FANDOM


La Peti Capeta Roja (1697) par Charles Perrault (1628-1703)

A un ves pasada on ave un xica de vileta, la plu bela ci on pote vide; se madre es fol de el, e se ava es an plu fol. Esta bon fem fa cose un peti capeta roja, cual conveni tan bon a el, ce a cada loca on nomi la xica, la Peti Capeta Roja.

A un dia, se madre, pos prepara e coce tortas plata, dise a el: "Vade per vide como es la sania de tu ava, car on ia dise a me ce el es malada. Trae a el un torta plata e esta vaso peti de bur."

La Peti Capeta Roja parti pronto per vade a la casa de se ava, ci abita en un otra vileta. Pasante tra un foresta el encontra senior Lupo, ci desira forte come el; ma el no osa, car alga leniores es en la foresta. La lupo demanda do el vade; la enfante nonfortunosa, ci no ia sabe ce lo es perilosa, para se per escuta un lupo, dise a el: "Me vade per vide me ava, e per trae a el un torta plata, con esta vaso peti de bur, cual me madre envia a el." "Esce el abita multe distante?" – la lupo dise a el. "O! si," – la Peti Capeta Roja dise – "el abita ultra la molin cual tu vide ala, a la casa prima de la vileta." "Bon," – la lupo dise – "ance me vole vade per vide el; me vade ala pasante sur esta via, e tu sur acel via, e nos va vide ci va ariva la plu temprana." La lupo comensa core con tota se fortia sur la via cual es la plu corta, e la xica vade sur la via la plu longa, divertinte se par colie nozetas, par core pos papilios, par fa buces con flores peti cual el trova. La lupo ariva pronto a la casa de la ava; el bateta la porte: toc, toc.

"Ci es ala?" "El es tu neta, la Peti Capeta Roja" – la lupo dise cambiante se vose – "ci trae a tu un torta plata e un vaso peti de bur cual me madre envia a tu. La bon ava, ci es en se leto par causa ce el es alga mal, cria a el: "Tira la cavil e la securador va es abrida." "La lupo tira la cavil e la porte deveni abrida. La lupo lansa se asta la bon fem, e a la plu pronto devora el; car la lupo no ia come de plu ca tre dias. A pos el clui la porte, e vade per reclina en la leto de la ava, espetante la Peti Capeta Roja, ci pos poca tempo veni per bateta la porte. Toc, toc.

"Ci es ala?" La Peti Capeta Roja, ci oia la vose ru de la lupo, teme prima, ma, credente ce se ava ave cataro, responde: "El es tu neta, la Peti Capeta Roja, ci trae un torta plata e un vaso peti de bur cual me madre envia a tu." La lupo, dulsinte alga se vose, cria a el: "Tira la cavil e la securador va es abrida." La Peti Capeta Roja tira la cavil, e la porte deveni abrida. La lupo, vidente el ci entra, asconde se en la leto su la covreleto, e dise a el: "Pone la torta plata e la vaso peti de bur sur la caxa per pan, e veni per reclina con me. La Peti Capeta Roja desvesti se, e vade en la leto, do el es multe stonada par vide como se ava aspeta en se veste de note. La neta dise a el: "Me ava, tu ave brasos tan grande! Los es per abrasa plu bon tu, me xica!" "Me ava, tu ave gamas tan grande!" "Los es per core plu bon, me enfante!" "Me ava, tu ave oreas tan grande!" "Los es per escuta plu bon tu, me enfante!" "Me ava, tu ave oios tan grande!" "Los es per vide plu bon tu, me enfante!" "Me ava, tu ave dentes tan grande!" "Los es per come tu!" E disente esta parolas, esta mal lupo lansa se asta la Peti Capeta Roja, e come el.