FANDOM


Istoria temprana de islam
Dr. C. George Boeree


Figureground
Vide ance
Psicolojia

Alora, en cuando la Impero Roman ia pali, la oportunia per otra sivilias ia crese. On ta duta ce cualcun alora ta divina ce la competor major ta orijina en la costa ueste de Arabia. Arabia ia pote susta sua popla sola minima par cultiva. Ma, car lo ia es locada bon entre la imperos rica a sua norde e la recursos nontocada de Africa a sua sude, e plu tarde la vias par mar a India e ultra, Arabia ia pote furni la eleje de intercambia profitosa a sua popla.

Muhammad ia nase 569 ec en Mecca, un vila de comersia prosima a la Mar Roja. Sua madre ia mori cuando el ia ave ses anios, donce el ia es elevada par sua avo, e plu tarde par sua tio. El ia es probable nonalfabetiste, ma esta ia es la realia per la plu de arabis de sua eda.

Cuando el ia ave 26 anios, el ia sposi un vidua rica 14 anios plu ca el. Ci ta es sua sposa solitar asta el ia mori asta 26 anios plu. El ta ave des plu sposas - ma no fio vivente. El e sua sposa prima ia pare un fia, Fatima, ci ta deveni un carater multe importante en la istoria de islam. La fia ia sposi Ali, la fio adotada par Muhammad, e ance multe importante en islam.

Quando el ia es plu vea, el ia deveni plu e plu relijiosa, e ia atenta aprende plu sur iudisme e cristianisme. El ia comensa medita solitar en la deserto e cavas local.

En 610 ec, Muhammad ia adormi en un cava, cuando tradision dise ce la anjel Gabriel ia apare a el e ia dise a el ce el ta deveni la mesajor de Dio (en arabi: Allah*). El ta ave esta esperia repetente tra la resta de sua vive. Cada ves, la anjel ta furni el con un leson (sura), cual el ta debe memori. Estas ia es ultima rejistrada en scrive, e pos la mori de Muhammad, ia es colieda como la libro santa de Islam, la Quran.

Muhammad ia predica a la popla de Mecca, ma ia es frontida par oposa notable par xefes pagan. Cuando la menasa de viole ia deveni plu prosima, el ia parti de Mecca per la vila de Medina, a cual el ia es invitada, con sirca 200 de se seguores. Ala, el ia es plu susedosa e ultima ia prende la potia secular de la vila.

Sua relatas con la familias pagan de Mecca ia continua dejenera, e relatas con la iudis de Medina, a prima prometente, ia dejenera ance. Un alia entre la familias Meccan e la iudis Medinan batalia con la seguores de Muhammad tra alga anios.

En 630, Muhammad ia prende Mecca. En du plu anios, tota Arabia ia es su sua controla, e islam ia deveni un fortia major. Muhammad ia mori 7 junio 632 ec.

La mesaje fundal de Muhammad ia es multe simple: On debe aseta Allah como la un e sola dio, e aseta ce Muhammad ia es sua profeta. Dise esta parolas tre veses, e on es un Muslim.

Islam sinifia "sede", pd on es salvada sola par fide. Allah, ci sabe tota, sabe a ante ci va es salvada o no. Esta idea (cual nos va vide denova entre la protestantes en Europa) tende coraji en batalia, ma ance tende condui un popla a un aseta pesimiste de la state presente, bon o mal. Ma acel aseta no ta aveni en islam per multe sentos de anios!

La Quran dise ce alga dia (sola Allah sabe cuando), la mor va leva se e reuni con sua spiritos. Los va es judida. Alga va es lansada a un de la sete niveles de inferno. Alga va es permeteda entra a paradiso - descriveda en un modo multe fisical (e an hedoniste a veses). Multe de esta sena deriva de la iudis, ci ia deriva lo de la persianes.

Islam es multe orientada a regulas e tende fusa relijio con la secular. La eglesa e la stato debe es unida. En la Quran, on ave regulas per sposi, comersia, politica, gera, ijenia, etc - multe simil a la leges iudiste, cual Muhammad ia imita. Entre esta regulas, Muslimes debe no come la carne de porco o can e no pote ave relatas sesal cuando la fem ave sua menstrua, como iudistes ortodox. Muhammad ia ajunta un regula contra alcol. La sosia cual Muhammad ia imajina es simil a tal statos autoritar como Arabia Saudi e Iran oji.

Sposi es corajida, e asteni de seso es pecosa. Poligamia ia es permeteda, an con limitas. Femes, como en iudisme e cristianisme, es suordinada a omes, ma no es videda como propria. Divorsa, an fasil, ia es descorajida forte. Femes ia es egal a omes en la plu de casos legal e finansial. Sclavia, an si lo no es condenada, debe segue multe regulas per umani la institui.

Muhammad e la Muslimes ia es jeneral asetante de iudistes e cristianistes (nomida "popla de la libro", pd la biblio), ma paganes no ia es tolerada. Gera e puni par mori ia es asetada e usada par la profeta: "E un ci ataca tu, ataca el en un modo simil" (2: 194).

La cultur e lingua arabi, e la relijio islam, ta domina pronto un parte grande de la mundo, de Espania e Maroco a Egipte e Filastin a Persia e ultra. Per un periodo, lo ta presente un fas tolerante e progresiste, e la filosofia muslim ta compete lo de la elinicas antica.


Sunis e Xias Edit

La fende major en islam es entre la suni e la xia. La fende ia comensa con avenis en la sentenio sete.

Pos la mori de Muhamad en 632, la xefia de la comunia muslim ia pasa a Abu Bakr as-Siddiq, un de la acompanior la plu prosima de Muhamad. Alga en la comunia ia senti ce esta pasa de xefia no ia es legal, e ce la titulo de califa parteni vera a Ali ibn Abi Talib. La alega par Ali ia es suportada par la fato ce el ia es la cusin e fio adotada de Muhamad, sua convertida prima (cuando el ia ave nove anios), e la sposo de sua fia Fatima. Ambos lados ia crede ce Muhamad ia eleje spesial sua om prefereda. Los ci ia suporta Abu ta deveni la sunis; los ci ia suporta Ali ta deveni la Xias.

La califia ia pasa de Abu Bakr a Umar, e de Umar a Ulthman. Ultham ia pasa la rena a Ali. Cuando Ali ia es matada en 661, la califia ia pasa a Muawiya, ci ta funda la Califia Umaian. Ali ia es enterada en Najaf en lo cual es aora Irac, e la loca resta un loca santa major per xias.

La nom suni refere a la sunas, la tradisiones nonscriveda e interpretes de la Curan - un obra simil a la Talmud de la iudis. Sunis crede ce la rol de califa debe es un a cual on es elejeda par la xefes relijiosa de la comunia muslim, e no dependente a un desende direta de Muhamad.

La nom xia deriva de la parola per "partito (de Ali)". Los abita la plu en Iran e Irac este, e entre la Filasines. Los vide alga desendentes direta de Ali - la imames - nunca falinte e la eritores vera de Muhamad. Ali ia es la prima imam, sua fio Hassan la imam du, e sua fio du Hussein la imam tre. La fios de Ali ia es matada en la batalias con califa Muawiya. Ma sua suprasedores ia fini con la imam 12, ci ia asconde en 940. La plu de xias crede ce la imam 12 va reveni como la Mahdi (Maxia), e reclama sua xefia de la mundo muslim. En la entretempo, aiatolas es elejeda per servi como la atendores de islam.

La majoria de sunis e xias es libral, an no par la normas european. En tempos pasosa e rica, on no ave multe desacorda entre los. Ma ambos ave ance setas estrema. Alga xias, per esemplo, ave un tradision de valuante martiria cual deriva de sua esperias de desacorda con la sunis.

La seta estrema suni la plu famosa es la seta Wahhabi, de cual Osama bin Laden ia es un membro. Lo es multe fundaliste: La Curan no debe es interpreteda, ma lejeda leteral; Preas a profetas, santas, o cualce cosa otra ca Dio es proibida; Imajes o monumentos a cualce xef muslim o tombas ornosa per muslimes famosa es proibida; e la Curan debe es la fonte sola de lege secular como ance lege relijiosa.

Un otra grupo famosa es la sufis, ci pote es o suni o xia. Sufis es misticistes ci crede ce la ama de Dio brilia tra tota persones e cosas, an tra feia e malia, e par ateni un state spesial de mente, on pote esperia esta direta. En esta, los sembla zen budisme. Sufisme es ance notada per sua usa de parables on multe niveles de sinifia, simil a la parables de Jesus. Un suclase de la sufis es la darvixes, de ci se pratica mistica inclui dansa relijiosa.


Nota: "Allah" es la parola arabi per "la Dio". Lo deriva de la mesma radis como la ivri "Elohim", e ultima de la parola cananes "El", cual refere a la padre de tota dios.

© Direto de autor, C. George Boeree, 2001

Ad blocker interference detected!


Wikia is a free-to-use site that makes money from advertising. We have a modified experience for viewers using ad blockers

Wikia is not accessible if you’ve made further modifications. Remove the custom ad blocker rule(s) and the page will load as expected.