Esta es un teoria de sintatica cual atenta separa la conseta de clases de parolas (nomes, verbos, ajetivos, etc) de la roles cual parolas, formulas, e proposas pote entra en la construi de frases. Ultima, la teoria no difere multe de la teorias dominante oji. Ma posible esta usa de termas clari alga ambiguas de sintatica. jorj

Contents 1 Clases de parolas 2 Roles sintatical 3 Formulas 4 Proposas 5 Modeles

Clases de parolas Edit

Parolas pote es organizada en clases, prima organizada par aspetas jeneral de sinifia. Plu, en cada lingua, parolas ave, en ajunta a se sinifia, roles en cual los pote opera en un frase, proposa, o formula. Un bon metafor es ce cada espresa ave bucos cual conveni per alga parolas (e no per otras).

Esta bucos es partes de modeles cual nos ia aprende e usa per crea frases. En loca de parla de mutas (transformations) como en la teorias de Chomsky e otras, on pote parla de modeles variosa, pe modeles per frases de declara, frases de demanda, etc.

En un modo simil, morfemes o otra cambias de parolas ave se roles variosa, e es usada en modos determinada par modeles interna per construi parolas. E regulas fonolojial determina la modo en cual la morfemes opera en un parola. Ma estas es discutes estra la estende de esta article.

La clases de parolas inclui la seguentes. Nota ce no cada lingua usa tota de estas, e alga linguas usa varias plu detaliosa. La clases stelida (paroletas) es cluida, cual es per dise ce los no permete la ajunta de parolas nova. La otra clases es abrida e permete la ajunta de parolas nova e donce es comun multe grande.

• nomes – persones, animales, cosas
  • nomes comun
  • nomes propre
  • pronomes* (me, tu, el, lo, on, se, nos, vos, los; ci, ce, cual; esta, acel, tota, algun, cadun, etc)
• verbos – atas, states, cambias, relatas, efetos
  • verbos comun
  • copulas* (es, deveni, pare, etc)
• ajetivos – cualias
  • ajetivos comun
  • determinantes* (la, un, tota, esta acel, alga, cada, etc)
  • paroletas de cuantia* (un, du, tre...; multe, poca, etc)
  • comparantes* (plu, min, la plu, la min, tan, etc)
• preposadas* – alga relatas en spasio, tempo, etc (a, de, ante, pos, supra, su, con, sin, etc)
• averbos* (vide a su) (ala, asi, sempre, nunca, tro, an, etc)
  • paroletas de tempo, modo, aspeta, e vose* (ia, va, ta)
  • paroletas de nega e afirma* (si, no)
  • paroletas de grado* (vera, tan, poca, multe, estrema, apena, serta, probable, posible, etc)
• conjuntas e sujuntas* (e, o, ma; ci, cual, cuando, do, como, etc)
• etc – la lista varia alga par lingua

Roles sintatical Edit

Ave roles variosa en cual parolas de esta clases pote entra. La du roles la plu importante es partisipantes e predicas. Partisipantes (en la plu de casos, nomes) pote es la sujetos o la ojetos de predicas. Predicas (verbos, ajetivos, preposadas, e otras) alora descrive se sujetos e junta los a se ojetos. Plu, alga predicas pote governa un otra ojeto (comun nomida la ojeto nondireta); e, en alga linguas, ave un otra sujeto (nomida la tema o foca) cual, an si no direta interatante con la predica, es an tal un "sujeto" de la proposa.

Ave spesies variosa de predicas: Alga – predicas xef (plu comun, verbos) – pote crea un proposa; otras – predicas alterante (pe, ajetivos e preposadas) – no pote crea proposas. Per simpli, me va refere a la predicas periferial como alterantes.

Ajetivos e preposadas pote opera como predicas xef en multe linguas par la usa de verbos spesial nomida copulas. Per esemplo, on pote dise "el es verde" e "el es en la jardin", etc. En multe otra linguas, la usa normal de ajetivos es como predicas xef.

Plu, alga predicas descrive sola un sujeto (pe, verbos nontransitiva, ajetivos); alga predicas governa ance un ojeto (pe, verbos transitiva, preposadas). Ave an alga predicas cual no ave un sujeto o ojeto (per esemplo, verbos de clima), e alga predicas cual governa du ojetos (pe, verbos ditransitiva). Esta varia es nomida la valentia de la verbo, con valuas de 0, 1, 2, o 3 (la cuantia de sujetos e ojetos).

Alga predicas descrive otra predicas – los altera la sinifia de un verbo o ajetivo, per esemplo. En esta casos, on refere a los como predicas averbal, o plu simple, averbales. La grupo cluida de parolas cual spesiali en esta rol es nomida averbos. Seguente la usa de esta termas en deutx, ajetivos usada per altera otra predicas (pe, los cual fini con -ly en engles o -mente en italian) es nomida ajetivos averbal.

Alga parolas pote es usada ("reusada") per otra roles ca se roles normal. Comun, los ave afisas per indica la rol nova, ma ance comun, los no cambia en forma.

• Verbos pote opera como partisipantes (pe infinitivas, jerundios)
• Verbos pote opera como alterantes (pe partisipios)
• Ajetivos pote opera como partisipantes (pe nomes de cualias, colores, etc)
• Nomes pote opera como alterantes (pe nomes aposada, nomes jenitiva, etc)
• Nomes pote opera como averbales (pe la casos variosa de nomes en latina, o parolas como "oji", "ier", etc)
• Preposadas pote opera como averbales (pe, "a pos", contra "pos lo")
• An averbos pote opera en otra roles (pe, "asta aora", contra "me vade aora")

Nota ce parolas es videda como "reusada" cuando los reteni la se sinifia fundal orijinal e donce reteni ance alga de la se potes orijinal (pe, infinitivas, jerundios, e partisipios continua comun governa ojetos; en multe linguas, los reteni an se indicas de tempo, etc.) Ma si, per esemplo, un verbo es usada per refere a un person o cosa, an sin un afisa, lo no es plu un verbo, ma un nom. Pe, "laboror" refere a un person ci labora, no a la labora mesma. E cuando un nom es usada per indica un ata, lo no es plu un nom, ma un verbo. Pe, "marteli" en "el marteli la clo" refere a la ata, no la util. Afisas cual indica un cambia de rol es nomida afisas de infleta; los cual cambia la clase de un parola es nomida afisas de deriva

Per esemplo, la "-ia" en "grandia" es un afisa de infleta, cual cambia la rol de la ajetivo "grande" a un partisipante. A la otra lado, "un grande", an si lo no ave un afisa nova, es un cambia de clase, e la ajetivo ia es cambiada a un nom ("un cosa o person grande"). En esta caso, la parola "un" ata como un paroleta de deriva, en ajunta a se otra sinifias de singularia e nondefini. On pote an ave parolas cual pote es videda como du cambias de roles: "madria" es un partisipante cual veni de la partisipante "madre" tra un formula predical "es un madre". Natural, es plu pratical vide esta cambia como un deriva de un nom de un otra par la ajunta de un afisa derival "-ia".

Per resoma, la spesies e suspesias comun de roles sintatical inclui...

• partisipantes (engles: arguments)
  • sujetos
  • ojetos
• predicas (transitiva e nontransitiva)
  • predicas xef
  • predicas alterante (alterantes)
  • predicas averbal (averbales)

FormulasEdit

On pote usa grupos de parolas (formulas) como partisipantes e predicas. Esta formulas es composada de un parola sentral con se alterantes e se ojetos. Per esemplo, en la frase "La om vea con la parapluve vade rapida a la opera", "La om vea con la parapluve" pote es videda como la formula sujetal de la formula predical "vade rapida a la opera".

Formulas pote es ance "reusada" (pd, usada en modos min comun). Per esemplo, un verbo con se nom ojetal (normal usada como un formula predical) pote ata como un formula partisipante en un frase plu complicada. En la frases "come tartes es bon" e "me gusta come tartes", la formula "come tartes" es usada como un formula partisipante, an si lo es composada de un verbo e se nom ojetal. Nota ce, en multe linguas, la verbo "come" usada como un partisipante es en la forma de un infinitiva o jerundio (pe "to eat", "eating", "comer", etc).

Proposas Edit

Un proposa es un segue de parolas cual pote comunica un sinifia completa. La plu comun, un proposa es composada de un sujeto e un predica xef, ma comun un proposa inclui ance un ojeto e alga alterantes e averbales. Ma es ance posible ce un proposa es no plu ca un partisipante ("serpente!") o un predica ("pluve!"). La plu de linguas ta ajunta un partisipante e/o predica "pupetin" ("dummy" en engles – "it's a snake", "it's raining").

A alga veses, proposas es juntada a o an caxida en otra proposas. Proposas caxida en otra proposas es nomida proposas suordinada:

• Un proposa cual altera un partisipante es nomida asi un proposa alterante;
• Un proposa cual altera un predica es nomida un proposa averbal;
• Un proposa cual opera como un partisipante es nomida un proposa partisipante.

Proposas suordinada es comun juntada a se sujeto o predica par paroletas spesial nomida sujuntas, cual es comun pronomes o averbos "reusada", e ata en un modo simil a preposadas (pd, como predicas alterante e transitiva). Alga sujuntas (como la "ci" en "me sabe ci fa lo") combina la rol de sujunta e un partisipante de la proposa suordinada.

Alga juntas – notable "e" – es interesante car los crea un unia plu grande. Per esemplo, en "Joan e Maria ia vade a casa", "Joan e Maria" deveni un formula partisipante cual es descriveda par "ia vade a casa". Simil, en "Joan ia vade a casa e come", "ia vade a casa e come" deveni un formula predical cual descrive "Joan". E, en "Joan ia vade a casa e Maria ia resta asi", du proposas es liada, sin alga interata clar. A la otra lado, la juntas "ma" e "o" es plu complicada, con roles cual inclui serta la roles de predicas.

Modeles Edit

Asi es sujestes per modeles posible per lfn:

Brasetas reta indica ce on pote usa zero o un parola en esta rol;

Brasetas risada indica ce on pote usa zero, un, o plu parolas en esta rol.

Roles

X = partisipante (nomes, plu comun)

P = predica xef (verbos, plu comun)

Pn = predica nontransitiva

Pt = predica transitiva

Pc = copula

A = alterante

An = alterante nontransitiva (ajetivos, plu comun)

At = alterante transitiva (preposadas, plu comun)

Av = alterante averbal

Frase (F)

= {Av} [X] P {Av} - "oji, la gato come la mus en la casa"

Formulas:

X = pronom / {prenom} X {A} / Pp

pe: "me" / "esta gato grande"

pronom = me, tu, el... cada, cadun, multe...

prenom = la, un, cada, alga, tota, multe...

P = Pn / Pt X / Pc A / [neg] [preverbo] P {Av}

pe: "senta" / "come pan" / "es grande" / "no ia pasea rapida"

neg = no

preverbo = ia, va, ta

A = {grad} An / {grad} At X / Pa

pe: "multe grande" / "tota en la casa"

Av = {grad} / {grad} An / {grad} At Xo / Pav

pe: "tan" / "multe rapida" / "tota en ritmo"

grad (paroletas de grado) = vera, multe, poca, alga, plu, min, tan...

(la paroletas de grado es clar relatada a la pronomes e prenomes)

Proposas:

Proposa partisipante (Pp) = sujunta F

pe: "ce tu va veni"

sujunta = ce / esce

Proposa alterante (Pa) = [At] supronom F

pe: "ci come la mus" / "ci la gato come" / "a ci me parla"

supronom = cual / ci

Proposa averbal (Pav) = [At] suaverbo F

pe: "en do la gato come la mus"

suaverbo = do / cuando / cuanto / como / si / car / afin

Demanda (D)

= [At] dem F ?

pe: "a ci me parla?"

= esce F ?

pe: "esce la gato come la mus?"

= F, si ?

= F, no ?

= F ?

dem (paroleta de demanda) = per ce / do / cuando / como

(la paroletas de demanda e la suaverbos e supronomes es clar relatada)

Juntas:

F = F conj F

X = X conj X

P = P conj P

A = A conj A

conj = e / o / ma