Per plu sur linguistica, vade a la categoria de linguistica.

Linguistica es la studia siensal de linguas. Ave sucampos varios. Un divide importante es entre la studia de la strutur de lingua (gramatica) e la studia de sinifia (semantica e pragmatica). Gramatica inclui morfolojia (la strutur de parolas), sintatica (la strutur de proposas e frases), e fonolojia (la studia de sonas en linguas).

Otra sucampos de linguistica inclui: la evolui de lingua, cual esplora la posable orijines de lingua; linguistica istorial, cual esamina la cambia de linguas tra tempo; sociolinguistica, cual esamina la usa sosial de lingua; psicolinguistica, cual esplora la relata de lingua e mente; neurolinguistica, cual esamina como lingua opera en la serebro; la aprende de lingua, cual esamina como enfantes developa se capasias de parla e comprende; e la analise de parla, cual studia la conversa e testos.