Lingua Franca Nova
Talk0this wiki
| Lingua franca nova (Lingua franca nova) | |
|---|---|
| Parlada en: | tota la mundo |
| Area: | |
| Tota parlores: | > 100 |
| Ordina: | |
| Familia: | Linguas construida |
| State ofisial | |
| Lingua ofisial de: | |
| Regulada par: | |
| Sifras | |
| ISO 639-1 | |
| ISO 639-2 | |
| SIL | lfn |
 | |
| Vide ance: Lingua – Lista de linguas | |
Lingua franca nova (cortida a lfn) es un lingua aidante internasional creada par Dr. C. George Boeree e perfetida par multe suportores de la lingua. La vocabulo de lfn es fundida en franses, italian, portuges, espaniol, e catalan. La gramatica es multe reduida e simil a la creoles romanica. La lingua es fonetical speleda, con 22 leteras de la alfabeta latina o la alfabeta cirilica.
La prinsipes gidante:
- Un cuantia limitada de fonemes;
- Un spele cual refleta clar la pronunsia;
- Un gramatica simple e coerente;
- Un grupo limitada de afisas produosa;
- Un ordina de parolas bon definida;
- Un vocabulo prendeda de la linguas romanica moderna;
- Un capasia per aseta parolas tecnical internasional;
- Un aspeta natural, bela, e espresosa.
Contents |
Istoria e comunia 
Edit
Boeree ia comensa labora a lfn en 1965, con la gol de crea un lingua simple. El ia es inspirada par leje sur lingua franca, un pijin usada en la mar Mediteranean en sentenios pasada.
- Lfn ia es prima presentada a la interede en 1998.
- Un grupo ia es formada en 2002 par Bjorn Madsen a Yahoo!, e lo ave plu ce 200 membros oji. Membros ia contribui multe a la developa de la lingua.
- Stefan Fisahn ia crea un vici per la lingua en 2005.
- En 2008, lfn ia reseta un identifia ISO 639-3 de "lfn" par SIL.
- En 2008, Simon Davies ia renovi la disionario xercable (lfn-engles/engles-lfn). La disionario ave plu ca 15,000 parolas e espresas en lfn.
- La vici ia move a Wikia en 2009. Lo ave plu ca 2800 pajes, e inclui multe articles, naras, e poesias.
- La libro prima en lfn - La aventuras de Alisia en la pais de mervelias, traduida par Simon Davies - ia es primida en 2012.
Spele e pronunsia Edit
Vocales en lfn (a, e, i, o, e u) es pronunsiada como en espaniol. Car lfn ave sola sinco vocales, varias en pronunsia causa rara problemes. En afi:
vocal anterior vocal posterior vocal cluida i u vocal media e o vocal abrida a
La diftongos es ai [ai], au [au], eu [eu], e oi [oi]
La plu de la consonantes es pronunsiada como en engles, franses, deutx, espaniol, etc, con alga esetas:
- c e g es sempre "dur" ([k] e [g]),
- j es pronunsiada como en franses ([ʒ]),
- x es pronunsiada como engles sh o franses ch ([ʃ]).
En afi:
bilabial labiodental alveolal posalveolal palatal velal glotal plosiva p b t d k ɡ fricante f v s z ʃ ʒ h nasal m n ŋ1 vibrante r prosiminte w2 l j3
- 1 La letera n ante c o g e -ng final es pronunsiada [ŋ].
- 2 La letera u es pronunsiada [w] entre du vocales o ante un vocal a la comensa de un parola, e cu e gu ante un vocal es pronunsiada [kw] e [gw].
- 3 La letera i es pronunsiada [j] entre du vocales o ante un vocal a la comensa de un parola, e li e ni entre du vocales pote es pronunsiada como [lj] e [nj] si desirada.
La leteras k, q, w, e y pote es usada per nomes propre de otra linguas, e es pronunsiada [k], [k], [u, w], e [i, j], en ordina.
La pronunsia de lfn es flexable, si on trova lo difisil. Per esemplo, on pote pronunsia e como [ei] o [ɛ], e o como [ou] o [ɔ], si tu nesesa; on pote omete h si on trove ce lo es difisil; on pote pronunsia j e x como [dʒ] e [tʃ]; on pote pronunsia "scrive" como "escrive" e "strada" como "estrada"; on pote cade la consonante prima en parolas como "psicolojia" o "pterodatilo".
An si la asentua de silabas no ave un rol multe importante en lfn, ave alga normas.
- En la plu de casos, la asentua es a la vocal ante la consonante final:
- casa ['ca sa]
- abeon [a be 'on]
- varia ['va ri a]
- Si no ave un vocal ante la consonante final, la asentua es a la vocal prima:
- te ['te]
- tio ['ti o]
- En parolas cual fini con du vocales (esetante ia, ie, io, ua, ue, o uo), la asentua es a la prima de la du vocales:
- cacau [ca 'cau]
- idea [i 'de a]
- produi [pro 'du i]
- Entre du otra vocales e en cu o gu ante un otra vocal, i e u es vera consonantes, e la asentua es locada con esta en mente:
- maio ['ma jo]
- sangui ['saŋ gwi]
- La plural con -s o -es no altera la asentua orijinal de la parola:
- casas ['ca sas]
- tios ['ti os]
- ideas [i 'de as]
A su es la alfabeta de lfn en se forma latina e cirilica, e con se formas major en afi:
Latina a b c d e f g h i j l m n o p r s t u v x z Cirilica а б к д е ф г х и ж л м н о п р с т у в ш з Afi [a] [b] [k] [d] [e] [f] [ɡ] [h] [i] [ʒ] [l] [m] [n] [o] [p] [r] [s] [t] [u] [v] [ʃ] [z] Nomes a be ce de e ef ge hax i je el em en o pe er es te u ve ex ze
Alga fanes de lfn ia crea modos per usa un varia de otra sistemes de scrive, como elenica, arabi, ivri, hangul, e nion.
Gramatica Edit
Vista jeneral Edit
Lfn segue la ordina de parolas "svo" (sujeto-verbo-ojeto). Parolas, formulas, e proposas alterante segue jeneral cual se altera.
Nomes es usual presededa par articles (la, un) e otra determinantes. Esetante per la plural (-s o -es), nomes no varia. La rol de un nom en un frase es determinada par la ordina de parolas e par preposadas.
La pronomes personal es nonvariante: me, tu, el, nos, vos, los. La pronomes de refleta es la mesma, estra la person tre, singular e plural, cual usa se. La determinantes de posese es la mesma como los de refleta, estra ce on usa la ante los.
Verbos no varia. La tempo e la moda es indicada par particulos presedente: ia per la pasada, va per la futur, e ta per la moda dependente (elejable). La partisipio ativa fini con -nte e la partisipio pasiva fini con -da. Estas pote es usada con es per crea la aspeta continuante e la vos pasiva, en ordina. La infinitiva es la mesma como la verbo simple.
Ajetivos no varia, e averbos no es distinguida de ajetivos. La espresas per compara es formida con plu o min, e la espresos superlativa es formida con la plu o la min.
Gramaticas completa per lfn es disponable en engles, franses, rusce, esperanto, e lfn.
Ordina de parolasEdit
Frases en lfn ave un ordina restrinjeda de parolas. La ordina jeneral es:
- formula nomal de sujeto – formula verbal (– formula nomal de ojeto)
- Joan core
- Maria oia Joan
Un formula nomal ave esta ordina:
- (determinantes –) nom (– ajetivos)
- La tre omes grande...
- La multe femes peti...
Un formula verbal ave esta ordina:
- (tempo –) (verbo presedente –) verbo (- averbo)
- ...ia nesesa come rapida
- ...va debe come lente
Un formula preposadal jeneral segue la parolas cual el altera, e ave esta ordina:
- preposada – formula nomal
- ...en la cosina
- ...pos medianote
NomesEdit
La roles de nomes en un frase es indicada par preposadas e la ordina de parolas. No ave casos gramatical.
La plural de nomes es creada par ajunta -s a nomes cual fini con vocales, o -es a nomes cual fini con consonantes. Esta no cambia la asentua:
- casa > casas
- fem > femes
La seso de nomes no es normal indicada. Si nesesada, nomes pote es segueda par mas o fema:
- un cavalo mas
- un cavalo fema
Un cuantia peti de roles tradisional ave un forma fema en -esa. Per esemplo:
- prinse / prinsesa
- conte / contesa
Un cuantia peti de parolas per membros de un familia ave un forma mas en -o e un forma fema en -a:
- tio / tia
- fio / fia
- sposo / sposa
- xico / xica
E un cuantia multe peti ave du formas diferente:
- madre / padre
- sore / frate
- fem / om
La aposa de un nom con un otra es, per la plu parte, limitada a nomes e titulos:
- san Josef
- la rio Amazon
- Los ia nomi el Joan
Determinantes Edit
Determinantes en lfn presede la nom cual los altera. Ave du articles: la e un. No ave un forma nondefinida per nomes plural, ma on pote usa alga si desirada:
- la om, un fem, e enfantes
- me come alga pan e ceso
Lfn ave du "predeterminantes", cual presede tota otras:
- tota
- ambos
Lo ave du determinantes de mostra:
- esta
- acel
Lo ave du determinantes de demanda:
- cual
- cuanto
E lo ave sinco determinantes de eleje e esclui:
- cada
- cualce
- alga
- no
- sola
La determinantes de posese es la me, la nos, la tu, la vos, e la se poneda ante la nom poseseda. La se es la determinante de posese per la person tre singular e plural. On pote lasa la la cade si no confusa resulta, per esemplo ante un nom per un person, un animal, o un cosa fisical, o pos un preposada.
- La tu gato es ala.
- No, acel es se gato.
- Tu es la ojeto de me desira.
- La me desira es fol.
Lfn ave esta paroletas de cuantia:
- multe
- poca
- plu
- min
Numeros es ance usada per indica cuantia:
- tre gatos
- senti balones
E lo ave tre paroletas de similia e difere:
- tal
- otra
- mesma
La determinantes ave un ordina cuando plu ce un es usada:
- Tota o ambos vade prima;
- Un de la, esta, acel, ce, cual, cuanto, cada, cualce, alga, no, sola, o la determinantes de posese vade du;
- Un o plu de un, multe, poca, plu, min, tal, otra, mesma, e la numeros vade tre.
Per esemplo:
- tota me tre fias
- la multe otra cosas
Final, la ajetivos bon e mal pote es poneda ante la nom, ma pos tota determinantes.
PronomesEdit
Pronomes en lfn no varia:
singular plural person 1 me nos person 2 tu vos person 3 el / lo los
El refere a persones e animales major. On pote estende metaforal la usa per otra animales, robotes, tempestas, la luna, etc. Lo refere a cosas, animales peti, plantes, ideas, etc. Los es usada per la plural de ambos.
Lfn no ave distinguis de "seso" per el o los. Si nesesada, on pote usa parolas como la fem, la om, la fia, o la fio.
Lfn no ave un contrasta entre formas cortes e noncortes de la person du: tu es sempre usada per la simple, vos es sempre usada per la plural.
La pronom refletante es se.
Lfn no ave pronomes de posese. En loca, on usa espresas como el de me e los de me, o on repete la nom:
- Esta es de me.
- El de me es plu grande ce el de tu.
- Me padre es plu grande ce tu padre.
Lfn ave un pronom nondefinida per persones, on, cual es usada como "man" en deutx o "on" en franses:
- On debe segue la regulas.
Esta determinantes pote es usada sin se nomes (en la modo de pronomes) si no confusa resulta:
- tota
- ambos
- esta
- acel
- cada
- cualce
- alga
- multe
- poca
- plu
- min
- la plu
- la min
Alga otra pronomes e espresas pronomal es derivada de determinantes:
- ambos
- estas
- aceles
- cadun (= cada person)
- cada cosa
- cualcun (= cualce person)
- cualce cosa
- algun (= alga person)
- alga cosa
- nun (= no person)
- no cosa
- la otra
- un otra
- otras
- la mesma
- la un la otra
- la un con la otra
- etc
VerbosEdit
Lfn no ave conjugas de verbos e la forma no varia per indica persones, pluralia, tempo, moda, aspeta, etc. La tempo e moda es indicada par parolas nomida "preverbos":
preverbo presente - pasada ia futur va ipotesal ta
La tempo presente usa la verbo simple. Lo es ance usada per indica atas e states abitual, fatos de natur, e como un "tempo istorial", usada en naras cual es clar en la pasada:
- El come
- La sol leva en la este
- Me labora a la universia
La tempo pasada es indicada par la particula ia:
- El ia come
- La clima ia es plu fria en la edas glasial
La tempo futur es indicada par la particula va:
- El va come
- La clima va es plu calda en la futur
Lfn ave ance un particula elejable, ta, cual indica nonrealia e pote es usada do otra linguas ta usa un moda dependente (condisional) o sujuntiva:
- Me ia duta ce el ta vade
- Me ta es felis si la sol ta brilia
Per indica la dependente pasada, cuando no otra indica de la pasada es evidente, on pote usa ia ta:
- Me ia ta es un bon re
Ta es ance usada en la espresa ta ce, cual espresa un desira de la parlor:
- Ta ce la re vive longa!
- Ta ce nos vade!
Alga averbos, verbos presedente, e preposadas ajunta esatia a la tempos:
- Me ia come ante aora
- Me ia come plu temprana
- Me ia fini leje la libro
- Me ia comensa leje la libro
- Me come aora
- Me va come pos alora
- Me va come plu tarda
- Me va come pronto
Ave ance du espresas idiomal:
- Me veni de come
- Me vade a come
La averbo ja pote es usada per espresa lo cual en otra linguas es la aspeta completida (perfeta):
- Me ia come ja
La nega es indicada par ajunta no ante la particula de tempo o (en la tempo presente) la verbo. Un nega plu forte es indicada par la averbo nunca pos la verbo. Neglas duple no es permeteda:
- El no ia pensa ce algun es asi
- Me no parti
- Me va parti nunca de tu
Alga verbos nontransitiva pote es cambiada a verbos transitiva e causal par move la sujeto a la loca de la ojeto e ajunta un sujeto nova. Per esta razona, los es nomida "verbos ergativa" en lfn.
- La acua ia boli
- Me ia boli la acua
Simil, on pote fa verbos transitiva deveni refletante par ajunta se, me, etc:
- Me lave me
- El ama se
Comandas es indicada par cade la sujeto:
- Vade!
- Boli la acua!
Verbos cual no ave sujetos clar, como verbos de clima, nesesa un "pronom pupetin", como lo o on:
- Lo neva
- Lo va pluve
- Lo es tro calda en esta sala
- Lo pare ce tu es coreta
- On no ave pexes en esta lago
- On ave multe persones asi oji
Verbos pote es cambiada a ajetivos: La partisipio ativa es formida par ajunta -nte a la verbo. Per esemplo, come deveni comente. Esta debe es nunca usada como un nom astrata, como en engles e otra linguas.
La partisipio ativa pote segue la verbo es e es usada per espresa acel cual en otra linguas es la aspeta continuante (nonperfetiva), cual asentua la idea ce la sujeto es en la media de un ata o prosede:
- Nos ia es comente cuando la tempesta ia comensa
La partisipio pasiva es formida par ajunta -da a la verbo. Per esemplo, come deveni comeda. Esta debe es nunca confusada con la tempo pasada, como en engles en otra linguas.
La partisipo pasiva pote ance segue la verbo es e es usada per espresa la vose pasiva:
- Si los no es cauta, los va es comeda par selacos
Nota ce on ave otra modos per espresa la continuante e la pasiva:
- Nos continua come selaco
- Me trema ancora de la pluva fria
- Algun va come nos
- On pote cambia verbos a ajetivos
Verbos pote es usada como nomes sin cambia. Per esemplo, dansa es un verbo, ma un dansa e la dansa es nomes. Sin la article, la parola servi como un infinitiva o jerundio: Dansa es bon. Esta forma es ance usada cuando un verbo segue un verbo presedente: Me vole dansa.
En lfn, verbos vade frecuente en duples. La prima es un verbo de disposa. Comun esemplos de verbos de disposa es:
- atenta
- debe
- esita
- espera
- espeta
- finje
- menasa
- nesesa
- osa
- pare
- pote
- prefere
- sabe
- teme
- vade
- vole
La verbo seguente es en se forma la plu simple:
- Me va atenta vola doman.
- On debe brosa la dentes a cada dia.
AjetivosEdit
Ajetivos segue la nom cual los altera, con du esetas: Bon e mal pote vade ante la nom, car los es frecuente usada. Ajetivos en lfn no acorda con se nomes, e no ave formas diferente per seso o pluralia.
Per comparas, on usa plu o min. Per indica la superioria e la inferioria, usa la plu e la min:
- Jan es plu bon ca Jo.
- Ma Jil es la plu bon.
Egalia es indicada par tan... como:
- Marco es tan grande como Mona.
Como verbos, ajetivos pote es usada como nomes. Per esemplo, bela es un ajetivo, ma un bela es un nom, e un corti per un bela person o simil. Esta opera ance con partisipios. Per esemplo, un person ci studia es un studiante, e la cosa studiada es la studiada.
Un ajetivo pote es cambiada a un nom astrata par ajunta -ia. Esta pote ance es usada per nomes:
- bela > belia
- madre > madria
AverbosEdit
Lfn no ave un modo per marca averbos. En loca, cualce ajetivo pote es usada como un averbo par pone el pos un verbo o a la comensa de la frase. Averbos cual altera ajetivos presede la ajetivo. On ave ance averbos cual no es derivada de ajetivos. Asi es esemplos de averbos comun:
- ala
- alora
- an
- ance
- ancora
- aora
- apena
- asi
- bon
- doman
- donce
- ier
- ja
- lenta
- mal
- no
- nunca
- oji
- pronto
- rapida
- sempre
- tarda
- tempora
- temprana
- tro
- vera
PreposadasEdit
Preposadas es poneda ante la nom o formula de nom, e la formula de preposada es poneda pos la nom alterada o, si la formula preposada es usada como un averbo, pos la verbo o a la comensa de la frase. Ave 22 preposadas simple en lfn:
- a
- ante
- asta
- ca
- como
- con
- contra
- de
- en
- entre
- estra
- longo
- par
- per
- pos
- sin
- sirca
- su
- supra
- sur
- tra
- ultra
Alga partisipios pote ance es usada como preposadas:
- consernante (sur)
- escluinte (sin)
- esetante (estra)
- incluinte (con)
- seguente (pos)
- traversante (tra)
Multe preposadas pote es usada como averbos par ajunta a o de ante los. Per esemplo:
- a su
- de supra
- a estra
- a en
- a pos
- de ante
ConjuntasEdit
Lfn ave alga juntas simple:
- e
- o
- ma
- e... e...
- o... o...
- no... no...
Per esemplo:
- Luis e me vole vade, ma Maria vole resta asi.
- No Luis no Maria vole vade, donce me no vole vade ance.
DemandasEdit
Lfn ave alga parolas e espresas cual es usada per introdui demandas:
- cual
- ci (cual person)
- ce (cual cosa)
- de ci
- como (en cual modo)
- cuanto (de cual cuantia)
- cuando (a cual tempo)
- do (a cual loca)
- perce (per cual razona, par cual causa)
(La plu de estas es ance usada per pronomes e averbos de relata e sujuntas, discuteda a su.)
Per esemplos:
- De ci es esta libro?
- Cuanto on paia per lete asi?
- Cual auto tu gusta la plu?
- Perce tu no gusta esta?
- Cuando tu espeta ce el ariva?
On pote pone la parola de demanda a la comensa de la frase, o en la loca do la responde ta es:
- Do vos ia dansa? = Vos ia dansa do?
- Ce tu ia dise? = Tu ia dise ce?
Demandas pote inclui un de esta parolas, o pote es sola indicada par un tono asendente en la parola final de la frase. On pote ance espresa demandas par comensa la frase con la particula de demanda esce, o par ajunta si o no a la fini de la frase, pos un virgula. En scrive, los es sempre segueda par la marca de demandas (?):
- Como on construi un casa per avias?
- Tu vole dansa?
- Esce tu parla Deutx?
- Tu parla Italian, no?
- Tu gusta cafe, si?
Proposas ajetival Edit
Ave du pronomes de relata, cual introdui proposas ajetival:
- cual (per cosas)
- ci (per persones)
La proposas ajetival segue la nom o formula de nom cual los altera:
- La fem ci me ama veni de Frans.
- La robot cual me ia construi no opera.
A alga veses, la nom ante "cual" o "ci" no es indicada. En esta casos, lo es plu bon ce on introdui "lo", "el", o "los" ala:
- Me vide lo cual me gusta.
- Tu vide el ci fura la tu mone?
Pronomes de relata pote es presededa par preposadas:
- La cosa per cual me espera la plu es un bisicle nova.
- La fem de ci nos parla labora a me ofisia.
- La xico de ci nos ia salva se can ia es multe grasios.
Do e cuando es ance usada per introdui proposas ajetival:
- Esta es la site do me vole abita.
- Me ia vade ala en la anio cuando me ia fini me studias.
Proposas averbalEdit
Esta sujuntas introdui proposas averbal:
- si
- afin
- car
Proposas averbal segue normal se proposa major:
- Me ta pote vade si me ia ave un auto.
- Me no teme la can car el es multe peti.
- Me core afin la rinoseros no catura me.
Alga averbos es ance usada como sujuntas:
- como
- do
- cuando
- cuanto
Per esemplo:
- La lupos cria cuando los vide la luna
- Me vole abitua do la clima es bon
- Me vive como me vole vive.
- E me come cuanto me gusta.
Do e cuando pote es presededa par preposadas:
- pos cuando
- ante cuando
- asta cuando
- de cuando
- en cuando
- a do
- de do
Per esemplo:
- El ia pote sci ante cuando el ia pote pasea.
- Me gusta escuta a la radio en cuando me labora.
Proposas nomalEdit
Ce es usada como un sujunta per introdui un proposa nomal, cual segue plu comun pos la verbo como la ojeto de esta verbo:
- Me pensa ce el es bela.
- El ia dise ce tu auto es fea.
- La gato entra la sala sin ce algun vide el.
Construis alternativa permete asentuas de sinifia diferente:
- El senti ce la bebe colpa.
- El senti la bebe colpante.
- El senti la colpa de la bebe.
Ci e cual es ance usada per introdui proposas nomal:
- Me no pote recorda ci me es.
- El sabe cual me desira per natal.
Ave ance ses averbos cual pote introdui proposas nomal:
- Me no sabe cuando me va parti.
- Me sabe de do tu veni.
- Me no gusta como el parla.
- Me comprende perce tu odia el.
- Me no recorda cuanto me ia come.
- Me demanda a me esce el ama me.
NumerosEdit
- 1 – un
- 2 – du
- 3 – tre
- 4 – cuatro
- 5 – sinco
- 6 – ses
- 7 – sete
- 8 – oto
- 9 – nove
- 10 – des
Numeros plu grande es construida como esta:
- 11 – des-un
- 20 – dudes
- 100 – sento
- 101 – sento-un
- 321 – tresento-dudes-un
- 1000 – mil
- 45 678 – cuatrodes-sinco mil sessento-setedes-oto
- 1 000 000 – milion
- 1 000 000 000 – mil milion
Numeros cual espresa la ordina de cosas es la mesma, ma los segue la nom, per esemplo la om tre en loca de la tre omes. Per usa numeros ordinal en comparas, lfn usa construis como el es la stela tre en brilia o el es la stela tre la plu briliante.
Fratos es construida con -i, per esemplo dui, tri, cuatri,... desi, senti, mili, etc. Mutiples e grupos pote es indicada par usa -uple, como duple, etc.
Afisas Edit
Lfn ave alga afisas coerente per aida en la crea de parolas nova.
La sufisas la plu comun es -or, -ador, e -eria, cual refere a un person, un util, e un loca, en esta ordina. Los pote es ajuntada a nomes, ajetivos, o verbos. Per esemplo:
- carne + -or > carnor
- carne + -eria > carneria
- lava + -eria > laveria
- lava + -ador > lavador
Un otra sufisa usos es -i cual, ajuntada a un ajetivo e alga nomes, sinifia "deveni" o "causa deveni". El es ance usada con la nomes de utiles per sinifia la usa de la util. Per esemplo:
- calda + -i > caldi
- telefon + -i > telefoni
Du plu sufisas comun es -eta, cual sinifia un varia peti de alga cosa, e -on, cual sinifia un varia grande. An tal, los no es simple sinonimes per "peti" e "grande"! Per esemplo:
- bove + -eta > boveta (la enfante de boves)
- tela + -on > telon (un tela grande per la leto o la table)
Ave alga sufisas cual cambia nomes a ajetivos: -al sinifia "pertinente a...", -in sinifia "simil a...", e -osa sinifia "plen de...". Per esemplo:
- nasion + -al > nasional (pertinente a la nasion)
- serpente + -in > serpentin (como un serpente)
- mofo + -osa > mofosa (plen de mofo)
Otra sufisas inclui -able, -isme, e -iste.
Lfn ave ance tre prefisas comun. Non- sinifia "no....", re- sinifia "denova" o "en la dirije oposante", e des- sinifia "revade a la state orijinal". Per esemplo:
- non- + felis > nonfelis
- re- + pone > repone
- des- + infeta > desinfeta
Otra prefisas inclui pos-, pre-, supra-, su-, media-, vis-, e auto-.
Parolas pote ance es creada par junta du parolas esistente. La plu de parolas composada es construida de un verbo e se ojeto:
- porta + candela > portacandela
- pasa + tempo > pasatempo
- para + pluva > parapluve
Simil, bon e mal pote es juntada a otra parolas:
- bon + dise > bondise
- mal + dise > maldise
Du nomes es rara juntada, ma es liada par de o otra preposadas:
- avia de mar
- casa per avias
- xef de polisia
Lfn ave esetas a esta regula. En un caso, la nom du refere a la mesma cosa como la prima, ma es plu esata:
- la serpente boa
- la nasiones membros
En la otra caso, la du nomes es egal e los es juntada par un sinia de junta:
- la produor-diretor
Leteratur Edit
De se crea, Lingua franca nova ave leteratur con testos orijinal e traduida.
Multe testos ia es traduida a Lingua Franca Nova:
- Colinas como elefantes blanca, par Ernest Hemingway; Traduida par Daniel Alegrett, 1999
- La cade de la Casa de Usor, par Edgar Allan Poe; Traduida par Simon Davies, 2008
- Jigante egoiste, par Oscar Wilde; Traduida par Simon Davies, 2008
- La prinse peti, par Antoine de Saint Exupéry; Traduida par Simon Davies, 2009
- Alisia en la pais de mervelias, par Lewis Carroll; Traduida par Simon Davies, 2010
- Un canta de natal, par Charles Dickens; Traduida par Simon Davies, 2010
- Leteras de la tera, par Mark Twain; Traduida par George Boeree, 2010.
La aventuras de Alisia en la pais de mervelias es la publica prima de un nara tota en lfn.
EsemplosEdit
La Preambul a la Declara Universal de Diretos UmanaEdit
Car la reconose de la dinia inerente e la diretos egal e nonalienable de tota la membros de la familia umana es la funda de libria, justia, e pas en la mundo;
Car la nonconose e la despresa de la diretos umana ia porta atas de barbaria cual ofende la consiensa de umania, e car la veni de un mundo do la esentes umana va es libre per parla e crea e librida de temia e de miseria, es proclamada como la aspira la plu alta de esentes umana;
Car es esensal ce la diretos umana es protejeda par un sistem de diretos, afin no person es forsada, como un recurso ultima, a la rebelia contra tirania e oprimi;
Car es esensal promove la developa de relates bonvolente entre nasiones;
Car en la Carta, la poplas de la Nasiones Unida proclama se fide en la diretos umana fundal, en la dinia e la valua de la person umana, en la egalia de diretos de omes e de femes, e car los ia deside promove la progresa sosial e leva la cualia de vive con un libria plu completa;
Car la statos cual es membros promete securi, en coopera con la Nasiones Unida, la respeta e la oserva universal de diretos umana e libria fundal;
E car un conseta comun de esta diretas e librias es la plu importante per la completi plen de esta promete -
La Asemblea Jeneral
Proclama esta Declara Universal de Diretos Umana como un ideal comun per la aspira de tota la poplas e nasiones, afin cada person e cada organo sosial, con esta Declara en mente constante, va promove la respeta de esta diretos e librias par eleva e instrui, e par mesuras progresante, e nasional e internasional, va securi la reconose e aplica universal e produinte, ambos entra la poplas de la statos membro e entra la teritorios su se autoria legal.
Alisia en la pais de merveliasEdit
Alisia comensa deveni multe noiada, sentante a lado de se sore sur la colineta, con no cosa per ocupa se: a un o du veses, el ia regardeta en la libro cual se sore leje, ma lo conteni no pitures o conversas, “e ce es la valua de un libro,” Alisia pensa, “sin pitures o conversas?”
Donce el es considerante, en se mente propre (tan bon como posible, car el senti multe dormosa e stupida par causa de la dia calda), esce la plaser de crea un cadena de margaritas ta compensa per la labora de leva se e colie la margaritas, cuando subita un Coneo Blanca con oios ros pasa corente a se lado.
No parte de esta es vera multe notable; e Alisia no trova ce es vera multe estracomun cuando el oia la Coneo dise a se: “Ai! ai! me va es tro tarda!” (cuando Alisia contempla esta a pos, pare a el ce el ia debe mervelia a lo, ma aora, a la momento de aveni, tota pare intera natural); ma, cuando la Coneo prende an un orolojeta de se pox de jaceta, e regarda lo, e alora continua freta, Alisia salta sur se pedes, car la pensa vola tra se mente ce el ia vide ja nunca un coneo con o un pox de jaceta, o un orolojeta prendable de lo, e con curiosia ardente, el core pos lo en traversa de la campo, e ariva a la bon tempo per vide lo desapare su la sepe en un tunel grande de coneo.
En la momento seguente, Alisia entra pos lo, no considerante an pico como posible el va sorti denova.
LiasEdit
- Fisahn, Stefan (2005) Plansprache: Lingua Franca Nova. Contraste, 244, p. 12.
- Harrison, Richard H. (2008) Lingua Franca Nova. Invented Languages, 1, pp. 30 –33.
- Paje orijinal de lfn
- Disionario lfn-engles
- Omniglot article
- Article a la wikipedia engles
- Aprende lfn oji!
