FANDOM


Esta pajes conteni la testo cru de nos disionario. Usores comun no pote cambia lo.

Si tu trova un era de tape (o simil) en la testo, indica lo en la foro, per favore! Tu pote sujesta ala ance parolas cual manca.

Per lia a la disionario de un paje esterna, per favore lia a http://purl.org/net/lfn/disionario/ e no a la disionario mesma. En acel modo nos serti ce la lias no va rompe si la disionario cambia sua loca en la rede (como ia aveni en la pasada). En esta vici, tu pote lia a la disionario par tape {{LiaDis|disionario}}. Grasias!

Nos prepara aora la disionario como un libro. Un prototipo de la parte elefen-engles es disponable.

Per favore, fa no cambias a la disionario a esta tempo.
Nos labora sur lo estra la vici, preparante primi lo como un libro fisical.

Strutur de la testoEdit

La disionario es un lista de articles. Cada article representa un radis o un derivada. Entre la "derivadas", nos inclui ance la formulas (espresas de plu ca un parola) cual conteni la radis o un derivada.

Radises comensa con un parola introduida par un punto (.esemplo). Esta es rapida per tape, e fasili multe la xerca direta de radises cuando on labora con la testo intera de la disionario en un sola fix.

Entre cada article e la seguente, nos pone o un linia orizonal (----) o, a veses, un sutitulo per divide la paje (==par==).

CategoriasEdit

La linia prima de un article comensa con un parola (o formula) en elefen. Esta es la tema de la article; si la article es un radis, la tema es introduida par un punto. Si la tema es un nom propre, lo ave un letera major. Alga nomes propre es normal introduida par "la"; estas es indicada par (la) entre brasetas direta pos la nom.

La tema es segueda (ancora en la linia prima) par un dupunto (entre spasios) e un lista de categorias. Si la lista conteni plu ca un categoria, los es separada con spasios. Alga categorias refere a consetas gramatical; otras es semantical. La posibles es la seguentes:

Gramatical:

  • ajetivo
  • averbo
  • conjunta
  • corti
  • determinante
  • esclama (sin la sinia "!" en la tema, ma lo apare usual en la traduis)
  • espresa (usada per fratos acaso de frases cual ta pote apare ance en la campo :U, ma a cual on vole ajunta traduis en otra linguas)
  • nom
  • plural
  • prefisa
  • prenomal
  • preposada
  • preverbal
  • pronom
  • simbol (usada per leteras de la alfabeta)
  • sufisa
  • sujunta
  • tronco (usada per nomes propre como "Amazonas" e "Cook", cual apare en nomes plu longa como "Rio Amazonas" e "Isolas Cook")
  • verbo
  • verbo transitiva
  • verbo nontransitiva
  • verbo liante (un spesie de verbo nontransitiva)
  • nom-ajetivo (composada)
  • nom-nom (composada)
  • verbo-nom (composada)

Semantical:

  • anatomia
  • animal (incluinte verbos per la sonas de animales)
    • amfibio
    • artropodo (incluinte insetos, aracnidos, miriapodes, e crustaseos)
    • avia
    • dinosauro
    • inseto
    • mamal
    • molusco (incluinte caracoles, limasas, polpos, e calamares)
    • nonvertebrato
    • pex
    • retil (lezardos, serpentes, tortugas, crocodiles, etc)
  • arciteta (incluinte ance mobilas)
  • arte (incluinte pinti, fotografia, sculta, teatro, sinema, etc)
  • astronomia
  • biolojia (incluinte jenetica e ecolojia)
  • cimica
  • color
  • cosini (comedas, bevidas, e modos de prepara los)
  • demonim
  • filosofia
  • fisica
  • governa (incluinte politica, judi, leges, e otra fenomenos de potia sosial)
  • informatica
  • istoria
  • jeografial (un nom propre de un loca)
  • linguistica
  • matematica
  • medica
  • mitolojia (incluinte fables e superstisios)
  • mone (incluinte unias de mone, e ance parolas tecnical de finansia)
  • musica (incluinte dansas e strumentos)
  • onomatopea (incluinte parolas cual imita la voses de animales)
  • planta (incluinte arbores)
  • relijio
  • siensa-umana (incluinte antropolojia, psicolojia, e sosiolojia)
  • sporte (incluinte juas)
  • tecnical
  • tera (incluinte jeolojia e clima)
  • util (incluinte aparatos)
  • veculo
  • veste (incluinte moda e cose)

Nos pote estende esta listas si desirada.

La categorias semantical no es perfeta, e no pote es perfeta. Los permete ce nos analise la vocabulo de elefen de tempo a tempo. Nos no intende ce usores comun de la disionario vide los (ma usores avansada pote usa los en sua xercas enlinia).

CamposEdit

Con un eseta (discuteda a su), cada de la otra linias de un article furni un valua per un campo de la article. Un tal linia comensa con un eticeta: un dupunto segueda par un o du leteras major e un spasio (per esemplo :D o :EN). Un article no nesesa furni tota campos, ma cada campo pote es furnida a no plu ca un ves en un article. La campos disponable es la seguentes. Los ta apare en un article en la ordina alfabetal mostrada:

  • :C = la capital de un pais
  • :D = la defini, scriveda en elefen, en un modo clar e coerente con otra definis simil
  • :G = la nom de un paje de gramatica en esta vici, cual la sistem va presenta como un lia
  • :I = vide a su
  • :N = notas sur la usa coreta, per esemplo per clari la difere entre du parolas simil; estas es scriveda en elefen o engles o ambos; la nota elefen presede (an si vacua), e es separada de la nota engles par la sinias // entre spasios; parolas elefen sitada apare entre ``; parolas en otra linguas apare entre sulinis
  • :P = la pronunsia, xef usada en casos como "fero-via" o "amí" cual ave un asentua spesial
  • :S = la simbol asosiada con un elemento cimical o constela, o la sinia nomida par un parola como "alfa" o "ifen"
  • :T = la nom(es) tasonomial (latina) de un animal o planta, separada con virgulas; esta campo (estra la virgulas) es automata presentada en leteras apoiada; on pote supresa la apoia (cuando on ajunta alga cosa como "e multe otra jeneros") par ensirca con {brasetas risa}, e esta brasetas pote inclui ance un tradui engles pos la sinias // entre spasios; si esta campo comensa con {;} e un spasio, lo apare ante la punto-virgula prima de la traduis engles en la disionario primida
  • :U = esemplos de la usa coreta de un parola, separada con punto-virgulas; si tu vole ajunta un tradui a un tal esemplo (car tu imajina ce la usor de la disionario ta vole xerca acel tradui), cambia lo a un article de categoria "espresa"
  • :V = otra parolas simil o relatada, separada con virgulas
  • :AR = la traduis arabi
  • :CA = la traduis catalan
  • :DA = la traduis dansce
  • :DE = la traduis deutx
  • :EL = la traduis elinica
  • :EN = la traduis engles
  • :EO = la traduis esperanto
  • :ES = la traduis espaniol
  • :EU = la traduis euscara
  • :FI = la traduis finsce
  • :FR = la traduis franses
  • :GL = la traduis galego
  • :HE = la traduis ivri
  • :HI = la traduis hindi
  • :IT = la traduis italian
  • :JA = la traduis japanes
  • :KO = la traduis corean
  • :NL = la traduis nederlandes
  • :PL = la traduis polsce
  • :PT = la traduis portuges
  • :RU = la traduis rusce
  • :ZH = la traduis xines

DefinisEdit

Cuando tu ajunta un defini nova, atenta prima trova un parola simil, e copia la stilo de la defini de acel. En esta modo, la disionario va pare plu coerente scriveda. Per esemplo, nos debe defini tota esclamas e afisas, tota nomes de siensas, paises, etc, en un stilo coerente.

Alga definis comensa natural con un preambul cual clari plu o min detaliosa la contesto semantical de la sinifia. Esta ave normal la forma "en …" e apare entre brasetas curva, per esemplo "(en alga formas de budisme)" o "(en istoria)". Per indica la spesie de nom a cual un ajetivo pertine tipal, o cual es tipal la sujeto de un verbo, indica simple la nom – pe: "(un sustantia)" – en la preambul.

En un defini de un verbo transitiva, no inclui direta sua ojeto, car esta no es un parte de la verbo mesma. En loca, scrive un sujesta de ojetos tipal entre brasetas curva.

Ance entre brasetas curva, un defini pote indica parolas tipal asosiada, per esemplo un sujeto tipal de un verbo, o un preposada tipal acompaniante. Estas apare en sua locas natural en la frase.

La disionario enlinia ave un spelador con un boton per "Trova definis malspeleda". Esta es un bon modo per trova eras de tape.

TraduisEdit

Nos pote (e vole!) ajunta otra linguas de tradui.

En la traduis, posibles cuasi sinonim es separada con virgulas; un cambia plu grande de sinifias es indicada par un punto-virgula. Usa (brasetas curva) per ajunta claris o eticetas cual no es vera partes de la traduis mesma. La xercador de la disionario permete iniora la contenida de tal brasetas.

Per clari cual preposada(s) acompania comun un parola, scrive (a …) o simil en la defini. Traduis pote inclui claris de preposadas en otra linguas, entre brasetas: (to …).

Parolas derivada es listada su sua radis xef. Ma la disionario trata sola afisas ofisial a esta modo. Parolas con afisas tecnical (pe: "artrite", "artrose") es tratada como radises propre, car tal parolas es ja formida en la mundo de siensa, estra elefen. Si un afisa tecnical apare en vera multe parolas, cisa nos ta leva lo a un afisa ofisial.

Parolas composada, como "abrivia" e "portaculpa" apare como radises, per evita ce la article per la parte prima deveni tro longa.

Speles american e britesEdit

Cuando la spele de un parola engles difere entre la dialetos american e brites, on scrive la spele american segueda direta par un bara vertical (|) e la spele brites: tire|tyre.

On pote corti la casos la plu comun de esta fenomeno:

  • |ae indica ce brites ave "ae" en loca de "e": anemia|ae
  • |ce indica ce brites ave "ce" en loca de "se": defense|ce
  • |is indica ce brites ave "is" en loca de "iz": realize|is, realization|is
  • |ll indica ce brites ave "ll" en loca de "l": traveler|ll
  • |oe indica ce brites ave "oe" en loca de "e": ameba|oe
  • |ph indica ce brites ave "ph" en loca de "f": sulfur|ph
  • |re indica ce brites ave "re" en loca de "er": theater|re
  • |ue indica ce brites ave "ogue" en loca de "og": catalog|ue
  • |ul indica ce brites ave "oul" en loca de "ol": smolder|ul
  • |ur indica ce brites ave "our" en loca de "or": color|ur, colorful|ur
  • |ys indica ce brites ave "ys" en loca de "yz": analyze|ys

Si la parte sustituable apare a plu ca un ves en la spele american, la sustitui afeta sola la plu destra de estas: supercenter|re jenera supercentre per la spele brites.

La xercador de la disionario presenta ambos speles, separada par un bara inclinada (/). La usor pote xerca ambos, egal.

Tipografia spesialEdit

A veses rara, un defini o tradui conteni un espresa matematical o simil cual nesesa un tipografia spesial cuando primida. Tal espresas es ensircada par {brasetas risa}.

Ordina de derivadasEdit

Tota derivadas, composadas e formulas segue la radis, en ordina alfabetal. Cualce otra sistem es tro complicada e plen de esetas per es usada. Esta sistem es ance oportun per la usor de la disionario.

La sola eseta es ce cuando un radis es direta reusada en un otra categoria gramatical, esta segue direta pos la radis. Per esemplo, on ave la ordina "ateni" (verbo), "ateni" (nom), "atenable" (e tota otra derivadas).

Verbos nontransitiva presede verbos transitiva.

Ajetivos e verbos presede sua reusas como nomes.

Ajetivos presede sua reusas como averbos.

Formulas cual comensa con la parola pertinente segue direta pos lo. (Un otra modo de dise esta es ce la ordina alfabetal no iniora la spasios entre la parolas de un formula.) Per esemplo, on ave la ordina "abitor", "abitor luante", "abitores".

Alga radises esiste sola con la sufisas "-isme" e "-iste", per esemplo: "otimisme/iste". La disionario presenta la forma con "-isme" como la radis, e "-iste" como un derivada.

SinifiasEdit

La plu de parolas en elefen ave sola un sinifia: cisa los ave varias minor cuando los es usada en campos diferente de la vive, ma on pote vide ce la sinifia es plu o min la mesma. Ma alga parolas ave plu ca un sinifia cual on vole distingui clar en la disionario. La comensa de un sinifia es indicada par un linia spesial cual comensa con un numero entre brasetas ronda. La sinifia prima ave la numero 1; la sinifia du ave la numero 2; etc. Linias pos un numero es campos normal, asta la numero seguente o la fini de la article.

En la strutures interna de la xercador, cada sinifia pos la prima deveni un article propre. En esta modo, la xercador reconose tre spesies de article: radises, derivadas e otra sinifias (de un radis o derivada).

ImajesEdit

Un radis o derivada pote es acompaniada par un imaje. La imajes abita la arcivo "imajes" su la disionario a elefen.org, e cada ave un imajeta corespondente (con altia de 100 pixeles) en la arcivo "imajetas". Imajes debe veni de fontes libre reusable, e debe es reduida si los es tro grande (plu ca 700 pixeles de altia es probable tro grande). Los debe es de spesie JPEG.

En la testo de la disionario en la vici, on indica la esiste de un imaje par ajunta la campo seguente:

 :I #

La sinia # sinifia ce la nom de la fix es simple la terma elefen + ".jpg". Cuando la terma conteni spasios, estas deveni ifenes en la nom de fix (per esemplo: viola-de-rota.jpg).

A veses, par causa de omonimes o simil, on nesesa spesifa un otra fix. On scrive alora la nom de la fix, sin la sufisa ".jpg", en loca de la sinia #:

 :I bongo-animal

A veses rara, on vole spesifa du imajes. On separa los con un virgula:

 :I #, clave-util

Nomes propreEdit

Me crede ce la disionario va deveni tro estendeda si nos inclui tota nomes propre. Donce, me sujesta ce nos inclui sola esta categorias:

  • Nomes de nasiones moderna, e sua formas ajetival. Ance, teritorios importante.
  • Nomes de grupos grande de relijio e politica.
  • Nomes de mares, rios, montanias, etc, multe importante.

Me crede ce la disionario no ta conteni:

  • Nomes de paises (imperos, etc) e poplas istorial.
  • Nomes de persones.
  • Nomes de locas (statos, etc) su la nivel de nasiones.
  • Nomes de la multe setos de la relijios grande.

En loca, me sujesta ce nos crea listas (como la lista de sites, per esemplo) fasil trovable de estas en la vici. jorj

  • Nomes propre de la forma "Monte Aconcagua" apare como radises en loca alfabetal de la parola du ("Aconcagua"). Simon

Codigos per filtriEdit

  • Esce on ave plu codigos propre ca "$.imaje"? jorj
    • Si. On pote scrive multe cosas en acel campo, ma on nesesa conose JavaScript e la mecanicismes interna de la disionario, a alga grado. Clica la boton "Aida" e tu va trova un paragraf con du plu esemplos. La esemplo du conteni du partes juntada par ||, cual sinifia "o". On pote usa ance &&, cual sinifia "e", o usa sola un de la partes — per esemplo, $.lfn === $.en va lista sola la parolas cual ave la mesma testo en se campo elefen e se campo engles. Alga plu esemplos simple es:
      • $.tason per lista la parolas cual ave un campo "T";
      • $.nota per lista la parolas cual ave un campo "N";
      • $.simbol per lista la parolas cual ave un campo "S";
      • $.usa per lista la parolas cual ave un campo "U";
      • $.vide per lista la parolas cual ave un campo "V";
      • $.ru per lista la parolas cual ave un campo "RU" (un tradui rusce);
      • $.ru && ! $.fr per lista la parolas cual ave un campo "RU" ma no campo "FR";
      • $.defini.slice(0, 1) === "a" per lista la parolas cual ave un defini cual comensa con "a" (.slice estrae un parte de un testo: la 0 es la indise de la sinia prima; la 1 es la cuantia de sinias cual on vole estrae);
      • $.defini.slice(0, 3) === "mul" per lista la parolas cual ave un defini cual comensa con "mul";
      • $.defini.slice(-1) !== "s" per lista la parolas cual ave un defini cual no (!) fini con "s" (-1 eleje la sinia final). Simon
    • E un esemplo plu complicada: $.defini.search(/^[A-Z]/) > -1 per lista la parolas cual ave un defini cual comensa con un letera major. Si tu proba esta, tu va trova ce un de estas ("mujil") es un era: la campos "defini" e "tason" es intercambiada. Simon
  • multe interesante! grasias per la leson. jorj
  • Si tu vole comprende plu, regarda esta fix de JavaScript. Lo es la banco de datos cual la sistem reconstrui sempre cuando tu clica "Refresci". Lo conteni du frases. La frase prima ocupa la linia prima, e lo declara la data a cual la fix ia es jenerada. La otra frase es estrema longa: lo ocupa la resta de la fix! Per leje lo, on nesesa sabe du cosas: brasetas reta [] conteni un lista de cosas; e brasetas curva {} conteni un grupo de campos con la forma nom:"valua". La disionario intera es un lista de articles; cada article es un grupo de campos. La nomes de esta campos es los cual on pote tape pos $. en la "codigo propre" per filtri. Cuando tu fa un xerca, la xercador pasea tra la lista de articles, considerante los la un pos la otra e aplicante la filtros diversa cual tu ia eleje (incluinte la codigo propre). Simon

Ad blocker interference detected!


Wikia is a free-to-use site that makes money from advertising. We have a modified experience for viewers using ad blockers

Wikia is not accessible if you’ve made further modifications. Remove the custom ad blocker rule(s) and the page will load as expected.