FANDOM


Lingua franca nova no ia ariva a esta planeta como un cosa completa. El ia evolui.

A la comensaEdit

La comensa de elefen ia es en 1965, cuando me comensa un interesa en linguas, spesial linguas creol e artifisial. La radises de elefen es arcivida en un libreta peti (en cual me ia scrive un lista de regulas e parolas de esperanto cual me ia leje en un biblioteca en Brisbane, Australia en la estate de 1967, e notas sur loglan, de la jornal Scientific American). Alora, la lingua no ia ave un nom.

La alfabeta ia es la mesma como oji, ma parolas ia pote fini con cualce letera. E multe parolas fundal ia es la mesma como, o simil a, la parolas en elefen aora.

La pronomes ia es "mi", "ti", "li", "nos", "vos", e "los", con un pronom refletante "si". "On" no ia esiste.

La preverbos ia es "a" per pasada, "na" per presente, e "sa" per la futur. "Ta" no ia esiste.

La lingua ia ave alga parolas de elinica: "tele", "pan", "para", "apo"…

Nonusual ia es "ie" per sertia, "be" per probablia, e "me" per posiblia. Simile, lo ia ave "iei" per nesesa, "bei" per debe, e "mei" per permete. Me crede ce esta ideas ia deriva de loglan.

"No" ia es "no", ma "si" ia es "ia"! "Esta" e "acel" ia es "to" e "ta".

Un parola engles ia entra la vocabulo a alga veses. Per esemplo, la numeros ia es "on", "du", "tri", "cuat", "fif", "ses", "set", "at", "nin", e "nul" per zero. Ia ave no parolas per des o sento; on ia construi numeros grande par segue la numeros simple: 321 ia es tri-du-un. Ma la punto de la mil ia es nomida "mil".

La ordina de parolas ia es simil a lo de oji. Ma la parolas no ia cambia con sufisas e prefisas per indica se roles, cual ia es indicada sola par se loca en la frase. Nota la influe de loglan:

  • li doni – el dona
  • la doni – la ata de dona
  • la omo doni – la om donante
  • li cato – el ata como un gato
  • la cato – la gato
  • la omo cato – la om ci es como un gato
  • li bono – el es bon
  • la bono – la bonia
  • la omo bono – la bon om

On ia nesesa sempre usa un prenom ante un nom. Los ia es "la", "un", "las", e "unas". La plural ia es indicada sola par la pronom. E on ia nesesa sempre usa un preverbo ("a", "na", o "sa") ante un verbo.

Ance, la ajetivo verbal pasiva no ia esiste. On ia debe usa "se" (si me recorda coreta) ante la verbo, como "la om se colpa…" – la om colpada. La ajetivo verbal ativa no ia esiste ance. On ia usa simple la verbo: "la om colpa" – la om colpante.

La vocabulo ia es multe limitada alora, e ia es prendeda de la lista de vocabulo romanica en The Loom of Language par Frederick Bodmer (e editada par Lancelot Hogben, la creor de interglossa). Con la crea de un vocabulo, la forma orijinal deveni plu e plu romanica: pe esemplo, "doni" ia deveni "dona", "sa" ia deveni "va", partisipios ia es introduida, etc.

Lfn 1.0: La introduiEdit

La forma de elefen a la tempo cuando lo ia ariva a la interede (1998) ia es min creolin ca se forma orijinal o de oji. La diferes major es mostrada en esta scemas:

Pronomes personal
Sujeto Ojeto Posese
Singular Person un io me ma
Person du tu te ta
Person tre el le sa
Plural Person un nos nosa
Person du vos vosa
Person tre los sa

La varias de verbos ia es indicada par sufisas:

Verbos
Presente -
Pasada -va
Futur -ra
Infinitiva -r
Partisipio ativa -nte
Partisipio pasiva -da

Otra aspetas de elefen ia es multe simil a los de la forma presente. La vocabulo ia es no plu ca sirca 1500 parolas!

Lfn 2.0: EuropijinEdit

Cuando Bjorn Madsen ia crea un grupo de Yahoo! per elefen, la respondes ia es grande! Multe persones ia gusta la simplia de elefen, ma ia vole ce lo ta deveni an plu simple. Un grupo du ia es creada a Yahoo! su la nom "europijin", cual ia es un broma relatada a la usa de la pijon de pas como la simbol de elefen. La simplis ia inclui estas:

La pronomes ia es reduida a un forma per e sujeto e ojeto, esata como elefen de la presente:

Pronomes personal
Sujeto/ojeto Posese
Singular Person un me
Person du tu
Person tre el se
Plural Person un nos
Person du vos
Person tre los se

La tempos per la verbos ia es cambiada a particulas. La futur ia deveni denova "va"; la pasada ia deveni prima "ai" e plu tarde "ia", de la creol xavacano:

Verbos
Presente -
Pasada ia
Futur va
Infinitiva -r
Partisipio ativa -nte
Partisipio pasiva -da

Per un tempo corta, an la plural (cual ia es "-s" orijinal) ia es eliminada, e ia es indicada en loca par la articles:

Articles
SingularPlural
Definidalali
Nondefinidaundi

Lfn 3.0: La presenteEdit

Pos multe discute en ambos grupos, nos ia deside ce alga de la bonis de "europijin" ia es tro bon per iniora. La pronomes e la paroletas de tempo ia es adotada per elefen propre, e la du grupos ia reuni.

La parte unica de europijin cual no ia es adotada ia es la articles plural, car la grupos ia trova ce los ia es tro difisil per usa. La indicante de pluralia de elefen ia revade a la "-s".

Sola du ajuntas major ia aveni a esta paso de la evolui de elefen:

Prima, alga parlores de la linguas romanica ia nota (con tristia) la asentia de un indicante de la moda ipotesal. La usa de la particula "ta" – de un particula con usas simil en la creol de Aiti – ia es introduida como un cosa elejable. "Ta" ia mostra se como un ajunta multe usosa, an si no asoluta esensal.

Du, alga otra parlores (en esta caso, los ci no parla orijinal la linguas romanica) ia nota ce la infinitiva no es multe usosa. Pos multe discute, la "-r" ia es cadeda, prima per verbos du en cadenas de verbos, e plu tarda per infinitivas en tota situas.

Pos esta cambias, la grupo ia scrive multe articles, naradas, e poesias. Esta operas ia causa un consensia de problemes peti. Par responde, nos ia ajunta "lo" per la pronom de cosas, per ofre plu varia en la pronomes, nos ia cambia "ce" a "ca" per comparas e a "cual" per la pronom suordinante, "-os" ia deveni "-osa", e la letera "h" ia deveni un parte de la alfabeta ofisial. Plu, nos ia perfeti la usas de verbos transitiva e nontransitiva. La labora la plu grande ia es la estende e boni de la disionario.

Con esta cambias (e la primi de la libro prima Alisia en la pais de mervelias), nos espera ce la lingua no va nesesa plu cambias notable.

Addendum - October, 2016 Edit

La lingua es ancora vivente! Nos ia continua ajunta parolas a la disionario, e ia defini tota radises e multe otra parolas. E aora la disionario ave multe imajes! Lo es multe bela!

Con multe, multe esita, me ia acorda con la plu de elefenistes cual partisipa en la discutes: Nos ave aora un colie de determinantes de posese cual difere de la pronomes personal relatada:

  • me -> mea
  • nos -> nosa
  • tu -> tua
  • vos -> vosa
  • el, lo, on, los -> sua

Estas permete ce nos evita alga problemes peti cual ia irita nos per multe anios. Multe grasias a tota ci ia aida me en esta deside!

Vide anceEdit

Ad blocker interference detected!


Wikia is a free-to-use site that makes money from advertising. We have a modified experience for viewers using ad blockers

Wikia is not accessible if you’ve made further modifications. Remove the custom ad blocker rule(s) and the page will load as expected.