FANDOM


Un enfante nonmundal
123456789101112

3. La TardisEdit

Barbara Wright e Ian Chesterton sta e regarda noncredente sirca se, car sua serebros refusa aseta la atesta de sua oios e oreas.

Vera, los ta debe trova se en un spasio ensircada tan peti como un armario – ma lo no es tal. En loca, los sta a interna de un controleria grande e briliante luminada. Lo es dominada en la sentro par un strutur multiladal cual pare ave un cuantia de paneles de strumentos, posada sirca un colona diafana sentral cual conteni un fola de macinetas complicada. La plu strana de tota es la ojetos nonarmoniosa, acaso locada asi e ala. Los inclui un cuantia de sejas de modo pasada, e un sculta de alga spesie de avia sur un colona alta. Susan sta a lado, regardante los con stona completa.

Ian ginia, noncapas de crede, e sua mente pleni con un sensa arancante de nonrealia. El oia la vea dise calma – “Clui la porte, Susan.”

Susan toca un boton sur la consol sentral, e la porte clui con un strana zumbi eletronical.

La vea desapone sua capa e xapo, e lansa los sur un seja. La vestes a su es an plu bizara: un pantalon de cuadros con botas anticin, e un spesie de jaca longa cual el porta con un tela de colo e un colar alta e aletin. La efeto jeneral sembla lo de un avocato de familia en alga novela de la sentenio des-nove. Como la sculta e la sejas cuxinida, la vea aspeta strana nonconveninte en esta situa de tecnolojia estrema.

Ma lo es evidente ce el senti tota comfortosa asi. Frotante sua manos ososa, el regarda desaprobante la du intruores. “Me crede ce esta persones es conoseda a tu, Susan?”

“Los es du de mea enseniores de scola.” Susan pare cuasi tan stonada como Barbara e Ian. “Perce vos es asi?”

“On pote suposa ce los ia segue tu.” – la vea dise asida. “Acel scola riable! Me ia es serta ce un tal cosa va aveni si nos ta resta tro longa en un loca.”

“Ma perce los ta segue me?”

“Demanda a los.” – la vea dise. El turna a via per studia un linia de strumentos sur la consol sentral.

Barbara regarda asi e ala en la sala stonante, e a pos denova Susan. “Esce esta loca es vera tua casa, Susan?”

“Si… o, a la min, lo es la sola casa cual me ave aora.”

La vea leva sua regarda. “E me tolera no critica de lo.”

Ian frota sua oios e ginia – ma la situa no cambia. “Ma lo ia es mera un ciosco.”

La vea surie. “A vos, cisa.” – el dise condesendente.

Barbara dise – “E esta senior es tua avo?”

“Si.”

Barbara turna a la vea. “Donce me suposa ce tu es Dotor Foreman?”

La vea surie. “No vera. La nom ia es scriveda sur la portones, e me ia empresta lo. Cisa lo va es plu bon si vos refere a me como ‘Dotor’, simple.”

“Oce, multe bon – Dotor. Perce tu no ia clari a nos tua identia?”

“Me no discute mea vive privata con nonconosedas.” – la Dotor dise egosa.

Ian luta ancora per comprende la misterio sentral. “Ma lo ia es vera mera un ciosco! Me ia pasea sirca lo. Barbara, tu ia vide me. Como lo es posible ce sua interna es plu grande ca sua esterna?”

“Vos merita no esplicas.” – la Dotor dise malumorosa. “Vos ia entra noncortes, noninvitada, e nonbonvenida…”

“Ma un momento, per favore.” – Ian dise ostinosa. “Me sabe ce esta es asurda. Lo ia es mera un ciosco, me ia pasea sirca lo. Vera, me no comprende…”

La Dotor esamina un de la strumentos. “Vide esta, Susan.” – el dise cexante. “Lo ia fali denova. Me ia atenta repara lo, ma…” El interompe se, lansante un regarda malvolente a Ian. “No, natural, vos no comprende. Como vos ta pote?”

“Ma me vole comprende!” Ian cria.

La Dotor jesti el a via. “Si, si… En pasa, Susan, me ia susede trova un recambia per acel fileta defetosa. La xerca ia es longa, ma me opina ce lo va opera…”

Ian bate la mures de la sala con sua punios. “Esta es un ilude, evidente.”

La Dotor suspira. “Sur cual on babela aora?”

“Ian, cual tu fa?” – Barbara xuxa.

“Me no sabe.” – Ian dise, descapasida.

La Dotor surie vil a la confusa de Ian. “Tu no comprende, donce tu xerca escusas per usa. Un ilude, ha! Vide, mea joven. Tu dise ce on no pote pone un spasio grande en un spasio peti? Donce on no ta pote pone un construida enorme en un sala peti?”

“No.” – Ian dise. “Lo es tal, on no pote.”

“Ma vos ia inventa ja la televisa, no?” la Dotor dise.

“Si.”

“Alora – par mostra un construida enorme sur un scermo de televide, on pote fa un cosa cual, en tua opina, es tota nonposible, no?”

“Ma bon, en alga sensa.” – Ian dise con duta. “Ma an tal…”

La vea cacara en vinse. “Lo no es intera clar, si? Me vide en tua fas ce tu no es serta, tu no comprende. Me ia sabe ce lo va es tal. Ma lo no importa!” La Dotor pare plen deletada par la noncomprende de Ian. El bricoleta a la consol, murmurante a se. “Ma do es acel boton? Esta – no, esta asi.” El leva sua regarda a Ian e Barbara. “La demanda xef no es esce vos comprende lo cual aveni ja a vos, ma lo cual va aveni a vos. Vos ta pote informa la mundo sur la barcon – ma me no va permete lo.”

“Barcon?” Ian dise, aora an plu confusada.

“Si, barcon.” – la Dotor dise agu. “Esta cosa no rola sur rotas, sabe.”

“Tu vole dise ce lo pote viaja?” Barbara demanda.

Orgulosa, Susan acorda con sua testa. “La Tardis pote viaja a cualce parte de tempo o spasio.”

“Tardis? Me no comprende tu, Susan.”

“Bon, me ia inventa la nom, en fato. ‘Tardis’, de la leteras prima de ‘Tempo a relata de interfas spasial’. Vos no comprende? La dimensiones interna difere de los a esterna.”

Ian enspira profonda. “Ta ce me clari a me. Un cosa cual sembla un ciosco de polisia sta en un bricabraceria… e lo pote viaja tra tempo e spasio?”

“Si.” – Susan dise.

“Intera tal.” – la Dotor confirma rapida.

“Ma acel es riable!”

Susan regarda angusada la vea. “Perce los no vole crede nos?”

“Ma como nos pote?” Barbara dise pasiente. “La idea es tan clar nonposible.”

Susan piafa sua pede con frustra, e la Dotor cacareta.

“Ma no deveni coler, Susan. Recorda la american orijinal cuando el ia vide prima un tren de vapor – sua mente primitiva ia crede probable ce el vide ance un ilude!”

“Tu trata nos como stupidas.” – Ian dise amarga. “Stupidas o enfantes!”

La Dotor presenta sua surie iritante superior. “Vera? La enfantes de mea sivilia ta senti insultada!”

Tua sivilia?”

“Si, mea sivilia. Me tolera esta sentenio, ma lo no plase me. Esce tu ia pensa an a la vive de vagores en la dimension cuatro, mea joven? Imajina lo? De escluidas! Susan e me es separada de nosa propre sivilia, sin amis e proteje, ma nos va revade a alga dia.” El regarda fisada la distante. “Si, a alga dia… alga dia…”

Cisa la mente umana pote aseta sola un cuantia limitada de surprendes a un ves. A esta revela nova, Barbara e Ian intercambia regardas de noncrede intera.

“Lo es vera!” – Susan esclama desperante. “Tota es vera! Vos no sabe lo cual vos ia fa en veni asi.” El turna a la Dotor. “Avo, permete ce los parti aora, per favore. Los no pote perili nos. Me conose esta persones – sua mentes rejeta la cosas cual los no comprende. Los no va reporta la aveni, e, an si los ta atenta, nun ta crede los.”

La fas de la Dotor es subita fria e dur. “No.”

“Tu no pote reteni nos asi!” Ian dise defiante.

“Esce no?” la Dotor dise. Alga cualia de sua surie sasiada fa ce Ian senti multe noncomfortosa.

Barbara traversa a Susan e pone un braso sirca sua spalas. “Susan, escuta me. Esce tu no vide ce tota de esta es un ilude, un fantasia? Si tu prefere, lo es un jua cual tu e tua Avo fa. Tu no pote espeta ce nos crede lo ance.”

“Ma lo no es un jua,” – Susan dise desperosa – “lo no es! Me ama England en la sentenio dudes. Me ama vosa scola. La sinco menses pasada ia es la plu felises de mea vive.”

“Tu parla como si tu no es un de nos.” – Barbara dise. “Ma tu es! Tu aspeta como nos, tu sona como nos…”

La fas de Susan es seria. “Me ia nase en un otra eda, sur un otra mundo.”

“Ma escuta me, Susan.” – Ian comensa. El sesa con despera. “Veni, Barbara, ta ce nos sorti de asi.”

“Vos no pote sorti.” – Susan esclama. “El no va permete!”

Sircoveninte el, Ian freta asta la Dotor, ci sta ancora a la panel de controla. El fisa sua regarda a la labirinto de botones e indicadores.

“Susan ia clui la porte de asi – me ia vide el. Ma cual lo es, Dotor? Cual boton opera la porte?”

“Tu opina ancora ce tota es un ilude?” la Dotor demanda burlosa.

Ian grima a el. “Me sabe ce la viaja libre tra tempo e spasio es un sonia de siensa cual on no va reali en un bricabraceria!”

“Tua egosia es cuasi tan grande como tua noncomprende, mea joven!”

“Tu ta abri la porte?”

La Dotor fa denova sua cacareta burlante.

“Abri acel porte!”

La Dotor no move.

Ian regarda Susan, apelante. “Tu ta aida nos, Susan?”

El esita, ma nega con sua testa. “Me regrete, lo es proibida.”

Ian estende sua mano a la consol. “Oce, donce me va debe risca divina.”

La Dotor leva sua spalas. “Me pote apena preveni tu.”

(Susan es la sola ci vide ce la mano de la Dotor move a la consol e opera la boton securinte.)

Ian flota sua mano supra la strumentos tra un momento.

En cuando lo desende, Susan xilia – “Ma no acel, lo es comutada!”

Lo es tro tarda. Ian toca la boton defetosa, on ave un crepita de eletrica, e el es forte lansada a traversa de la controleria.

El colasa en aturdi contra la mur, e lisca a la solo. Barbara core a sua lado, cadente a jenos. El leva un regarda coler a la Dotor. “Cual de mundo tu intende fa? Ian, tu es oce?”

“Lo pare tal. Alga secuteda, mera.”

Barbara aida ce el sta.

Susan parla a la Dotor en un vose basa e urjente. “Avo, permete ce los parti aora, me prea.”

La vea nega con sua testa, enfantin ostinosa. “Ja doman, nos ta es un estravagante publica, un tema per novas e rumores!”

“Los no va parla sur nos.”

“Ma, natural los va parla, mea enfante cara! Imajina tu en sua loca. Lo es nonevitable ce los va cexa en alga modo ofisial – o, a la min, los va parla a sua amis.” El pausa impresante. “Ma si me permete ce los parti, Susan, nos va debe parti ance.”

“No, Avo.”

“Mea enfante cara, nos ave no otra posible.”

“Ma me desira resta. Vide, Avo, los es du bon persones. Perce tu no vole fida los? Tu nesesa sola convinse los a promete manteni nosa secreta.”

“Asoluta nontolerable.”

“Me no va parti, Avo. Me no va parti de la sentenio dudes.” Susan enspira profonda. “Me ta prefere parti de la Tardis – e de tu.”

Lo es clar ce la vea es forte colpada par esta menasa de Susan. “Tu deveni aora emosiosa e enfantin.” – el replica.

“Me no finje, Avo!”

“Donce bon. Ma recorda, si los parti, tu va debe acompania los. Me va abri la porte.” El traversa a la consol.

Lejerida car la malsonia pare final sesante, Barbara xuxa – “Tu va veni, Susan?”

Ma Susan oserva la Dotor. Sua manos reali un serie complicada de moves a la strumentos de controla, e la colona sentral comensa leva e cade.

“No, Avo!” – Susan xilia. “Senior Chesterton, para el! El inisia la barcon. Nos va viaja!”

Instintosa, Ian salta a traversa de la controleria, e luta con la Dotor. A ves nova, el descovre ce la vea es multe plu forte ca el aspeta. Con difisilia enorme, Ian susede tira la Dotor a via de la consol. Ma la vea torse subita en sua brasos, core a la strumentos, e funsiona lo cual es evidente un lever xef de alga spesie. La sala intera pare jira como un jireta. Ian e Barbara es lansada a la solo, e tota deveni negra…

Lo es vera conveninte ce on ave no oservor en la patio de bricabrac. Si la polisior patruliante ta visita denova a esata esta momento, el ta vide un fenomeno multe estracomun.

Lenta, con un sona strana de cruji e jemi, la ciosco blu desapare.

La Tardis viaja.

Ad blocker interference detected!


Wikia is a free-to-use site that makes money from advertising. We have a modified experience for viewers using ad blockers

Wikia is not accessible if you’ve made further modifications. Remove the custom ad blocker rule(s) and the page will load as expected.