regulas formal de gramatica ia funda bon sirca la fini de sentenio 18. A resulta de sperde colonial en sentenios 19 e 20, multe parolas nova ia es asetada, incluinte parolas nativa de America norde, de Australia, e de Africa. Ance miles de termas siensal ia es developada per indica descovres, consetas, e inventas nova.
[edit] Engles de sentenio 20
En Britania Grande a presente, la parla de la popla instruida es nomada "engles normal asetada" (Received Standard English). Multe persones engles ci parla un de la dialetos local diferente en se infantia usa engles normal resetada durante studia a scola.
Dialetos importante local ia developa en Ireland, Scotland, e Australia.
[edit] Engles american
Engles american ta inclui engles parlada en Canada, mesma si la varia canadian reteni alga cualias de pronunsia, spele, e vocabulo britanian. La diferes la plu distinguinte entre engles american e engles britanian es en pronunsia e vocabulo con diferes peti en spele, altia de tono, e asentua. La influe de medio coletiva pare resulta en pronunsia normal, spele plu uniforme, e final un spele prosima a la pronunsia real.
Contra la probablia de esta normali, un cualia unica de la lingua engles resta: se tende de crese e cambia. Resente, engles ia deveni la lingua xef de comunica internasional.
