FANDOM


Etruskerin

Sarcofago de un fem, sentenio 2 aec

La etruscas ia es un popla con un lingua e cultur diferente en la eda de scrive la plu temprana de Europa. Los flori en la eda de fero de la mediteraneo en la dui du de la milenio prima aec. Los abita tra la vale Po e alga de la lados de la Alpes, e a la sude longa la costa ueste de Italia, e la plu intensa en Etruria, con enclaves tan sude como Campania e a interna en la montanias Apenin. Sua preistoria pote es segueda con sertia a sirca 1000 aec. A sua culmina, sirca 500 aec, los ia es un potia de mar con presentia en Sardinia e la Mar Ejean.

A prima, los ave multe influe en la constitui e la condui de la rena roman. Ma plu tarda, los combate la Republica Roman en un serie de geras, e los ia es concistada e integrada en la cultur roman. Multe de la relijio e la mitolojia de la etruscas ia deveni un parte de la cultur clasica de Roma, incluinte la panteon roman. La senato roman ia adota elementos sentral de la relijio, cual ia es continuada par haruspices e familias nobil roman ci alega linias familial etrusca, multe anios pos cuando la popla jeneral ia oblida la lingua.

En la anios final de la Republica Roman, la relijio ia deveni min popular e ia es satirida par persones notable como Marco Tullio Cicero. La familia de Julio-Claudio, spesial Imperor Claudio, ci ia declara ce los desende de etruscas, ia manteni un sabe de la lingua e relijio per un tempo peti, ma esta ance ia sesa final. Un cuantia de operas autorial en la lingua etrusca ia survive asta la media de la milenio prima ec, ma ia es destruida par eda e par cristianes en la sosia roman.

La sistem de crede de la etruscas ia es un politeisme imanente, per dise, tota fenomenos ia es considerada como un revela de un potia divin, e ce acel potia ia es corpida en dios ci ata continuante a la mundo, ma ci pote ance es convinseda o desconvinseda par umanas mortal.

Edas pos la asorbe de la etruscas, Seneca joven ia dise ce la difere entre la romanes e la etruscas ia es ce...

Nos crede ce lampo es relasada como un resulta de la xoca de nubes, ma los crede ce la nubes xoca per relasa lampo. car los atribui tota cosas a la dios, los es conduida a la crede, no ce cosas ave sinifia car los aveni, ma ce los aveni car los debe ave sinifia.

Sirca la mun o muni (tombas) ia es la man o mani (manes en latina), la spiritos de la asendentes. En la icones pos la sentenio sinco aec, la mores es mostrada como viajante a la sutera. En alga esemplos de arte etrusca, como los en la tomba François en Vulci, la spirito de la mor es identifiada par la parola hinthial, leteral "(un ci es) a su.

Un dio ia es nomida un ais (plu tarda, eis), con la plural aisar. La abitada de un dio ia es un fanu o luth, un loca santa, como un favi, un tomba, o un temple. Ala, on ta nesesa dona un fler (plural flerchva) o ofre.

Tre niveles de dios ia es mostrada en la arte etrusca. Un nivel inclui la dios minor de orijinas nativa: Catha e Usil (la sol), Tivre (la luna), Selvans (un dio sivil), Turan (la diva de ama), Laran (la dio de gera), Leinth (la diva de moria), Maris, Thalna, Turms, e la dio Fulfuns, de ci sua nom es relatada en alga modo nonconoseda a la site Populonia e la populus Romanus.

Rena supra los ia es la dios plu alta cual pare refleta la sistem indoeuropean: Tin o Tinia (la sielo), Uni (sua sposa, Juno), e Cel (la diva de tera).

La nivel tre es la dios elinica cual la etruscas ia adota en la eda de influe par la este (750/700 a 600 aec). Esemplos inclui Aritimi (Artemis, Diana), Menvra (Minerva, Atena), e Pacha (Baco, Dionisio). Ultima, la truple prima deveni Tinia, Uni, e Menvra.

La etruscas ia crede ce sua relijio ia es revelada a los par previdores. La du previdores xef ia es Tages - un enfantin ci ia es nase de tera aradi con la donadas de previde - e Vegoia, un fem.

La etruscas ia crede en la contata direta con la divin, e fa nunca sin consulta con la dios e sinias de los. Esta praticas ia es tota prendeda par la romanes.

La scrives santa ia es un colie de testos nomida la Etrusca disiplina. Esta nom apari en Valerio Maximo, e Marco Tullio Cicero refere a un disiplina en sua scrives sur la sujeto.

Massimo Pallottina resoma la scrives conoseda (ma no esistente) como la Libri haruspicini, cual conteni la teoria e la regulas de divina de la intestines de animales; como la Libri fulgurales, cual descrive la divina de lampo; e la Libri rituales. La "Libri rituales ia inclui la "Libri fatales, cual dona detalias de la metodos coreta de funda sites e locas santa, vacui campos, formi lejes e proclamas, mesura spasio e tempo; la "Libri acherontici", cual conserna la vive pos mori; e la Libri Ostentaria", cual conteni la regulas per interprete indicas de la futur. La revelas de la profeta Tages ia es presentada en la Libri tagetici, cual inclui la Libri haruspicini e la "Acherontici, e los de la profetesa Vegoia en la Libri Vegoici, cual inclui la Libri fulgurales e un parte de la Libri rituale.

Esta operas no ia presenta predises o scrives santa en la sinifia comun: la Etrusca disciplina mesma predise nunca. La etruscas no ave un sistem de relijio o morales, e no revelas grande. En loca, los ia foca a la problem de la voles de la dios: si la dios ia crea la universa e umanas e los ave un intende per tota, per ce los no ta crea un sistem per comunica sua voles en un modo clar?

La etruscas ia aseta la difisilia de conose la voles de sua dios. Los no ia atenta esplica la atas o intendes de la dios. Per responde a la problem de conose la voles de la dios, los ia developa un sistem complicada de divina, cual es per dise, los ia crede ce la dios dona un rieta continuante de sinias en la vive comun cual, si coreta lejeda, pote direta la vive. Los revelas ta es alga noncomprendable, e pote es nonplasente o difisil, ma los ta es perilosa dutada.

Cicero ia dise:

Per un aseta fretante de un opina erante es desatribuada en cualce caso, e spesial en un demanda de cuanto influe ta debe es donada a divinas, rituos santa, e oservas relijiosa; car nos risca fa un crimin contra la dios si nos no atende a los, o deveni envolveda en un superstisio de femes vea si nos aproba los.

Alora Cicero ia broma, regardante la divina de la cantas de ranas:

Ci ta suposa ce ranas ave esta previde? Ma ancora los ave par natur alga capas de previde, sufisinte clar par se mesma, ma tro oscur per comprende par umanas.

Demandas a la dios ia es la opera de la pretes, ci la romanes nomi haruspises o sacerdotes; Tarquini ia ave un scola de sesdes de los. La etruscas ia usa parolas variosa per los: capen, maru, eisnev, hatrencu (pretesa). Los nomi la arte de divina zich nethsrac.

Un governor, la cechase, ia manteni la cosas santa (cecha o rath). Ma cada om ia ave sua obligas, cual ia es espresada par un asosia santa (la alumnathe o slecaches). No aveni publica ta comensa sin la netsvis (divinor mas) o nethsra (divinor fema), ci ta leje la bultos sur la figato de un ovea sacrifiada. Nos ave un model de un figato, de cual sua sinifia es ancora un cosa de debate, cual es marcada en partes cual esplica posible la sinifia de cada bulto. Esta tradision ia ave sua orijinas en Asia sude-ueste.

La credes etrusca de la vive pos mori pare es un combina du influes variosa. Los ia comparti la credes jeneral de la sosias temprana de la Mediteraneo, como la crede egipsian ce survive e ricia en la vive pos mori depende de la trata de la restas de la mor. Tombas etrusca ia imita casas comun e ia inclui salas spasiosa, pintis mural, e mobilas. En la tomba, spesial sur la sarcofago, ia es representas de la mor en sua apico, comun con sua sposa o sposo. No tota ia ave un sarcofago; a alga veses, la mor ia es posada reclinante sur un banca de petra. Car la etruscas usa ambos entera e seni (la proportio depende de la periodo istorial), senes e osos es posible poneda en un vaso en la forma de un casa o la person.

La mundo de la mor ia es simil a la hades de la elinicas. Lo ia es renada par Vanth, e la mor ia es gidada ala par Charun, la personi de moria, ci ia es blu e ci ia porta un martel. esta hades etrusca ia es plen de carateres mital elinica, plu alga como Tuchulcha, ci ia combina carateres elinica e etrusca.

Ad blocker interference detected!


Wikia is a free-to-use site that makes money from advertising. We have a modified experience for viewers using ad blockers

Wikia is not accessible if you’ve made further modifications. Remove the custom ad blocker rule(s) and the page will load as expected.