Un lingua creada (o lingua artifisial, o lingua construida) es un lingua de cual la fonolojia, la gramatica, e/o la vocabulo ia es construida par un person o grupo en loca de evolui natural. En la interrede, on refere comun a linguas creada como conlangs (de engles: "constructed languages").

Ave multe modas per categori linguas creada. Per esemplo, on pote distingui entre linguas a priori e linguas a posteriori. La linguas a priori ("a ante" en latina) es creada denova, de la imajina de la autor o par computa. La linguas a posteriori ("a pos" en latina) ave gramatica e vocabulo derivada de linguas natural.

La linguas a posteriori pote es divideda entre linguas scemal e linguas naturin. Linguas scemal ave un vocabulo e/o gramatica cual es alterada per conveni con un scema creada denova. Linguas naturin reteni un vocabulo e/o gramatica cual reteni un sona e pare plu como linguas natural.

Final, on pote categori linguas creada par intende:

• Linguas lojical - pe, loglan, lojban, etc.
• Linguas filosofial - pe, la linguas creada par filosofistes como Francis Lodwick (1647, 1652), Thomas Urquhart (1651, 1652), George Dalgarno (1661), John Wilkins (1668), e Leibniz (1678).
• Linguas esperimental - pe, Láadan , toki pona, e-prime, etc.
• Linguas secreta - pe, la lingua ignota de san Hildegard de Bingen e (posable) la manoscrito de Vojnich.
• Linguas de arte - pe, klingon, newspeak, la linguas creada par J.R.R. Tolkien, etc.
• Linguas aidante internasional - pe, volapük, esperanto, interlingua, lingua franca nova, etc.