Alo! Me abita en England, do me labora como programor de compiladores e bancos de datos. Me ia programi ance la disionario de lfn, e ia move esta vici de se casa vea. Me es multe interesada par linguas – e spesial par linguas construida.

A universia (a plu ca dudes anios de aora), me ia studia la linguas latina e elinica, e ia entra a la comunia de esperanto. Me judi aora ce la gramatica de esperanto es plu complicada ca on ta desira per un lingua aidante, e ce se vocabulo conteni parolas difisil per pronunsia – an si me es tan profonda abituada a esta cualias ce me no persepi usual los como problemes. Me gusta multe esperanto, an tal, ma me esplora constante la otra linguas artifisial.

Lfn es la prima lingua par cual me ia es tan saisida ce me ia desira partisipa ativa en se evolui: lo es simple, bela, espresosa, e – en alga modos – estrema natural. Me es grasiosa ce me ia pote contribui a la elimina de alga noncoeres peti en se vocabulo e ia pote aida boni se gramatica. Me ia tradui multe naras e otra testos a lfn, incluinte La cade de la Casa de Usor de Edgar Allan Poe, Un canta de natal de Charles Dickens, e Alisia en la pais de mervelias de Lewis Carroll.

La foto acompaniante ia es fada a la congresa brites de esperanto en Ramsgate, en maio de 2013.