Alo! Me vive en Brasil e me entra vos comunia...

Me abita Brasil,Pernambuco, ma me es franses como Napoleon, an si me multe malsimila el (cisa min intelijente ma tan plu bela!...). Oposante el, me no ia nase en Corse ma plu a sude, en Africa (Dacar/Senegal/1958), ma me no es negra e no blanca e si colorida!... (Final esiste un varia ce Napoleon ia nase no en Corse e si en Bres...)

Me multe gusta la linguas (no totas: ci multe abrasa, poca streti...). La linguas ce me ia studia (no aprende) a scola (engles e espaniol) es plu o min usos a me ja asta aora ma me gusta de linguas comensa cuando me studia la lingua bresonica en 1973. La lingua bresonica ia es parlada (ancora ma poca) en la parte ueste de "Bres" (Breiz-izel), plu conoseda como Bretania, antica clamada Armorica (an si per la Romanes antica Armorica ia es plu bon la borda de la Canal Britan (Mor Breiz) de la rio Luar (Loire) a la rio Sen (Seine) (Bretania + Normandia)...Probable on ia parla la mesma lingua en Britan e Galia a ambos lados de la canal... Si tu desira sabe a plu sur esta tema, tu pote vide en "poesias" me tradui de un poesia bresonica "Matina Felis" con se varia orijinal... Tu pote ance naviga en locas de rede multilingual como "kervarker" e "skriv ha diskriv" do tu va trova tota informas e cursos enlinia e sin costa...

Es valuada asentua ce la Republica Franses nunca ia reconose ofisial la lingua bresonica an cuando esta ia es parlada par plu ce un 1.200.000 a comensa de sentenio dudes... (La ruina de la lingua celtica armorican aveni entre la du geras mundal...)

La paso du de me interesa par la linguas aveni cuando me descovre esperanto en 1977, ma esta es plu esata un interesa par la lingua internasional e jeneral la linguas construida ce par esperanto mesma... me ia multe usa el scrive e me reconose se capasia per esta, ma me trova ce el no vade bon per parla e ce jeneral el ave tro multe complicas nonnesesada... Ance ido es an plu complicada ce esperanto e la otra interlinguas romanica presenta poca vantajes cuando compareda a p.e. espaniol/portuges (700 miliones de parlores)...

Me sempre ia imajina un lingua aidante con vocabulo latina, pronunsia fasilida, ortografia fonetical e gramatica estrema simplida... Me ia trova esta en elefen, la creol per la mundo! Jorj (e Simon, Myaleee e otras...) fa un labora eselente ce multe otras ia atenta sin susede, incluinte me!... Elefen es un lingua vera intelijente...

Me ia studia ance otra linguas entre cual rusce plu ce otras ma la lingua ce plu marca me vive es portuges ce ia dona a me du sposas, tres fios e un fia... e des-sinco anios de vive en Brasil do me labora como interpretor de conferis, traduor e instruor de franses... Per contribuis de me a elefen me tradui poesias franses de sentenio XIV a sentenio XX e testos brasilera de Chico Buarque. Vos pote evalua los a "poesias" > "franses" e "portuges" > "testos" e "cantas" a Vici LFN... Per favore, no tro sever!...

Me ia inisia ance projetos de linguas internasional cual vos pote vide e discute en la vici de lfn a InterRoman (2010), Yolik (2011) e Elefanto (2012). IR es un lingua naturaliste neolatina basada en Espaniol, Portuges e franses. Yolik es a plu de la familia de volapük, ma con raises de portuges, bresonica e rusce, e final Elefanto es un varia de lFN mescada con Esperanto...

Asta pronto! Patric.