FANDOM


Comun, on introdui un nom (o sustantivo) con determinantes, e pote segue lo con ajetivos e formulas de preposada, per produi un formula nomin. Nomes tipal indica ojetos fisical como persones, locas, e cosas – ma nomes pote indica ance consetas plu astrata cual condui simil en gramatica.

Plural

On ajunta -s a un nom per plurali lo. Si la nom singular fini con un consonante, on ajunta -es en loca. La sufisa plural no cambia la asentua de la parola:

  • gato, gatos
  • om, omes

Un ajetivo cual descrive un nom no cambia cuando la nom es plural. Ma cuando on usa un ajetivo como un nom, on pote plurali lo:

  • la bones, la males, e la feas
  • multe belas

Alga nomes cual es plural en alga linguas es singular en elefen:

  • El regarda un sisor con un binoculo.
  • On usa un bretela per suporta sua pantalon.
  • Me ia compra esta oculo de sol en Nederland.

Nomes contable e noncontable

Como multe linguas, elefen distingui nomes contable e noncontable. Un nom contable pote es descriveda con un numero, e pote aseta la -s pluralinte. La nomes contable la plu tipal representa ojetos cual es clar cosas individua, como casas, gatos, e pensas. Per esemplo:

  • un auto; la autos; cuatro autos
  • un gato; multe gatos; un milion gatos

En contrasta, nomes noncontable (nomida "nomes de masa" a veses) no aseta jeneral la -s pluralinte. La nomes noncontable la plu tipal indica masas cual no ave individuas clar, como licuidas (acua, jus), polvos (zucar, arena), sustantias (metal, lenio), o cualias astrata (belia, lentia). Cuando on descrive los con un parola de cuantia, on ajunta frecuente un unia de mesura per claria. Per esemplo:

  • la acua; alga acua; tre tases de acua
  • lenio; multe lenio; du pesos de lenio

An tal, on pote usa nomes noncontable en un modo contable. Los indica alora esemplos o casos individua:

  • Du cafes, per favore.
  • Me ia proba multe cesos.
  • On no pote compara la belias de Paris e Venezia.

Seso

Normal, nomes no indica sua seso. Per distingui la sesos, on usa la ajetivos mas e fema:

  • un cavalo mas
  • un cavalo fema

Ma en alga parolas per relatadas de familia, on distingui la femas con -a e la mases con -o:

  • ava, avo
  • fia, fio
  • neta, neto
  • sobrina, sobrino
  • sposa, sposo
  • tia, tio
  • xica, xico

On ave ance alga duples cual usa parolas diferente per la du sesos:

  • dama, cavalor
  • diva, dio
  • fem, om
  • madre, padre
  • rea, re
  • seniora, senior
  • sore, frate

La sufisa rara -esa formi la varias fema de alga roles sosial en istoria:

  • abade, abadesa
  • baron, baronesa
  • conte, contesa
  • duxe, duxesa
  • imperor, imperoresa
  • marci, marcesa
  • prinse, prinsesa
  • tsar, tsaresa

Formulas nomin

Un formula nomin conteni un nom e sua descrives: determinantes, cual presede la nom, e ajetivos e formulas de preposada, cual segue lo.

La du formulas nomin la plu importante en un frase es la sujeto e la ojeto. La sujeto presede la verbo, e la ojeto segue la verbo. Otra formulas nomin es usual introduida par preposadas per clari sua rol.

Un formula nomin nesesa normal un determinante – cisa sola -s, la sufisa pluralinte. Ma esta regula no aplica a nomes propre, a la nomes de dias de semana, menses, e linguas, e a nomes noncontable:

  • Desembre es calda en Australia.
  • Nederlandes es me lingua orijinal.
  • Me gusta pan.

On laxi frecuente la regula ance cuando un formula nomin segue un preposada, spesial en espresas fisada:

  • El es la comandor de polisia.
  • Me no gusta come bur de aracide.
  • Nos vade a scola.
  • Acel es un problem sin solve en matematica.
  • Un virgula pare nesesada per claria.

Un ajetivo o determinante pote es descriveda par un averbo presedente. Car averbos aspeta como ajetivos, on separa normal plu ca un ajetivo con virgulas o e. En parla, la ritmo de la frase clari la difere:

  • Sola un poma multe putrida ia resta.
  • Me ia encontra un fem bela intelijente.
  • Me ia encontra un fem bela, joven, e intelijente.

A veses, un nom es sola un simbol per cualce membro de sua clase. En tal casos, lo no es multe importante esce on usa la o un, o esce la nom es plural o singular:

  • La arpa es un strumento musical.
  • Un arpa es un strumento musical.
  • Arpas es strumentos musical.

Un pronom es un caso spesial de un formula nomin. Normal, on no pote ajunta un descrive a un pronom.

Aposa

On dise ce du formulas nomin es en aposa cuando la un segue direta la otra, e ambos refere a la mesma person o cosa. En la plu casos, la formula du identifia la person o cosa:

  • la rio Amazon
  • la mar Pasifica
  • la isola Skye
  • la Universia Harvard
  • la Funda Ford
  • Re George 5
  • San Jacobo major
  • Piotr la grande
  • me ami Simon
  • la parola "inverno"
  • la libro La prinse peti
  • un arbor eucalipto

Acronimes e leteras simple pote segue direta un nom per descrive lo:

  • La disionario es ance disponable como un fix PDF.
  • El ia porta un camisa T blu de escota V.

A alga veses, du nomes conveni egal a un cosa o person. En esta casos, la nomes es juntada par un ifen:

  • un produor-diretor
  • un primador-scanador

En tota casos, la plural -s o -es es ajuntada a ambos nomes:

  • la statos membros
  • produores-diretores

Un caso spesial pertine a la verbo nomi:

  • Nos ia nomi el Orion.
  • Me nomi esta forma un obelisce.