FANDOM


Un enfante nonmundal
123456789101112

8. La foresta de temeEdit

Lo es oscur en la foresta.

La curso es tan streta ce ramos basa bate constante sua fases, e los debe scermi se con sua brasos levada en cuando los core.

La aira es fria, an si la foresta proteje lo de la ventas de note. La curso es tan ensircada a lados e a supra ce la situa es simil a core tra un tunel. An tal, lo es plu bon a mil veses ca la cava macabre con sua apesta de moria e sua cranios fratida e suriente. Susan gida los, segueda par Barbara, e Ian a pos, con la Dotor a retro. En cuando los core, Ian deveni consensa ce la Dotor vade sempre plu lenta.

El turna e vide ce la vea ia sesa intera core. El apoia se, rapida respirante, a un arbor. “Para! Sola per un momento, per favore.”

“Nos nesesa continua, Dotor.”

La Dotor acorda debil con sua testa. “Pos un momento… pos un momento.”

“Nos es ancora no sufisinte distante de la cava…”

“Me sabe… me sabe. Ma mera, me no pote core plu!”

“Atenta!” Ian dise corajinte.

La Dotor acorda fatigada con sua testa, ma el no move.

“Oce.” – Ian dise. “Nos ave sola un posiblia. Me va debe porta tu.”

El avansa a la Dotor, ci envia el a via par un move ofendeda de sua mano. “Tu va fa no tal cosa, mea joven. Me no nesesa tua aida. Cisa me es vea, ma me no es senil. Me vole mera pote respira, no plu ca acel.”

Ian regarda desperante Susan, ci veni a ante e dise – “Per favore, Avo.”

La Dotor suspira e tira se de la tronco en un manera fatigada. Los continua, ma con min rapidia a esta ves. Ave xuxas misteriosa en la foresta sirca los, e la crias de bestias savaje.

Barbara prosimi a Ian. “Tu es serta ce esta via es la coreta?”

“Me crede tal. Nos vole traversa la angulo de la foresta e reveni a la barcon. Nos ia entra a la foresta a un loca diferente – la sabe serta es difisil. Cual tu pensa?”

“Me no recorda, Ian. Me no recorda plu!”

El ave isteria en sua vose.

Ian pone un mano consolante a sua spala. “Lo no importa. Nos es libre, no? Esta es la cualia xef.”

Los move longo la via.

Ian oia un ruido en la oscuria pos se, e el jira subita. La arboretas pare move alga, e el pensa ce el oia un sona basa e profonda, como la ronrona de un gato jigante…

“Cual lo es?”

Ian leva sua spalas. “Mera alga bestia savaje. Probable lo teme plu nos ca nos teme lo.”

Ma, en sua cor, Ian no es tan serta. El rompe sua testa per recorda cual animales ia esiste en la eda de abita de cavas.

No dinosauros, a la min, an si acel es un era comun. Fortunosa per umanas, acel monstros grande ia es ja longa estinguida. Ma mamutes, serta. E como per la tigre de dentes sabrin? Acel ia esiste serta, no?

Cauta, los continua tra la foresta oscur. Los ateni un arbor cual ia cade, e los pausa per orienta se.

“Me recorda esta loca.” – Susan dise stimulada. “Ma nos no ia pasa direta a lado de lo. Nos ia vade a sirca.”

“Lo es vera.” – Barbara acorda. “La curso ia pasa lo a un lado.”

“Me espera ce ambos de vos pensa coreta,” – Ian dise – “car, si tal, la barcon debe es prosima.” El turna a la Dotor, ci apoia sur la spala de Susan. “Como tu senti?”

“Me senti intera bon, grasias, mea joven! No opina plu ce me es la membro debil de esta grupo.”

Subita, Barbara fa un xilia peti, e move prosima a Ian.

“Cual aveni?”

“Me no sabe. Me crede ce me ia vide alga cosa move – ala, en la arboretas.”

“Asurda.” – la Dotor dise casual.

“Me repete: la arboretas ia move. Me ia vide los. Nos va evade nunca esta loca asustante. Nunca!”

“Cual lo ia pote es, Avo?” Susan xuxa.

“La imajina, mea enfante cara. No plu ca la imajina.” – la Dotor dise, ma el regarda alga noncuieta sirca se.

Ian pone un braso consolante sirca la spalas de Barbara. “Vide, me sabe ce esta pare simil a un malsonia, ma nos va estrae nos de lo.”

“Nos va mori en esta foresta asustante, tota de nos, me sabe!”

“Nos no va mori,” – Ian dise jentil – “si nos no sede.”

“Ian, cual aveni a nos?”

“Vide, lo debe es vera ce nos prosimi aora a la barcon. Ala, nos va es secur. Nos ia evade la cavas, no?”

Susan veni plu prosima a la Dotor e trema. “Lo es tan fria!”

La Dotor desapone sua jaca e pone lo sirca sua spalas. “Tu pote porta esta, si tu vole, mea enfante.”

“Ma tu, Avo?”

La Dotor susede surie.

“No senti ansia per me. Tota esta eserse ia fa ce me deveni multe calda!”

Ian traversa a los. “Barbara senti alga tensa. Lo pare ce nos ia para en coaveni, donce nos va reposa asi per un tempo corta.”

Susan acorda grasiosa con sua testa. “Esce lo es posible ce los va segue nos?”

“Lo es posible, me regrete!”

“Per acel razona, me no vole resta longa asi.”

“Tu no suposa ce me vole reposa longa, si?” la Dotor dise iritada.

Ian regarda el en un manera pasiente. “No. Natural, no. Me opina ce nos debe cambia la ordina cuando nos parti denova. Tu va gida, con Susan e Barbara, e me va vade a retro.”

La Dotor reata coler. “Lo pare ce tu ia eleje tu mesma como la gidor de nosa mision peti.”

“Nos no ave la tempo per fa un vota sur la demanda, si?”

“Ma tu debe comprende ce me no va obedi sieca tua comandas, mea joven.”

Ian apoia a ante. “Crede me, Dotor, si nos ta ave sola tu e me asi, alora, en mea opina, me ta lasa tu per trova tua propre via de reveni a la barcon!”

“Tu es un joven multe noiante, no?”

“E tu es un vea multe ostinosa.” – Ian dise, tensante sua dentes. “Ma cuando nos parti, tu va gida, la xicas va veni a entre, e me va es la ultima – acel es la posa la plu secur!”

“Secur? Perce la plu secur?”

“Me crede ce Barbara no era. Me ia oia alga cosa en la arboretas pos nos cuando nos ia para a ante, e lo es ancora asi aora. Alga cosa persegue nos.”

“Imajinada!”

“Perce tu es tan serta, Dotor?”

“Me refusa es asustada a stupidia par no plu ca ombras!”

Ian abandona. “Multe bon, como tu vole. Nos va reposa plu asi per un tempo corta, e continua a pos.”

En un otra parte de la foresta, Za e Hur pausa ance, ma no per reposa. Los ajena, esaminante la trasas lasada par la stranjeres en sua pasa tra la jungla – indicas tan clar a los como palos de dirije a un motoriste moderna.

“On ave asi un basteta rompeda.” – Hur dise. “Los ia reposa asi.”

Za esamina un impresa de pede. “Los ave pedes strana.”

“Los ia porta peles sur los.” – Hur dise. “On ave plu marcas asi, e asi. Los ia vade en esta dirije.”

On ave un xuxa distante ante los, e un ronca basa.

Za regarda temosa Hur. “Nos ia era en segue los. Nos no debe fa esta.”

“Nos no pote revade aora. Esce tu vole ce Kal ta burla tu como tu ia burla el?”

Za teni plu firma sua axa, e los continua en sua via.

La grupo peti continua tra la jungla, nonevitable lentida par la Dotor car el es aora a la fronte. Barbara trapi sua pede en un vite pendente e el cade, colpante la arboretas a un lado de la curso. Sua mano estendeda toca alga cosa calda e moiada. El sta, bambolante, e regarda sua mano. Lo es covreda con sangue. El xilia.

Pos los sur la curso, Za apoia sua testa vijilante. “Los es aora multe prosima. Acel ia es un de la femes. Veni!” Los continua freta.

La Dotor esamina la forma enrolada a lado de la curso. “Cual lo es, Avo?” Susan demanda temosa.

“Mera un animal mor. Alga spesie de servo, me pensa. Lo es multe resente matada. La corpo es ancora calda.”

“Cual cosa ia mata lo?”

“Con regarda a esta marcas de gara, alga membro multe grande e multe savaje de la familia de gatos – cisa un tigre de dentes sabrin.”

Subita, los oia un pumi en la jungla pos se.

“La tigre?” Barbara xuxa.

“Tro ruidosa. Sin duta, lo es los de la cava ci xasa nos. Nos va debe asconde e espera ce los va pasa. Rapida, vade ala en la arboretas.” Ian puxa los entre la arboretas, e los acrupi en espeta.

Pos alga secondos, du figures vestida en peles core a la pradeta e pausa, regardante sirca se.

La un es un figur masosa ci porta un axa de petra – un de la omes ci los ia vide a la cava.

La figur a lado de el es plu peti e min forte. Stonada, Ian vide ce el es un xica.

La du figures savaje sta preparada, suspetosa xercante sirca se.

Prosima en la arboretas, la gato grande es ance preparada. Lo ia segue esta preda strana tra la foresta sur un via longa.

A alga veses, lo ia acrupi per salta e cade un de los, ma, a cada ves, alga cosa ia restrinje lo. Esta creadas ave un cualia multe nonusual. Sua aspeta, la modo en cual los pumi corajosa tra la jungla, e, supra tota, la odor bizara de la peles strana cual los porta – tota de esta es nova, nonconoseda, e cisa perilinte.

Cuando Za e Hur ariva a la pradeta, la dilema de la bestia grande es solveda. Lo conose ja longa la abitores de la cavas; conose sua modo de aspeta e move e odori; conose sua manera de xasa con lansias e axas.

Batente sua coda, la tigre serpe tra la foresta en dirije a la du novas.

En la masa de arboretas, Ian xuxa – “Testa a su, cadun! Fa no sona!”

Za regarda noncuieta sirca se, sensante la mal plu ca el vide lo.

El toca la braso de Hur. “Espeta asi.” – el xuxa. “Peril es en esta loca. Me va vade per vide.”

Za entra cauta a la pradeta, en dirije direta a la arboretas do Ian e sua acompaniores asconde. De alga loca pos el, un ronca basa veni.

Za turna rapida. Lo es la vose de la tigre, de dentes longa, la enemi vea de sua popla.

Tensante sua mano sur sua axa, Za penduli sua testa de un lado a la otra, escutante, sensante.

Direta pos el, la erbas longa comensa ondeta. Hur vide lo e xilia un averti, ma el es tro tarda. La tigre salta.

Ad blocker interference detected!


Wikia is a free-to-use site that makes money from advertising. We have a modified experience for viewers using ad blockers

Wikia is not accessible if you’ve made further modifications. Remove the custom ad blocker rule(s) and the page will load as expected.