Platon
From Vici de LFN
Platon (437–347 aec) ia es la studiante la plu importante de Socrates. De un familia rica e potios, se nom real es Aristocles. Platon es un nometa ce referi a se spalas larga. Cuando el ave sirca dudes anios, el es encantada par Socrates e deside promete se a la filosofia. Cuando Socrates mori, el es ruinada, e comensa vaga sirca Elas e la Mediteraneo, e es caturada par piratas. Se amis colie monetas per salva el de sclavia, ma el es librida sin la monetas. Donce se amis compra un imobila poca per comensa un scola — La Academia, fundada en 386 aec.
La Academia ia es simil a la comunia de Pitagoras — un tipo de frateria parente relijios, do omes joven e rica studia la matematica, la astronomia, la lege, e la filosofia. La Academia no costa, ma depende total de donadas. Seguente se ideales, Platon permete ance ce femas partisipa! La Academia deveni la sentra de aprende elinica per cuasi un milenio.
Es clar ce Platon ia es un idealiste e un razoniste, multe como Pitagoras, ma multe min mistica. El divide la realia en du partes: a la un lado, nos ave ontos onta (ideas o la ideal). Esta es la realia esensal, eternal, spirital. A la otra lado, nos ave fenomena, ce es la realis de la ideal. Fenomenas es la pares, la cosas como los apare a nos, e es asosiada con la materia, la tempo e la spasio.
Fenomenas es alusinas ce putri e mori. Ideales es noncambiante, perfeta. Fenomenas es vera inferior de ideales! La idea de un triangula — la matematica de el, la forma o la esensa de el — es eternal. Cualce triangulas individua, la triangulas de la mundo de la esperia dial, es nunca vera perfeta: Los pote es un poca curva, o la linias un poca spesa, o la angulas no esata… Los pote sola prosimi acel triangula perfeta e ideal.
Ideas es otenable sola par pensa; fenomenas es otenable par nos sensas. Donce, per Platon, pensa es multe superior per oteni la veria. Esta fa de Platon un razoniste, e no un empiriciste, en la epistemolojia.
La sensas pote sola dona a nos informas de la mundo de fenomena nonperfeta e eterna cambiante, e donce sola la sujestes de la realia ultima, e no la realia mesma. Razona vade direta a la idea. Nos pote "recorda" o reconose la veria par nos intui, como Socrates dise en la conversa Menon.
Seguente Platon, la mundo fenomenal labora per deveni ideal, perfeta, completa. Ideales es, en esta sensa, fortias motivante. En fato, Platon dise ce la ideal es la mesma como la Dio e la bonia perfeta. La Dio crea la mundo de materia e forma la mundo en acorda con se desinia — la ideas o la ideal. Si la mundo no es perfeta, esta no es par causa de la Dio o la ideales, ma car la materia cru no es perfeta. On pote vide per ce la eglesa crististe prima ia deside ce Platon deveni un crististe onoral, mesma si el ia mori a tre e un di de sentenios ante Cristo!
Platon aplica esta mesma dualisme a la umanas: La corpo es material, mortal e moveda (un vitima de causa); la spirito es ideal, nonmortal e nonmoveda (capas de vole libre).
La spirito inclui la razona, serta, e ance la consensia de se e un sensa moral. Platon dise ce la spirito cambia sempre per es bon, si el reconose la bonia. Esta conseta de bonia e malia es simil a acel de la budistes: La malia no es un peca, ma un problem de iniora o nonconsensia. Donce, on nesesa instrui, e no puni, un person ci fa mal.
La spirito es atraeda a la bonia, la ideal, e en esta modo es atraeda a la Dio. Nos move en grados sempre plu prosima a la Dio par nos vives individua e par rencarni. Nos gol moral en la vive es deveni plu simil a la Dio, deveni plu prosima a la mundo pur de ideas e ideales, librinte nos de la materia, la tempo e la spasio. Nos gol es, en otra parolas, autoreali.
