FANDOM


La elinicas antica, parte du:
Socrate, Platon, e Aristotele
C. George Boeree


Figureground
Vide ance
Psicolojia

"La vive nonesaminada no merita vive" - Socrate

La atinanes Edit

Quando no pensa de Elas antica, nos pensa direta de Atina. Alga de la filosofistes cual nos ia discute ja ia pensa ce Atina ta es la culmina en sua careras si los ta pote presenta sua ideas en esta site grande.

Ma Atina no ia es sempre grande. Lo ia comensa como un colie de viletas en alga de la tera la plu povre per cultiva en Elas. Sola uvos e olivas, curante cultivada, ia dona un modo de susta Atina vea, acel e comersia.

Ultima, la distantia entre la avores - la familias aristocrata, rica de comersia, cual rena Atina - e la povre - laborores, campanianes, e sclavos - ia deveni tan grande ce la site pare destinada a ruina. En 594 aec, la xefes de la clase media ia enscrive un mercator nomida Solon per aseta la taxe de gida la sita e restora alga pas e ricia. El ia comensa par cansela tota detas e libri tota persones ci ia es sclavida per sua detas. Alora, el ia crea un constitui en cual la popla ia es divideda entre cuatro clases fundida sur sua valua economial, con la plu alta reteni la plu potia, ma la plu basa esenta de taxes.

Pos un traversa multe difisil, la democratia prima en la mundo ia es fundida su la xefia de Clistene en 507 aec, cuando el ia anunsia ce tota omes libre ta es permeteda vota. Esta, natural, no es un democratia completa, ma no judi los tro sever: Sclavia no ta es proibida asta 1814, cuando Mexico ia deveni la nasion prima ci fini permane sclavia. La SUA no ta libri se sclavos asta 1865. E femes no ta pote vota asta 1893, cuando Zeland Nova ia dona los la vota. La SUA no ia permete ce femas vota asta 1919.

Nonfortunosa, a la mesma tempo ce la esperimenta democrata ia comensa, la Impero Persian ia deside ce lo vole estende se a, prima, Ionia, e alora Elas propre. Ma en 490 aec, 20,000 elinicas ia defeta 100,000 soldatos de Persia a la vila de Maraton, a norde de Atina. Un mesajor nomida Pidipides ia core la 26 milias - 42.195 km - a Atina per dona la novas bon. Esta es la orijin de la sporte de core maraton.

En 481, la imperor persian Xerxes ia envia un armada de plu ca 2 milion soldatos, aidada par un marina de 1200 barcones per ataca Elas denova. La armada ia ruina Elas norde e ia prepara per ataca Atina. Los ia trova la site abandonada. Ma la marina persian ia trova la marina elinica espetante lo en la baia de Salamis. La elinicas ia es vinsente contra tota prevides. A 479 aec, la persianes ia es forsada a retro a Asia.

Si esta pare como un peso minor de istoria, recorda: Esta vinse ia permete ce la aventura elinica continua produi la tipo de pensa cual ta domina Europa e la Mediteraneo per la 2 milenios seguente.

En esta periodo de tempo en esta capital, Atina ia ave cuasi 300,000 persones, e ia es un de la plu grande sites en la mundo. Sirca dui ia es libre, un tri ia es sclavos, e un sesi ia es stranjeres. Sirca 50,000 - omes adulte e libre - pote vota.

Socrate Edit

Socrate (470-399) ia es la fio de un scultor e un comadre, e ia servi con merita en la armada atinan entre la gera entre Atina e Sparta. El ia sposi, ma ia tende deveni enamada par omes joven e bela, spesial un soldato joven nomida Alcibade. On ia dise ce Socrate el ia es corta e alga obesa, no ia cura multe per se aspeta, e ia ama vino e conversa. Sua studiante la plu famosa - Platon - ia dise ce el ia es "la plu saja, la plu justa, e la bon bon de tota omes ci me ia conose sempre" (Fedo).

El ia es iritada par la sofistes e sua tende per ensenia lojica como un modo de ateni finis sasiante, e an plu sua promove de la idea ce tota cosas es relativa. La veria es lo cual el ia ama, desirada, e crede.

Filosofia, la ama de sajia, ia es per Socrate un via santa, un xerca santa - no un jua divertinte. El ia crede (o el ia dise ce el crede en la conversa Meno) en la reincarne de un spirito eterna cual conteni tota comprende. Nonfortunosa, el ia dise, nos perde conose de acel comprende a cada nase, e donce nos nesesa es recordada de lo cual nos sabe ja (en loca de aprende alga cosa nova).

Donce, el ia dise ce el no ensenia, ma en loca servi, como se madre, como un comadre cual aida pari un veria ja en nos. La usa de demandas e respondes per recorda sua studiantes de sabe en los es nomida maieutica (comadria), dialetica, o la metodo socratal.

Un esemplo de sua efeto sur filosofia es trovable en la conversa Eutifro. El ia sujesta ce lo cual nos considera un ata bon no es bon car la dios dise lo, ma lo es bon car lo es usosa per nos en nosa atentas per es persones plu bon e plu felis. Esta sinifia ce etica no es plu un caso de demanda de la dios o scrivedas santa per la natur de bon o mal, ma un caso de pensa sur vive. El ia locada an la consensa individua supra la lege - un idea multe perilosa en cualce sosia!

Socrate mesma ia scrive nunca cualce de sua ideas, ma en loca engrana se studiantes - omes joven e rica de Atina - en conversas sin fini. Per recompensa el per sua instrui, los manteni sua vive. Car el ia dise ce el ia ave poca nesesas, el prende poca - cual causa angusa per se sposa Xantipe.

Platon ia reconstrui esta discutes en un colie grande de scrives conoseda como la Conversas. Lo es difisil per distingui cual es de Socrate e cual es de Plato en esta scrives. Donce nos va discute los lunlotra a su.

Socrate no ia es amada par tota atinanes. Sua ideas nonortodox sur politica e relijio ia dona a la sitadanes xef de Atina la escusa cual nos nesesa per condena el a mori per mali la morales de la jovenes de la site. En 399, el ia es comandada per bevi un prepara de conio venenosa, cual es ia fa con la acompania de se studiantes. La aveni es rejistrada en la Apolojia, par Platon.

Se parolas final ia es "Crito, nos debe un gal a Ascelpio (la dio de medica). Paia lo e no descura lo".

Platon

Platon (437-347) ia es la studiante la plu valuada par Socrate. De un familia rica e potiosa, sua nom vera ia es Aristocle. Platon ia es un nometa cual refere a la largia de se spalas. Cuando el ia ave sirca 20 anios, el ia es encantada par Socrate e ia deside dedica se a filosofia. Ferida par la mori de Socrate, el ia vaga sirca Elas e la Mediteraneo e ia es caturada par piratas. Sua amis ia colie la mone nesesa per rescati el de sclavia, ma cuando el ia es librida sin paia, se amis ia compra un propria peti per fundi un scola - la Academia, fundida en 386 aec.

La Academia ia es plu como la comunia de Pitagoro: un tipo de fratia cuasi relijiosa, do omes joven e rica pote studia matematica, astronomia, lege, e, natural, filosofia. La scola ia es sin costa e dependeda sola de donadas libre. Seguente sua ideales, Platon ia permete ance ce femes pote studia ala! La Academia ia deveni la sentro de aprende elinica per cuasi un milenio.

On pote comprende Platon como idealiste e razonaliste, simil a Pitagoro ma min mistica. El ia divide realia entre du: A un lado, on ave ontos, la idea o ideal. Esta es la realia ultima, permane, eterna, spirital. A la otra lado, on ave fenomenos, cual es un apare de la ideal. Fenomenos es cosas como los pare a nos, e es asosiada con materia, tempo, e spasio.

Fenomenos es iludes cual dejenera e mori; ideales es noncambiante e perfeta. Fenomenos es serta inferior ca ideales. La idea de un triangulo - la matematica cual defini lo, la forma o esense de lo - es eterna. Cualce triangulo individua, la triangulos de la mundo dial de esperia, es nunca perfeta: Los pote es alga vagante, o la linias un poca spesa, o la angulos no tota coreta. Los pote sola prosimi acel triangulo perfeta, la triangulo ideal.

Si esta parla sur ideas o ideales pare strana, como en alga modo los es plu real ca la mundo de nosa esperias, considera siensa. La lege de gravita, 1 +1 = 2, "magnetes atrae fero", E = mc2, etc - estas es universales, no vera per un dia en un loca pico, ma vera sempre e en tota locas. Si on crede ce la universo ave ordina, ce natur ave leges, on aseta ideales.

Ideas es disponable a nos tra pensa, en cuando fenomenos es disponable a nos tra nosa sensas. donce, natural, pensa es un modo multe plu bon per ariva a la veria. Esta es lo cual indica ce la epistemolojia de Platon es razonaliste, e no empiriciste.

Sentis pote sola furni informa sur la mundo nonperfeta e sempre cambiante de fenomenos, e donce pote sola furni implicas sur realia ultima, e no realia mesma. Razona vade direta a la idea. On "recorda", conose par intui, la veria, como Socrate ia sujesta en la conversa Meno.

Seguente Platon, la mundo fenomenal aspira deveni ideal, perfeta, completa. Ideales es, en esta modo, un forsa motivante. En fato, el identifia la ideal con Dio e bonia perfeta. Dio ia crea la mundo de materia e formi lo seguente se "scema" o "sianogram" - ideas o la ideal. Si la mundo no es perfeta, lo no es la fali de Dio o la ideales, ma car la materia cru no es perfeta. Me opina ce tu pote vide perce la eglesa cristian antica ia fa ce Platon un cristian onoral, an si el ia mori tre e un dui sentenios ante Cristo!

Platon ia aplica la mesma duplisme a umanas: On ave un corpo, cual es material, mortal, e "moveda" (pd un vitim de causa). E on ave un spirito, cual es ideal, nonmortal, e "nonmoveda" (capas de vole libre).

La spirito inclui razona, natural, e autoconsensa e la sensa de moralia. Plato ia dise ce la spirito va sempre eleje fa bon, si lo reconose cual es bon. Esta es un conseta de bon e mal simil a lo de la budistes: En loca de la idea ce mal es un peca, lo es videda como un caso de nonsabe. Donce, algun ci fa alga cosa mal nesesa instrui, no puni.

La spirito es traeda a la bon, la ideal, e donce lo es traeda a Dio. Nos move gradal plu prosima a Dio en nosa vive individua e par reincarne. Nos gol etical en vive es deveni plu como Dio, move a la mundo pur de ideas e ideal, libri nos de materia, tempo, spasio, e deveni plu real en esta sinifia plu profonda. Nosa gol, en otra parolas, es autoreali

Platon ia parla de tre niveles de plaser. Prima es plaser fisical, de cual seso es un bon esemplo. La nivel du es plaser estetica, per esemplo par amira la belia de un person o arte, o joia lunlotra en un sposi bon. La nivel tre, la plu alta, es plaser ideal, pd la plaseres de la mente. Asi, la esemplo ta es ama platonal, ama inteletal per un otra person, nonsusida par la fisical.

Paralel a esta tre niveles de plaser es la tre spiritos. Nos ave un spirito nomida apetito, cual es mortal e veni de la ventre. La spirito du es nomida zelo o coraje. Lo es ance mortal, e vive en la cor. La spirito tre es razona. Lo es nonmortal e vive en la serebro. La tre es cadenida par la canal serebrospinal.

Platon ia gusta analojias. Apetito, el ia dise, es como un cavalo savaje, ci es multe potiosa ma es difisil controlada. Coraje es como un cavalo bon domada, ci ave potia refinada e dirijeda. E razona es la caror, dirijeda par sua goles, dirijente ambos cavalos en acorda con se vole.

Otra analojias abunda, spesial en la obra la plu grande: la Republica. En esta obra, Platon desinia (usante la vose de Socrate) un sosia como un modo per descovre la sinifia de justia. El ia compara la elementos de se sosia (un utopia, elinica per "no loca") a la tre spiritos: La laborores e campaniores es la funda de la sosia. Los cultiva e produi benes per sasia la apetitos fundal de la sosia. La gerores representa la zelo e coraje de la sosia. E la res-filosofistes gida la sosia, como razona gida nosa vives.

Ante ce tu suposa ce nos es esaminante un varia elinica de la sistem de casta en India, nota per favore: La enfantes de tota sitadanes es elevada con lunlotra, e sua parteni en un de la tre niveles de sosia es fundida sur talentos, e no sur la niveles de sua jenitores. E Platon inclui femes como la egales de omes en se sistem.

Alga sitas:

"Mervelia es la senti de un filosofiste, e filosofia comensa en mervelia."

"... (S)i tu demanda cual es jeneral la bon de instrui, la responde es fasil: ce instrui fa bon omes, e bon omes ata nobil."

"Nosa gol en la construi de la stato es la felis la plu grande de la intera, e no de cualce un clase."

Aristotele Edit

Aristotele (384-322) ia nase en Stagira, un colonia elinica peti en Tracia. Sua padre ia es un mediciste ci ia atende la avo de Alesandro la grande. Lo es suposada ce sua padre ia instrui Aristotele en la studia de natur.

El ia es la studiante la plu valuada de Platon, an si el no ia acorda con Platon sur multe ideas. Cuando Platon ia mori, Aristotele ia resta per un tempo corta con un otra studiante de Platon ci ia fa ce el deveni un tirano en Anatolia minor. Aristotele ia sposi sua fia, Pitia. Los ia move a Lesbos, do Pitia ia mori en pare sua enfante sola, un fio. An si Aristotele ia sposi denova, sua ama per Pitia no ia mori, e el ia demanda ce los ta es enterada a lado de lunlotra.

Per cuatro anios, Aristotele ia es la ensenior de Alesandro, la fio de Filipe de Macedonia, ci ia ave destra anios a la comensa de sua instrui. En 334, Aristotele ia reveni a Atina e ia funda sua scola de filosofia en un construida nomida la Liceum (de un nom per Apolo, "la pastor"). La jardines bela e paserias covreda ia es perfeta per paseas e discutes estendeda, e donce la studiantes ia es nomida la peripatoi (paserias covreda).

Prima, on debe comprende ce Aristotele ia es un siensiste tan multe como el ia es un filosofiste. El ia es fasinada sin fini par natur, e ia clasi multe de la plantas e animales de Elas. El ia es egal interesada par la anatomias de animales e sua condui savaje.

Aristotele ia inventa lojica. Estra la simboles, lo es esensal la mesma como lojica moderna.

Ta ce nos comensa con metafisica: Cuando Platon separa la mundo sempre cambiante de fenomenos e la realia ideal e eterna, Aristotele ia sujesta ce la ideal es trovada "en" la fenomenos, la universales "en" la individua.

Lo cual Platon ia nomi idea o ideal, Aristotele ia nomi esense, e sua oposada materia. Materia es sin forma o usa intendeda. Lo es la posible sin realia. Esense furni la forma o usa intendeda a materia. Esense es perfeta, completa, ma lo ave no sustantia. Esense e materia nesesa lunlotra. Esense reali materia. Esta prosede, la move de materia sin forma a esente completa es nomida entelecia.

On ave cuatro causas cual contribui a la move de entelecia. Los es la respondes a la demanda "perce?" o "cual es la esplica de esta?"

1. La causa material: De cual alga cosa es composada.Perce la sculta bronze? La metal de cual lo es fabricada. Oji, nos vide un asentua a causa material en reduisme, cual ta esplica, per esemplo, pensas e emosias como la natur de ormones e neurones. Nos vade comun a un nivel plu basa cuando nos no pote esplica alga cosa a sua nivel propre.

2. La causa efetal: La move o enerjia cual cambia materia. Perce la sculta? La forsas nesesada per crea la sculta, la martel e la caldia de la forno nesesada per fabrica lo de bronze sin forma. Esta causa es lo cual siensa moderne tende foca sur, e multe vide lo como la defini de "causa". Nota ce psicolojia moderne depende comun sur reduisme per trova causas efetal. Ma esta no es sempre tal: Freud ia parla de enerjia psicosesal e Skinner ia parla de stimula e responde, sin discute materia.

3. La causa formal: La forma o esense de alga cosa. Perce la sculta? Posible la scultor ia ave un desinia per la bronze, la forma de la sculta. En psicolojia, nos vide alga teoristes foca sur strutur - Piaget e sua scemas, per esemplo. Otras parla de la strutur en la codigo jenetica, o de scritos conosal.

4. La causa final: La razona, intende, usa de alga cosa. Perce la sculta? La usa intendeda par la scultor o sua padrones. Esta ia es popular con la scolores medieval: Los ia xerca per la causa ultima, la intende per la universo, cual los ia nomi (natural) Dio. Nota ce, estra la siensas "dur" (fisica, cimica, etc), esta causa es comun la tipo en cual nos ave la plu interesa. Perce el fa lo? Cual intende el? Per esemplo, en lege, la baleta es posible la causa efetal de un mata, ma la intende de la person ci trae la gatilio es cual conserna nos. Cuando nos parla de goles o valuas, nos parla de causas final.

Aristotele ia scrive la libro prima sur psicolojia (como un sujeto separada de la resta de filosofia). La libro ia es conveninte nomida Para Psice, elinica per "sur la mente o spirito". Lo es ance conoseda par se nom latina, De Anima. En esta libro, nos trova la referes prima de multe ideas fundal per psicolojia oji, como la leges de asosia.

En esta libro, el dise ce la mente o spirito es la entelecia prima de la corpo, la causa e prinsipe de la corpo. Nos pote dise lo como esta: La mente es la opera intendante de la sistem de nervos.

Como Platon, el ia proposa tre tipos de spiritos, an si definida en un modo alga diferente. On ave un spirito vejetal, la esense de cual es nuri. Alora, on ave un spirito animal, cual conteni la sensas fundal, desira, dole e plaser, e la capasia per causa move. E final, on ave la spirito umana. La esense de la spirito umana es, natural, razona. El ia sujesta ce, posible, esta spirito final es capas de survive separada de la corpo, como un capitan pote survive la ruina de se barcon.

El ia premostra multe de la consetas cual ta deveni popular sola du mil anios plu tarda. Libido, per esemplo: "En tota animales... la funsiona la plu natural es per pare un otra vivente simil a se mesma... afin los pote ateni, tan multe como posible, la nonmortal e divin.... Esta es la causa final de la vive natural de cada vivente."

E la luta entre id e ego: "On ave du potias en la spirito cual es aparente la forsas de move: desira e razona. Ma desira stimula atas cual viole razona... desira... pote es falsa.

E la prinsipe de plazer e la prinsipe de realia: "An si desiras aveni cual es oposada a lunlotra, como en la caso cuando razona e apetito es oposada, lo aveni sola en viventes con un sensa de tempo. Per razona, vidente la futur, dise ce nos debe resiste, en cuando desira vide sola la presente; la plasente momental pare a el como la plasente asoluta e bon asoluta, car lo no pote vide la futur."

E, final, autoreali: Nos comensa en la utero como materia sin forma, e tra anios de developa e aprende, nos deveni adultes matur, sempre atenta ateni perfeta. "Donce, la bon ia es bon esplicada como lo a cual tota cosas punta."

© Direto de autor, 2016, C George Boeree

Ad blocker interference detected!


Wikia is a free-to-use site that makes money from advertising. We have a modified experience for viewers using ad blockers

Wikia is not accessible if you’ve made further modifications. Remove the custom ad blocker rule(s) and the page will load as expected.