Spondilite ancilosante

Spondolite ancilosante (de la elenica ankylos - curvada, e spondylos - vertebra), ance conoseda como la maladia o sindrom de Bexterev, es un maladia autoimune e un artrite inflamante. El afeta plu la juntas en la spina dorsal e la sacroilio en la pelvis, e pote causa fusa de la spina. El es un membro de un grupo de spondiloartropatias con un disposa jenetical forte. Tota fusa resulta con tota rijidia de la spina, un caso conoseda como spina de bambu.

La pasiente tipal es un om joven, de 20 a 40 anios cuando la sintomes apare prima, con dole cronica e rijidia en la spina basal o, en alga casos, la spina completa, multe veses con dole cual es refereda a un o la otra gluteo o dorsa de la coxa de la junta sacroilial.

Omes ave esta maladia plu ce femes par un proportio de 3:1, e la maladia causa plu dole en omes ce femes. En 40 % de casos, spondilite ancilosante es asosiada con un inflama de la oio (iridosiclite e uveite), cual causa rojia, dole en la oio, perde de vide, flotantes, e fotofobia. Un otra sintom comun es fatiga jeneral e, a alga veses, nausea. Min comun, on pote sufre de aortite, fibrose de la pulmon apical, e ectasia de la gainas de la radises de la nervos sacral.