FANDOM


Grasias, ami!
1234567891011121314151617181920

Capitol 16

"Esta va es fasil," Ricardo dise a se, cuando el entra a un boteca no multe grande, cluida per un semana "par causa de la mori subita de la xef", como la scriveda fisada sur la porte indica.

Ma el es apena en la boteca cuando ja un teme nova saisi el. Lo pare ce alga cosa ruidi, e acel ruidos sembla strana aceles cual se mesma ia fa cuando el ia es encluida. No ave modos tan diferente per clama aida!

Un armario. Un armario de mur, en fato. Si, la ruidos de bate veni de el. Un clave es trovable en la porte de la armario. Con se cor batetante forte, Ricardo desclavi, abri, e vide un om, de ci sua corpo no pote move par causa de un lia multe seria fada: la manos es fisada la un a la otra pos la dorso, e on ia lia ance la parte basa de la gamas. Un tela sur la boca impedi parla, e, stonante, la pantalon manca a la om.

La aira cual ateni la nas de la xico es tan apestante ce se move prima es diverje se. Sola par un colie multe difisil de tota sua coraje e volunta trovable, el susede reveni a la om e libri el.

Cuando acel comensa parla, sua vose es plen de coleria:

"Plu ca dudes-cuatro oras! Esce tu pote imajina? Me ia resta en esta mal loca tra plu ca dudes-cuatro oras. Sin come, sin bevi, sin pote vade a la saleta privata. Iu! Me debe clui la porte. Nos va organiza la limpi a pos. Vade a la fenetra ala, per favore, e fa alga aira limpa entra. Me no plu pote tolera un tal susia. E aora un bevi," el ajunta, e el vade per prende per se un vitro grande de bir.

Ricardo es tan atenida par la trova nonespetada ce el sola oserva ancora, sin parolas, con la boca abrida cual el mostra cuando la teme o la noncomprende prende de el tota sua capasia de opera.

"Cual… cual… cual ia aveni a tu?" el susede pronunsia a la fini.

"La teroriste ia ataca me. Acel de ci sua foto fei cada strada de esta mal site. Me ia vide apena el, ma an tal sufisinte per reconose el. Me ia velia esente liada e encluida, sin pantalon."

"Me comprende acel cosa an min ca la resta. Perce, diablo, el ia fa ce tu es sin pantalon?"

"El ia vole un uniforma. El ia prende ance la jaca. Par alga causa el ia nesesa mea uniforma de gardor de Securix."

"Esce ance tu es un membro de Securix? Noncredable!"

"Cual tu trova ce lo es noncredable? Me no es min conveninte ca tu per esta opera no multe bela, xico peti! O esce tu trova ce me es un mal gardor, car me ia lasa los domina me??"

"No, no, me…" Ricardo comensa temente car esta om es un forte alta, larga, e spesa cual la coleria fa an plu perilosa. Ma el no ave la tempo de fini, ja la otra parla interompente:

"No crede ce me es plu falinte ca tu. Tua condui de aora no mostra ce tu es un gardor multe capas. Tu sta ala como un individua de ci se pensador ia sesa opera."

"Me trova no mal cosa en tu. E me no duta ce en cada relata me es min capas ca tu. No. Tu ia malcomprende me. Cuando me ia usa la parola noncredable, me ia vole mera dise ce me no comprende fasil per ce nos compania ia lasa tu en esta armario sin preocupa sur tu tra plu ca dudes-cuatro oras."

"Lo es vidable ce tu es un nova. Acel no stona me. Securix es en situa multe difisil. Omes manca ci aseta fa esta labora. Furacasas, piromanicas e teroristes abunda plu e plu, e los deveni plu e plu nontemosa…"

"Ma," Ricardo interompe, "si tu no ia fa tota de tua curso, la ofisia sentral ia sabe esta fato ja temprana en la matina. Los ia sabe cual curso tu debe segue. Perce los no ia xerca tu?"

"Los no ave sufisinte persones per fa tota la labora, e xerca me no trae mone a los, donce acel es un taxe min importante ca la sasia de demandores de proteje. Cisa los ia opina ce me ia parti en auto con la mone furada tra me curso. Ci sabe?"

"An tal, si los no ave sufisinte persones per xerca un gardor desapareda, los pote envia la conserna a la polisia!"

"La polisia! Xico, sabe ce me ia es membro de la polisia en la tempo pasada. Me conose acel mundo. Cuando los ia sabe ce me, un polisior pasada, ia desapare, mea colaborores pasada ia reata tota serta par un rie multe joiosa. Cuando los va sabe ce me ia es liada en armario tra dudes-cuatro oras, sin pantalon, sua ries forte va alti asta culmines nunca atenida, asta cuando los cuasi mori de rie. Los ave un tal umor."

"An tal…"

"En ajunta, persones manca ance a la polisia. Los no susede reali tota se taxes importante cual los ta debe. E tu sabe sur acel encontra de la xefes de stato cual va aveni doman. Par causa de lo la polisia ia demanda la aida de Securix, car el no ave - multe manca asta ateni esta - tan multe persones como el ta nesesa, ci es capas de reali operas de garda en un tal situa plen de riscas. La polisia va comensa xerca me pos cuando la xefes de stato ia revola a sua pais. La polisia no pote fa tota, donce el comensa con la taxe cual el opina ce lo es la plu importante. Per me, me es plu importante ca un xef de stato, ma me duta esce multe persones opina la mesma como me."

"E Securix ia pensa ce si tu no ia desapare a alga loca con mone o con un fem bela e rica, me va trova serta tu, car me fa la mesma curso."

"Coreta. Tu comensa comprende como la testa de los opera. Los ia pensa ce me va pote probable tolera tra un dia intera cualce cosa avenida a me. An tal ta ce nos no ave un opina tro mal sur los. Cual los pote fa sin plu gardores, si la polisia no pote aida pronto?"

"Vide, si, a la fini, la noncredable deveni plu credable. Ma no plu plasente par esta causa. De la comensa me no ia ave multe tende per aseta esta labora, e me no pote dise ce la avenis de esta note grandi mea ama a el. An tal, cual me debe fa aora? Me es estrema tarda en mea curso."

"Rapida a via, e fini lo. Me mesma va reporta pronto sur me, e sur la fato ce tu ia libri me. Dise a me, xico: cual tu nom es?"

Ad blocker interference detected!


Wikia is a free-to-use site that makes money from advertising. We have a modified experience for viewers using ad blockers

Wikia is not accessible if you’ve made further modifications. Remove the custom ad blocker rule(s) and the page will load as expected.