Fandom

Vici de LFN

Sujestas (Simon)

Forum page

3,786pages on
this wiki
Add New Page
Foros > Conversa comunial > Sujestas (Simon)


alo, simon! me es preparante imajes per la parolas nova en la disionario. (me conose ce la disionario primida no va inclui imajes - cual es bon, car me ia atenda nunca a diretos!). si tu ave modos en cual me pote aida tu, per favore dise a me. tua progresa es stonante!

  • Ma tua progresa ia es an plu stonante! Tu ia ateni la fini de la lista longa cuando me ia completi apena plu ca un tri de lo. Aora me joia, car me ia pasa oji la mediapunto. Sur la imajes, me recorda ce tu ia dise, cuando tu ia ajunta la imajes prima, ce tu ia prende los sola de Wikimedia Commons per evita problemes de direto. Esce tu sabe ce tu pote filtri la trovadas de Google Images par spesie de lisensa? (Eleje Tools: un plu bara de elejes apare, conteninte un menu de Usage Rights.) Me no sabe como tu pote aida vera, asta cuando me ateni ultima la fini de la lista longa e restora la disionario a sua editablia normal en la vici. Ma si tu vole, tu ta pote leje per xerca cualce noncoeres o eras restante en la definis o entre articles simil, ma esta es un taxe difisil e noiante. Simon
  • Ancora un cuantia peti de parolas resta en caxas roja (espetante tua responde) en la leteras plu temprana: cerulean, chancery, chutney, decoupage, enterprize. Simon

vocabuloEdit

  • auto de fuji = getaway car
    • bon jorj
    • Ajuntada a mea copia delinia. Simon
  • amusa = amuse
    • "Amusa" es condui en un modo comica, causante ries o suries. Lo no es la mesma como "diverti", cual sinifia fa un presenta cual reteni la interesa e bon umor de la escutores. Un pianiste e un comediste pote diverti, ma usual sola la comediste amusa. A alga grado, esta es la difere entre "fun" e "funny". Simon
    • Si tu aseta "amusa", nos debe ajusta la defini de "comica". Simon
    • en la linguas romanica (estra franses), "diverti" es usada con ambos sinifias. on pote dise "fa ce el rie", "ata comica", "es comedial", "es bobo", etc. en me mente, un pianiste presenta plu ca diverti, estra si el causa ance ce la escutores rie.
    • Si lo merita la mensiona, me ia era en usa esta parola ayer en la parleta de Telegram en responde a alga cosa comica ("amusante".)  Lo ta es aidosa per fa la distingui entre Cirque du Soleil e James Corden, etc. Cuando on vide un filma de teror, on pote dise, "Lo diverti me" ma ance "Lo asusta me", alora per cosas comica... braien
    • Si, acel ia es ance mea pensa. Un pianiste diverti (entertains, keeps the crowd happy) par presenta musica. Un comediste ance diverti, ma par amusa. La fato ce la linguas romanica nebli la distingui no sinifia ce la distingui es nonusosa. Simon
  • esta recorda me ce nos ia perde a alga ora la usa orijinal de "fa". "fa" ia es un parola spesial: on fa rie la escutores, per esemplo. aora, nos debe dise "on fa ce la escutores rie". lo ia es cuasi paralel a la usa de "se": "on boli se" ia es usada como un nontransitiva asentuada de "on boli". "fa" ia es usada per fa ce un verbo nontransitiva ta deveni causal, e "se" ia es usada per fa ce un verbo transitiva ta deveni refletante. nos no pote usa "fa" en esta modo ancora, no?
    • la frase final a supra recorda me de un otra cosa: si on usa "no?" o "si?" a la fini de un frase, tua eleje depende de tua espeta, no? "si" es usada cuando on espeta un responde positiva, e "no" es usada cuando on ave dutas, si? :o) jorj
    • La difere pare sutil, ma me opina ce "no?" es un corti de "esce me no es coreta?", e on usa lo cuando on es ja relativa serta ma desira mera un confirma. "Si?" pare usada cuando on es min serta, o cuando on vole confirma un informa nova. "Tu labora en la scola, no?" (don't you?); "tu labora en la scola, si?" (do you?). Simon
      • oce.
        • Me ia ajunta un nota de usa sur esta a mea copia delinia de la disionario. Simon
  • Sur "fa", personal me ta trova acel usa multe aidosa.  Plu corta e lo segue la usa en la linguas romanica.  braien
  • Esta usa de "fa" ia es un caso multe comun de un "cadena de verbos". En la pasada, nos ia permete dise ance "me vide la enfantes jua", "el senti la bebe colpa", "los lasa la porte resta abrida", "nos crede esta es coreta" (this to be correct), etc. Pos esta discute, nos ia deside proibi esta en julio 2011 (me no recorda, ma me es capas de xerca en la istoria de la pajes gramatical…). Simon
  • Me ia leje la testo, e me vole es serta -- cual entre estas es coreta (algas / nun?)  Me no va usa "ce" in esta esemplos car clar acel es coreta... braien
    • Me vide jua la enfantes
    • Me vide la enfantes en jua
    • El senti colpa la bebe (me pensa ce 'no' car lo ta sinifia "he/she feels hitting the baby" donce un frato de frase...)
    • Los lasa abrida la porte  esta no pote es coreta, car "abrida" ta sinifia la modo de "lasa" e no parla sur la porte i.e. "we openly leave the door..."
    • Nos ia fa sorti la vendor
  • Su la regulas presente, sola "Me vide la enfantes en jua" es coreta. "Me vide jua la enfantes" ave la mesma problem como "El senti colpa la bebe" (e es an plu strana, car "jua" es normal nontransitiva; la frase sinifia "I see (myself) to play the children (como si los es strumentos muiscal, o juas)". Simon
  • me opina ce sola estas es coreta:
    • me vide ce la enfantes jua
    • me vide la enfantes juante
    • me vide la jua de la enfantes
  • ma esta es nunca coreta:
    • me vide jua la enfantes (nunca coreta - la du verbos debe ave la mesma sujeto!)
    • me vide la enfantes en jua (me ia oia nunca esta forma! posible on pote dise "en la jua, ma esta ave un sinifia diferente. e on debe demanda "esce me es en la jua, o en la jua con la enfantes, o esce sola la enfantes es en la jua?" :o)
  • e estas es coreta:
    • el senti ce la bebe colpa
    • el senti la bebe colpante
    • el senti la colpa de la bebe
  • etc. jorj
  • Si, me acorda completa. Sur "me vide la enfantes en jua", lo es un frase strana, ma sua strutur es legal: on pote trova frases min bizara con la mesma strutur, pe: "me ia oia la campana en pasa la eglesa" (en cuando me ia pasa) o "me trova un foto vea en limpi la armario". Simon
    • si. "en" ave ance la sinifia "while" como un preposada. donce, "me vide la enfantes en jua" no es tota noncoreta, e pote es traduida como "I see the kids in play / while playing". ma "...(en) cuando los jua" ta es multe plu clar.
  • Me nota ce tu tende era con "esce". Lo no es un verbo: on no pote dise "esce me en la jua", ma sola "esce me es en la jua". Simon
    • sola un era peti de atende.

Alaska, Hawaii, etcEdit

  • Hauaii/Hawaii e hauaian/hawaian – seguente tua comenta sur Alaska, me suposa ce nos prefere la formas con W. Simon
    • asi es la problem: lo es un stato ma ance un isola. per Alaska, me ia ave la mesma problem: lo es un stato, ma ance un rejion multe grande, como tibet e otras. me espeta tua responde! jorj
    • Perce la regulas es diferente per statos e nonstatos? Simon
    • nos ia deside ce nasiones debe es speleda en un modo elefen, ma cualce cosa interna a un nasion es speleda como orijinal. la razona inclui detalias como "mixegan", "pensilvania", "ohaio", "aidaho", etc. engles no es pronunsiada como lo es scriveda (en caso tu no sabe esta :o) otras inclui an la problem de "c" e "g", pronunsiada como "s", "tx" o "ts" e "j" o "dj" (e otra leteras). esce nos debe usa "champagne" o "xampania"? ma posible nos debe reconsidera esta regula
    • Alora, cual es la problem con "Alaska" e "Hawaii"? Statos de la SUA no es nasiones. La problem aveni sola cuando la nom de un nasion es usada ance per un nom interna – ma en tal situas, la nasion domina e on ta usa probable la spele elefenin per ambos. Simon
    • ma nos ave otra isolas cual es ofisial parte de un nasion con spele elefenin. e esce nos debe usa la nom per tibet usada par xines? (xizang). jorj
    • Difisil. Me sujesta ce en casos de duta, nos prefere la forma de la nom conoseda en la Ueste – sola car la vocabulo de elefen es tan clar european. Simon
    • oce. cuando on vide un caso problemosa, nos pote investiga plu. jorj
    • Perce no Havaii? Cisa on pote usa Hawaii per la stato e Havaii per la isola, o reversada? Angel Blaise
    • Nos ave "Hawaii" car la regula es ce nomes de locas interna de un nasion reteni sua spele nativa. La idea de ave speles diferente per la stato e la isola xef es interesante, ma me crede ce lo ta complica la situa. Jeneral la contesto sufisi per distingui los; cuando lo no sufisi, on pote dise "la stato Hawaii" o "la isola Hawaii". Simon

posible/posibliaEdit

Me vole esplora plu la difere entre "posible" e "posiblia" (e "probable" e "probablia") cual nos ia tanje resente. (La regula asta aora ia es ce un "posible" es un cosa cual pote aveni; "posiblia" es la cualia poseseda par un cosa posible; e simil per "probable" e "probablia".) Ma considera la parolas "debil" e "debilia": seguente nosa regula, nos debe dise "un de la debiles de tal sistemes" (one of the weaknesses of such systems) – ma esta pare sinifia ance "one of the weak ones of such systems" (un de la membros debil de la grupo de tal sistemes). An si nos iniora tal ambiguas (ambiguias?), lo ta pare plu natural (= conformante a la usa en otra linguas european) si nos ta dise "un de la debilias de tal sistemes" en loca. E simil per "nos ia encontra un difisilia", "un silentia longa ia segue sua comenta", "me vide tre posiblias", e otras. En fato, me nota ce nos ave ja "secia" per "drought" en esta modo, an si "drought" es vera un periodo, no un cualia. Cisa la regula vera es ce nos pote usa "-ia" ance cuando nos refere a un situa o state o ata: la "tre probablias" es atas prevideda; la sistem ave "debilias" diversa cual es situas problemosa cual aveni en lo; un periodo seca es un state. "Un seca", "un debil", e espresas simil tende sujesta ce nos refere a un person o cosa individua. Simon

  • Personal, me acorda.  Lo pare multe natural.   braien

lo depende de la natur de la ajetivo. nos dise "cual es la altia de la construida?" car nos es referente a la estende entre "corta" e "alta". nos no intende refere a un construida alta ante reseta la responde a la demanda.

  • Esta pare un esemplo de la usa fundal de "-ia", como "belia" e "strania". Ma an lo conteni un problem (un problem diferente): nos refere a la "altia" de construidas multe basa. "Altia" sinifia e la cualia de un cosa alta, e la mesura de esce un cosa es basa o alta. Simil per "grandia", "longia", e otras. En pratica, lo es rara ce nos persepi esta, car la contesto gida nos direta a la sinifia intendeda. Simon
    • esta es cual me atenta dise.
    • A! pardona me. Simon

ma si on demanda "cual es la debilia de la construida?", esce la demanda refere a la estende entre "debil" e "forte"? o esce nos vole demanda "cual cosa en la construida es la razona perce la construida es debil", cual nos ia conclui ja ante la demanda. donce, posible lo es plu bon si nos demanda "cual es la debil de la construida?" o, an plu bon, "cual fa ce la construi es debil?" o "cual es la lia debil...?" (pd "the weak link") o alga cosa simil.

  • Esta pare un plu esemplo de pedantia cual la contesto solve fasil. (E me nota ce si un construida debil ave cualias debil, esta du usas de "debil" difere en sua sinifia. La cualias debil es vera cualias cual fa ce la construida es debil – ma nun desira spele tota sua pensas a esta grado de detalia!) Como un person ci labora en campos de lojica, me senti un batalia en me entre la teoria e la pratica, entre lo cual es lojical coreta e lo cual es fasil usable. Ma la plu de parlores de elefen es (e va es) influeda par sua propre linguas, los no es lojicistes, e los va refere ancora a "probablias" e "debilias", an si nos cria a la venta ce los era. Simon
    • serta vera. me prefere sempre la pratica.

esta problem ta es eliminada si on usa un nom pos la ajetivo: "la espresa ambigua", "la cosa debil", "la aveni probable", en loca de depende sola de "la ambigua", "la debil", "la probable", etc. vera la lingua opera la plu bon si on no atenta constante parla/scrive rapida!

  • Si, on pote sempre ajunta plu claria par ajunta plu parolas. Ma en multe casos, per esemplo en cantas, o en tuitas, o en notas, o en publicis tecnical, on nesesa un linguaje consisa. La demanda es: cual es la regulas pratical cual governa (o influe) la sinifia de un ajetivo cambiada a un nom? Simon
    • vera. esta es cual me desira e atenta descrive. lo no pare tro difisil: si on vole indica un cosa con la cualia, on usa la forma simple; si on vole indica un astrata, on usa -ia. tu sujestes?
    • Ma lo es difisil, an tal. Cuando nos parla de la debilias de un cosa X, estas es cualias de X. X mesma es la debil, la "cosa con la cualia". La problem deveni: esce un cualia es un cosa? Ma nos pote estrae nos de esta pantan filosofial si nos adota tua idea ce "-ia" indica un astrata, car la debilias de la cosa X es consetas astrata, nontocable, e espresable sola par frases. En esta modo, nos pote dise e "me previde tre posibles" (un eleje entre tre persones o cosas fisical) e "me previde tre posiblias" (un eleje entre tre situas imajinable). Plu simple diseda, me sujesta ce "un debil" refere sempre a un person o cosa fisical. Un macina pote ave "debiles" (partes debil), ma ance "debilias" (cualias debil, ideas debil en sua desinia). Simon
    • Acel es como me ia pensa sempre sur la usa (per bon o per mal) "me previde tre posibles" == "I forsee three options, three concrete things" e "me previde tre posiblias" == "I forsee three posibilities, hypothetical situations" e en fato esta du esemplos es tan prosima a lunlotra ce nun va ave un problem.  (...me nota ce en la disionario, "debil" como nom ave sola la defini "weakling" e no "weakness", cisa on debe ajunta alga cosa?).  An tal, lo cual tu dise en su, me crede, es coreta: la -ia en elefen segue forte la formas -ity, -ia en la linguas romanica cual va es frecuente usada par parlores de elefen an si on no vole lo.  braien

cual es la fortes e debiles de estas? :o) jorj

  • Me vide ce nos dise "forte de aira", ma "the military" es "la militaria". Simon
    • bon esemplo. seguenta la regula cual me sujeste, on debe dise "la militar". e me acorda ce lo pare strana. ma me nota ce, en engles, on usa "militaria" como un ajetivo, e ance per la nom, e no como un nom astrata. serta, "la militar" es coreta en lfn. o "la militares" (pd cosas/persones militar), e "la fortes de aira".
    • Me ia move "militaria" a "militares". Simon

Un plu esemplo per considera: "me dise la veria". Esce lo cual me dise es un cosa vera? Si. Ma lo no es un cosa fisical. Lo es un astrata, e "veria" conveni plu. Simon

posible: -ia sinifia un state o cualia (pe "debilia no es un virtua"), o un caso de acel state o cualia (pe "esta es la debilia de esta modo de construi"). posible la modo de indica la sinifia du es par ajunta un article. "jentilia es un virtua" ma "la jentilia de la fem es encantante".

  • Ance la ajunta de la -s plural indica serta la sinifia du: "debilias de esta modo de construi inclui…" Ma nos debe permete ance frases como "la debilia de la table ia es un surprende", "la fortia de mea mano no sufisi per rompe la baston", etc, cual ave la sinifia prima. Simon
    • no, los ave la sinifia du! ...de la table, ...de mea mano, etc, sujeste un caso de debilia o fortia, e donce merita sua -ia.
    • A! me ia malcomprende tu. Si, me acorda aora. En fato, la mesma situa aveni con nomes noncontable (vino / un vino), e (embarasante) me trova ce nos ia descrive ja en la gramatica esata lo cual tu sujesta: "esemplos o casos individua". Simon

Cadenas de verbosEdit

Me crede ce la frase seguente es intera bon e asetable: "el aida pinti la mures". Lo sinifia "el aida la pinti de la mures" (= el aida otra persones a pinti la mures). Ma, si on segue leteral la regula en la gramatica — "La sujeto de la verbo prima debe es ance la sujeto de la verbo du" —, lo debe sinifia "el aida se a pinti la mures", cual es asurda. Me sujesta ce la regula en la gramatica es tro sever, e ce lo ave acel forma sola car, en pasada, nos ia distingui un otra spesie de cadena con un nom poneda entre la du verbos. "Pinti la mures" es la ojeto de "aida"; lo es un formula nomin composada de un proposa infinitiva; e la modo de interprete lo es furnida par la sinifia de "aida", no par la regula falsa sur la du sujetos. Simon

  • me comprende, serta.como sempre, me prefere frases plu longa ca tu: "el aida ce los pinti la mures" o "el aida la pinti de la mures" es oce con me. ma bon: me pensa (me no es serta) ce la sinifia de la verbo aida en la interprete de la frase. como tu dise, la idea de aida se en la performa de un ata no es un interprete comun. oce. jorj
  • Lo no es la caso ce me prefere sempre frases corta, ma si la gramatica permete los, me vide no razona per evita los, spesial si los coresponde a frases corta en linguas natural. Serta on pote dise "el aida ce los pinti la mures" (me mesma ia scrive lo en la paragraf a supra) e "el aida la pinti de la mures" (e "el aida los a pinti la mures", como "el impedi los de pinti la mures"). Ma "pinti la mures" es un formula de nom: "pinti la mures es un bon modo de spende la dia"; e la ojeto de "aida" es cualce formula de nom: "el aida sua amis"; donce "el aida pinti la mures" es ance bon (e pare multe natural). Si, en loca, on analise la verbo prima en un tal cadena como spesial (un verbo aidante), on ave un gramatica plu complicada per esplica o aprende. Simon
  • Personal me no vide alga problem con "el aida pinti la mures". Esta cadena segue tota la gramatica en me persepi, car lo es evidente ce "el pinti con los per aida los". Si el ta aida la pinti sin pinti per sua propre manos, nos ta dise lo a tal: "el aida per pinti la mures". On ia discuta lo en la pasada, si mea memoria es bon. Cadenas de verbos es multe usos per corti la parla.Andrei
  • Me acorda, serta. Simon

Ideas per la gramaticaEdit

  • Ajunta un paje nova sur nomes propre
    • cual tu intende inclui? jorj
    • Regulas per trascrive, regulas per nomi mares, rios, etc. Me trova ce la regulas es difisil per aplica car los es distribuida tra pajes acaso. Simon
  • Ajunta anti- como un prefisa ofisial (la disionario trata ja lo en esta modo)
    • nos ia acorda ce lo debe es un prefisa ofisial, ma no ia inclui lo en la gramatica, evidente! jorj
    • Si. Me va ajunta lo a la gramatica. Me ave pensas sur la presenta de parolas prefisada en la disionario primida. Simon

aloEdit

  • me nota ce tu es rapida movente en la prepara de la disionario. me atenta move tan rapida con la parolas mancante, ma me es multe plu lente ca tu! me espera ce mea lentia no va causa problemes. jorj
    • Mea locomotiva funsiona aora con un bon presa de vapor! Ma me ave ancora multe per fa. Cuando me ateni la fini de la alfabeta, me ave un lista longa de taxes posponeda: los es jeneral xercas per eras o noncoeres individua cual es plu fasil per trova en modo focada ca en leje de la testo intera. No ave ansia sur tua propre rapidia. Lo es multe aidosa ce tu labora sur acel lista. Me intende reposa per alga semanas cuando me fini la Ata Prima de mea labora, ante comensa asembla la testo primable. Simon
  • cuando tu vide problemes con definis, etc, per favore usa tua propre judi, estra cuando la problemes pare tro grande o tu prefere mea aida. jorj
    • Me fa ja acel, en fato. Tu no sabe lo, car me no lista tal casos en la vici :) Me lista sola la casos sur cual me no es serta. A multe veses, tu ave un opina clar o desidosa per ofre sur semantica, o sur la eleje entre du formas. Simon

Ad blocker interference detected!


Wikia is a free-to-use site that makes money from advertising. We have a modified experience for viewers using ad blockers

Wikia is not accessible if you’ve made further modifications. Remove the custom ad blocker rule(s) and the page will load as expected.