FANDOM


Un enfante nonmundal
123456789101112

4. La nase de istoriaEdit

On ave un plano sombre e rocosa, distante bordada par montes sierin. Un rio larga e lenta flue tra la sentro de la plano, con foresta densa e nonpenetrable a sua rivas. La colinas a pede de la montes conteni cavas, e esta es la loca do la tribu abita.

En multe modos, la tribu es fortunosa. Pos cuando on ia forsa a estra la bestias savaje cual nidi los, la cavas es seca e no fria. On ave acua de la rio, frutas e bacas en la foresta. On ave ance animales xasable en la foresta: bestias savaje cual furni carne a la stomacos de la tribu, e peles per sua vestes – si on pote mata los ante cuando los mata on.

La om nomida Kal ia veni nova a la tribu, ma el es serta la plu bon de sua xasores, capas e pasiente e astuta. Kal revade nunca a la cavas sin alga corpo matada, e esta, supra tota, ia convinse la otras a aseta el.

A un dia, Kal segue trasas a la borda de la foresta, cuando el vide un miracle. El oia un sona de cruji e jemi, intera nonsimil a la ruji de cualce bestia. Cauta regardante de la borda de la foresta, Kal vide la apare majiosa de un forma strana e blu.

Multe de la tribu ta fuji en teror, ma Kal es plu intelijente ca la otras, e sua intelijentia es acompaniada par curiosia. An si sua cor bate con teror, el resta do el sta, oservante la forma blu per vide cual lo va fa. Kal desira plu ca ce sua tribu nova aseta el. El desira potia – la potia de la gidor. El desira Hur, la fem joven la plu bela en la tribu. E el desira mata Za, la fio de la xef vea, vera la sola person ci oposa forte el.

Kal fisa un regarda fame a la forma blu, tirante sua barba corta e protendente. El ave asi un cosa nova, un cosa cual, asta aora, sola el ia vide ja. Sua mente rusosa considera la nova, xercante modos de esplota lo… Si on ave asi un majia, el va trova un modo de benefica de lo.

On desira la majia ance en la cava grande sentral de la tribu. Za senta, con sua gamas crusada, ante la senes de un foco tota mor, e la tribu es asemblada sirca el en un sirculo. Omes e xicos, femes e xicas: tota regarda intensa en cuando Za tufa sua manos en la senes e teni forte la fratos negra de lenio carbonida asta cuando los ageti su la presa. Sua fas es torseda en consentra, e sua musculos es tensada con labora, como si el es ostinosa ce la bastetas mor va obedi sua vole.

Ma la senes resta fria e mor.

La xica magra e brun a sua lado produi un clicador siselida de un oso. Lo es un ojeto antica e santa, e la tribu enspira basa con stona e teme. Za secute coler la clicador a la senes, ante tufa sua manos en los a ancora un ves nova. Sua spalas afonda desperosa.

Alga distante de la resta de la tribu, un fem vea e sceletin con capeles gris senta masticante un oso. Esta es Madre Vea – la madre de Za – la acompanior de sua padre mor, Gor. Cuando Gor ia vive como la gidor, la plu bones de la comedas e peles ia veni a Madre Vea par direto. Aora on no respeta plu el. Seguente la costum de la tribu, on ta debe envia el de la cava per mori, ma alga cualia jentil en Za causa ce el permete ce sua madre vive. Alga strana, la sola resulta de esta es ce la madre despeta an plu sua fio. Za va deveni nunca un gidor como sua padre ia es. “Do es la foco cual Za crea?” el cacara.

La xica a lado de Za es nomida Hur. El ata rapida per defende el. “La foco es en sua manos, Madre Vea. Lo no va entra a la lenio.”

Za basi un regarda grimante a la senes. “Mea padre ia pote crea foco.”

Madre Vea murmura – “Si, el ia fa – e el ia mori en resulta.”

La padre de Za ia vade per xasa a un dia, e ia reveni nunca. Tal avenis no es rara. Comun, la bestia es plu rapida o plu astuta ca la xasor. En esta modo, la cuantia de persones en la tribu resta basa, e ave plu comeda per los ci vive.

“Mea padre ia mori en xasa.” – Za ronca coler.

“Gor ia es un xasor eselente. Me ia vide nunca un bestia cual ta pote destrui el. El ia coleri la dios par crea foco.”

Za regarda el en confusa coler. “El ia ensenia a me como on crea la petras agu per lansias e axas. El ia ensenia a me como on crea trapas per la urso e la tigre. El ia ta ensenia a me como on crea foco, si la bestia no ia ta mata el.”

“Afin cadun ta inclina ante tu, como nos ia inclina ante el.” – Madre Vea grima. Ma el sabe ce Za dise la veria. La secreta de crea foco es la plu jelosa gardada de tota, tradisional donada de un gidor a la seguente. Gor ia reteni tan longa como posible la secreta – un fio plen creseda pote es ance un oposor. El ia promete sempre ce, a alga dia prosima, el va ensenia a Za como on crea foco – ma el ia mori ante pote reali la promete.

Aora Za es la gidor, partal car el es la fio de Gor, ma plu car el es la geror la plu forte de la tribu. Ma la sola cualia majiosa de un gidor vera manca ancora de el – la capasia de veni foco de sua manos a la lenio. Subita, Za salta de sua posa sentante e sta menasante supra Madre Vea. “Dise a me cual mea padre ia fa per crea foco!”

“El ia acrupi supra la lenio, e ia move sua manos como tu. Ma sempre, el ia turna a nos sua dorso, per asconde la lenio con sua corpo. Me ia vide nunca la momento cuando la foco ia veni. Me sabe sola acel.”

“A, vade de ante mea oios, vea. Tu ta debe mori con el.”

Madre Vea leva se, e coxea a via. “Foco es mal.” – el murmura. “Gor ia mori car sua orgulo ia coleri la dios. Lo es plu bon ce nos vive sin foco, como nos ia fa en la tempo vea.” El rie vinsosa. “Foco ia parti aora. Za va crea nunca foco.”

Za acrupi denova supra la monton de bastetas. “Ajunta plu de la senes de la foco mor.” – el comanda. “Cisa la spirito de la foco vive ancora en los.”

Hur lansa plu senes a sur, e Za continua teni forte la bastetas negrida, colpante los entre se, volente ce la foco veni. La xica Hur acrupi a sua lado, con sua labios prosima a sua orea. “La omes vea parla contra tu, Za. Los dise ce lo ta es plu bon si la stranjer Kal ta gida nos. Los dise ce tu senta tra tota la dia e frota tua manos, en cuando Kal porta carne a nos.”

“Sin carne, nos fami.” – Za dise. “Ma sin foco, nos va mori cuando la tempo fria veni denova. Sin foco, la bestias de la foresta va ataca nosa cavas cuando los es fame. Los va fura nosa femes e enfantes cuando nos dormi.”

“Omes vea considera sola la carne cual pleni sua ventres. Los va fa ce Kal es la gidor. E Horg, mea padre, va dona me a el.”

Horg es un de la omes vea de la tribu. An si el ia deveni ja vea, el es ancora un om con influe grande.

Car el no es aora la plu forte, el va suporta la plu forte. Acel es la lege de survive.

“Kal!” Za dise malumorosa. “Kal no es un gidor. Gida no es tan fasil.”

Kal ia apare de ultra la montania a un dia, como la survivor solitar de alga tribu distante ci ia mori en la fria grande. El ia trae con se la corpo de un servo mas, resente matada, per ofre la pas. Kal es un bon xasor, un pensor rapida, e un parlor eselente. En loca de mata el seguente sua costum per stranjeres, la tribu ia permete ce el junta se a los. Los ia fa un era grande, Za pensa, cuando los no ia mata Kal. Aora ja, Kal ia colie un cuantia notable de suportores, e on ave alga ci sujesta ce el ta deveni la gidor.

Par instinto, Za sabe ce Kal no es un gidor conveninte per la tribu. El es avar e cruel, desirante tota per se. Za prende la parte la plu grande de la carne, e la peles la plu caldinte, car acel es sua direto, ma el cura ance la tribu, sertinte ce on organiza la xasas e ce, an en tempo de sufri, on dona comeda a la femes e enfantes. Un gidor debe pensa a multe cosas.

“Kal no es un gidor.” – Za murmura denova.

Hur dise – “La gidor es el ci crea foco!”

Za envia la monton de bastetas a vola par colpa lo con sua braso potiosa. “Do la foco ia vade? Do?”

Ian Chesterton reveni a consensia con un corpo contusada e un testa palpitante. Cauta, el leva sua mano e frota lo contra sua scalpo. El ave un bulto direta supra un de sua oreas. Lo es dolosa, ma el no pare sangui.

Un vose clama – “Ian? Ian, tu es oce?”

El abri sua oios e vide Barbara ci ajena a sua lado. “Me comensa deveni abituada a esta.” – el murmura. “Me es oce, me pensa. Me suposa ce me ia colpa mea testa cuando…” El silenti a la recorda subita inondante de la avenis estracomun de la sera. “Bon, la move ia sesa, a la min.” Ian leva cauta sua testa, regarda a sirca, e vide Susan e la Dotor ci sta a la consol sentral, studiante un de la paneles de strumentos.

“La funda pare stable.” – Susan dise.

La Dotor acorda, esaminante un otra linia de indicadores. “Un strato de arena, un magra de tera – rocas prosima… bon… bon…”

Susan turna, suriente a Ian e Barbara. “Vos senti plu bon? Nos ia parti de 1963, me regrete.”

La Dotor acorda con sua testa. “O, si, sin duta. Pos un momento, me va dise a vos do nos es – e cuando!” La Dotor apoia se supra la consol, e bateta subita un indicador con sua nocas. “Zero!” – el dise ofendeda. “Zero? Acel no pote es coreta. Esta mesurador de anio ancora no opera bon, Susan.” El persepi ce, en fato, Susan no ia parla a el, segue la dirije de sua regardeta, e vide Ian e Barbara ci senta sur la solo. “O, si, la du de vos!” el dise casual, como si el veni de recorda ce los esiste. “Cual vos fa ala, a su? Vos pote sta aora: nos ia fini la viaja.”

Barbara fisa sua regarda a el con asusta. “Cual ia aveni?” el demanda. “Do nos es?” Ian luta per sta se, con un pico de jemi.

“Barbara, no dise ce los ia convinse tu a crede tota sua asurdas.”

“Lo es vera, Senior Chesterton.” – Susan dise. “Nos ia viaja tra un distantia grande en spasio e tempo. Regarda la scermo de la scanador!”

La Dotor ensofla. “Vera, regarda ala, a supra!” El indica un peti scermo cuadro cual es suspendeda supra la consol. Lo mostra un plano sombre e rocosa, la borda de lo cual aspeta como un foresta, e un vista de montes distante.

En cuando Ian regarda la scermo con stona, la Dotor dise despetosa – “Los no comprende, e me suspeta ce los no vole comprende!” El regarda Ian. “Bon, mea joven, on ave asi un mundo nova per tu.”

“Mera arena.” – Ian dise stupida – “Arena e rocas.”

“Esata. Acel es la vista direta estra la barcon.”

“Tu vole dise ce acel es lo cual nos va vide cuando nos sorti de asi – no la bricabraceria en la Rua Totters?”

“O, si!” – Susan dise vivosa. “Vos va pote pronto vide lo con vosa propre oios.”

“Me no crede lo.” – Ian dise sin tono.

La Dotor suspira. “Vera, tu es multe ostinosa, no, mea joven?”

“Bon, ma ta ce tu mostra a me un demostra, un atesta concreta.” Ian regarda compatiosa Susan. “Me no vole turba tu, Susan, ma lo es ja la tempo per reveni tu a la realia.”

“Tu era, Senior Chesterton.” – Susan dise triste.

La Dotor ensofla ofendeda. “El nomi me un xarlatan! Cual spesie de atesta ta sasia tu, mea joven?”

“Acel es fasil. Fa no plu ca abri la portes, Dotor Foreman.”

“Foreman?” la Dotor murmura, como si el ia oia ja nunca la nom. “Foreman? Sur cual el babela aora?”

“Los pare multe serta, Ian,” – Barbara xuxa – “e recorda la ciosco, la difere entre la interna e la esterna.”

“Me sabe…” Ian regarda defiante la Dotor. “Ma esce tu va abri acel portes?”

“No.”

Ian regarda la du xicas. “Vide. El finje.”

“No asta cuando me es serta ce la abri de los no va es perilosa.” – la Dotor dise condesendente. El esamina plu indicadores. “La aira pare multe bon. Si, lo es tal: lo es bon, la manca de contamina es vera notable. Tu ta regarda la contador de radia, Susan?”

“Lo indica normal, Avo.”

“Bon, bon. Me va prende un contador portable de Geiger, mera per es secur. Donce, mea joven, tu defia ancora me, si?”

“Abri la portes, e demostra tua declara.” – Ian dise fatigada.

“Tua mente es vera tro prejudosa, mea joven cara.” – la Dotor dise, con un manera nontolerable superior. “Tu debe aprende deveni min isolin!”

“Do nos es, Avo? Tu ave cualce idea?” Susan dise. El dona a la Dotor alga cosa cual aspeta como un peti caxa negra.

“O, nos ia vade serta a retro tra la tempo… tra multe tempo, me crede. Pos cuando nos ia sorti, me va colie alga samples… alga pesos de roca, alga plantas… alora me va pote fa un bon estima.” El regarda reproxosa la consol de la Tardis. “Ma me desira tan multe ce esta strumentos ta funsiona plu bon.”

“Vos crede vera la idea intera, no?” Ian dise merveliante. “Vos crede vera ce nos ia vade a retro tra la tempo.”

“O, si,” – la Dotor dise sasiada – “sin duta!”

“E pos abri la portes, nos no va es en un bricabraceria en London, en England, en 1963?”

“Acel es intera coreta. Tua tono sujesta ce tu burla, mea joven.”

“Ma natural, la idea es burlable! La tempo no funsiona como un carusel. On no pote simple desembarca a cualce loca, en la pasada o la futur.”

“Vera? E donce como la tempo funsiona, en fato? Instrui me!”

“Lo… bon, lo aveni.” – Ian dise neblosa. “E, a pos, lo es finida!”

On ave un cualia condesendente divertida en la manera de la Dotor. El regarda Barbara. “E tu? Tu no duta tan multe como tua ami, no?”

“No. No tan multe, me opina.”

“Bon! Me ave ancora esperas per tu.”

Ian suspira. “O, Barbara.”

“Me no pote no crede, Ian. Ambos de los es tan calma, tan serta sur se. Me crede los – mera tal!”

La Dotor fisa un regarda ipnosin a Ian. “Si tu ta pote toca la arena stranjer con tua pedes, oia la clamas de avias strana, vide los sirculinte supra tu en un sielo nova… esce esta ta sasia tu?”

“Si.” – Ian dise simple.

La Dotor surie, estende sua mano, e opera un boton. “Donce vide mesma.”

La portes de la Tardis abri se.

Ian vade a la porte abrida e regarda a estra. “Lo no es vera.” – el dise. “Lo no pote es vera!”

La Dotor surie.

Ad blocker interference detected!


Wikia is a free-to-use site that makes money from advertising. We have a modified experience for viewers using ad blockers

Wikia is not accessible if you’ve made further modifications. Remove the custom ad blocker rule(s) and the page will load as expected.