Mercurio es la planeta la plu prosima a la sol en nos sistem solal, orbitante la sol en 88 dias. El es briliante cuando oservada de la Tera: se cuantia de brilia varia de sirca -2,0 a 5,5. Ma el no es fasil vidable, car la masima de se separe angulal de la sol es sola 28,3° — donce Mercurio es vidable sola a lus prima e lus final.

On no conose bon la planeta. La prima de du veculos spasial ce ia visita la planeta ia es Mariner 10, ce ia mapa sola sirca 45% de la surfas de la planeta de 1974 a 1975. La veculo du, su la nom MESSENGER, ia mapa 30% de plu en janero 2008.

Mercurio aspeta simil a la Luna, con multe crateres. El ave no lunas e no atmosfera. La planeta ave un cor de fero ce jenera un campo magnetal con sirca 1% de la potia de la campo magnetal de la Tera. La temperatur de la surfas varia de sirca 90 a 700 K: la punta direta su la sol es la plu calda, e la fondo de crateres a la polos es la plu fria.

La romanes ia noma la planeta pos la dio Mercurio, probable car la planeta move rapida en la sielo de la prima lus. La simbol de Mercurio es de la testa de la dio, en se elmo con aletas, supra se basto: un simbol antica de astrolojia.

Ante la sentenio 4 AEC, astronomistes elinica ia crede ce la planeta es du ojetos diferente: la un vidable sola a leva de sol, e la otra — sola a reposa. La poplas xines, corean, japanes e viet noma la planeta "la stela de acua", pos un de la sinco elementos clasica.

La sistem solal		model
Planetas:	Mercurio | Venus | Tera (Luna) | Marte | Jupiter | Saturno | Urano | Netuno
Planetas nana:	Ceres | Pluto | Eris
Otras:	Sol | Stela | Sintur de Asteroides | Galasia | Nebla de stelas | Esplode Orijinal