FANDOM


Esta es un tradui elefen de un presenta orijinal scriveda en esperanto, cual sua traduor Simon Davies ia fa, con la aida de multe scemas desiniada, a la congresa brites de esperanto en Felixstowe en 2005.

Converti un testo esperanto a un otra lingua pote es difisil, car en esperanto on tende crea parolas strana con sinifias densa; un bon esemplo es en la esclama con cual la presenta comensa — lo es un broma sur "Karaj gesamideanoj!" ("Cara persones de la mesma idea!"), la saluta usual cuando on parla a un grupo grande de esperantistes. La broma a la fini envolve la stela verde con sinco puntos, cual es un simbol de esperanto.

Perce la sielo es azul? e demandas simil Edit

Cara coabitores de nosa planeta!

A esta matina, como a cada matina, la sol ia leva en la este, e a esta sera lo va desapare roja en la ueste. Sin duta, vos sabe ce esta moves de la sol es sola parente: resultas ladal, si vos vole, de la move vera de la tera. En fato, nosa planeta fa moves variosa, e un comprende de estas permete un comprende de nosa saisones e de la aspeta cambiante de la luna. En esta presenta, me va atenta esplica esta. Me va parla ance sur alga otra fenomenos interesante de la tera e la sielo, per esemplo la sintili de la stelas, la grandia de la luna, e la color de la sielo mesma.

Ma ta ce nos comensa con la cosas la plu fundal.

Nosa planeta, la tera, es situada en la universo asta un stela cual nos nomi la sol. En 24 oras, la tera fa un turna completa sirca se, sirca sua ase propre. La turna dirije se sempre a la este… donce, en alga sensa, nosa congresa en Felixstowe es vera gidada par la Asosia Universal de Esperanto en Rotterdam. Cuando, par la turna de la tera, un loca no fasa la sol, la tera mesma impedi ce on vide la sol en acel loca, e donce acel loca esperia la note. Alora la tera turna plu, causante ce la stelas pasa a supra, e ce la sol reapare final a la orizon este. Multe probable, vos sabe ja esta.

An tal, la cosa deveni plu complicada cuando nos considera la move du de la tera, cual es sua viaja longa sirca la sol. Esta dura tra un anio; en fato, lo defini la anio como un periodo de 365 dias e un cuatri; e lo es un parte de la causa de la saisones.

Multe persones opina ce la tera en estates sta simple plu prosima a la sol ca en invernos, ma esta no pote es vera. Recorda ce, en la emisfera sude, la saisones es direta inversada de los de nos: en Australia, natal aveni a media de estate, e frecuente on selebra lo sur la plaias. Cuando lo es estate en un loca, lo es inverno en un otra; donce la saisones es relativa a nosa situa jeografial; e un estate o inverno asoluta an no esiste, cual pote cisa resulta de la distantia entre la tera e la sol.

Bon: lo es vera ce en sua viaja anial sirca la sol, la tera segue un via no sirculo, ma alga elise. Donce nosa distantia de la sol varia tra la anio, e esta causa serta un cambia de la temperatur — ma sola un cambia multe peti. Lo es sola cuatro grados debil de celsius. Interesante, la tera veni plu prosima a la sol en janero, cuando la emisfera norde es en inverno. Donce cisa on espeta ce invernos ta es plu calda en la emisfera norde ca pos ses menses en la sude, e ce, simil, estates sude ta es plu calda ca la nordes. Ma la emisfera sude es xef composada de mares. Esta cuantia jigante de acua opera como un isolinte, e sua efeto cansela la difere de temperatur causada par la elisia de nosa viaja anial. An tal, me va reveni a esta conseta a pos.

Donce cual es la causa vera de la saisones? Lo es un caso de la relata entre la du moves: la turna dial e la viaja anial. E esta ave alga lojica, car un cambia de saison cambia ance la longia de la note, e la note, como nos sabe, es governada par la turna de la tera.

On pote imajina ce la via de nosa viaja anial sirca la sol formi un spesie de surfas orizonal, como un table elise. Ma nos ave un problem en la sistem: nosa ase polal, sirca cual la tera turna a cada dia, no sta vertical sur la tera: lo inclina de la vertical a prosima 23 grados.

SieloEsBlu01

Imajina ce nos no ave esta inclina. Si vos ta sta sur la ecuator, per esemplo en Brasil, gustante la congresa a du anios ante aora en Fortaleza, la sol ta pende direta supra vosa testas a mediadia, e sua lus ta colpa vertical la tera. Dirije un lampa de pox direta a un paper, e la lus formi un sirculo perfeta. Tal ta es la sol de mediadia en Fortaleza. Inclina la paper, o, plu fasil, inclina la lampa de pox, e la sirculo sur la paper deveni elise e min briliante — la mesma cuantia de lus lumina aora un area plu grande. Tal ta es a mediadia en London o Adelaide. E sempre do vos ta sta, sempre la sol ta leva a la ora ses de la matina e ta adormi a la ora ses de la sera. Cada dia e cada note ta conteni esata des-du oras, e saisones no ta aveni, simple.

Ma lo es un fato ce nosa ase es vera inclinada, e a un angulo fisada. Donce la tera no fa sempre ce la ecuator fasa la sol, ma, tra la anio, partes variosa de la mundo fasa lo.

Ta ce nos imajina denova acel table elise, e nos dise aora ce oservores sta sirca lo per regarda la moves de la tera. (La oservores es stelas, posible an stelas de filmas!)

SieloEsBlu02

Ta ce nos nomi un de los "Seniora Norde", car la parte norde de la ase de la tera es inclinada en sua dirije. Esta es un constante: cuando la tera viaja sirca la table e la sol, sua inclina es sempre dirijeda a Seniora Norde, ci regarda sempre la emisfera norde. Cuando la tera veni a sua lado de la table, la seniora vide la sol pos la tera, e donce la sol lumina bela la emisfera sude, cual el no pote vide bon. Cuando la tera ariva a la otra lado de la table, la seniora regarda ancora la emisfera norde, e la sol lumina ance xef esta emisfera. A esta fenomeno nos dona la nom "saisones".

A media de junio la lus de sol de mediadia colpa vertical locas a 23 grados a norde de la ecuator. Esta zona es nomida la "Tropico de la Crabe". Pos ses menses, a media de desembre, la "Tropico de la Capra", a 23 grados a sude, vide la sol direta supra se a mediadia. Locas no entre la du tropicos, per esemplo Europa, reseta nunca la lus vertical, ma cuando la data prosimi plu a mediaestate, alora la lus ariva a un angulo plu presipe, donce min elise, donce plu briliante e caldinte.

A veses, me trova ce lo es plu fasil si on refusa la table imajinal e regarda la cosa en esta modo: ta ce nosa ase es vertical e nosa ecuator es orizonal, e nosa viaja anial es inclinada a 23 grados de esta orizonal.

SieloEsBlu03

Alora on pote dise ce estates norde aveni cuando la tera es como a "sude" de la sol, e invernos norde aveni cuando lo es como a "norde" de lo. Cuando la tera es sufisinte a "sude" de la sol, la sol an no reposa se en alga locas multe norde. An tal, esta no es la presenta usual: per esemplo, globos — la mapas turnable en forma de sferas cual on vide en scolas, museos e locas simil — ave cuasi sempre ases inclinada.

Caos de calendario Edit

On ave asi un otra cosa interesante sur la relata entre la du moves de la tera. Un turna de la tera dura no per 24 oras, ma per 23 oras e 56 minutos. An tal, nosa calendario opera plen bon e bela con dias construida de esata 24 oras. Donce cual aveni?

Alga persones opina ce lo es denova un caso de la saisones e de la oras de la leva de sol, como si la sol ta leva con cuasi 4 plu minutos de temprania en cada dia de la calendario. Ma esta es asurda: si lo ta es tal, a veses la sol ta leva a la ora des-un de la sera o la ora cuatro de la posmedia.

La solve depende de nosa viaja anial sirca la sol.

La mediadia en cualce loca es, a la min per astronomistes, la momento cuando la posa de la sol es la plu alta en la sielo. Entre du mediadias, on ta suposa natural ce la tera ta turna a esata un ves. Ma, an cuando lo turna, lo fa ance un parte pico de sua viaja anial e vade plu sirca la sol, tal cambiante sua situa en relata a lo. Donce un turna no reveni plen la sol a sua punto la plu alta, e nos nesesa ajunta cuatro plu minutos a nosa dia calendarial afin lo no cade en caos e asurdia.

On ave ance un move tre cual la tera fa. Lo no es multe importante, ma lo es multe interesante. Lo es nomida la "presede" e lo es causada par la luna. Cuando la tera turna a cada dia, lo senti la pesa de la luna prosima. E esta pesa tira la tera en un modo cual institui un bambola multe peti de nosa ase. La ase comensa move de asi a ala en un sirculo, simil a un jireta jirada par un enfante juosa. La move, la bambola, es estrema lenta: un sirculo completa dura per no min ca 26 milenios, ma, par causa de lo, la polos de sielo cambia pico pos pico.

SieloEsBlu04

La polos de sielo es la du puntos en la sielo direta supra la polos norde e sude de la tera, donce do la ase de nosa planeta ta colpa la sielo si nos ta pote estende lo de la tera mesma. En la emisfera norde nos es aora multe fortunosa, car nosa polo de sielo es multe prosima a un stela fasil trovable, e en fato nos nomi esta la Stela Polal. Esta ia aida multe la navigores ante la inventa de la busola. Ma pos du mil plu anios, la polo va move a via de la Stela Polal, e no stela briliante va indica lo, esata como la caso presente en la emisfera sude. An tal, pos 12 milenios, nos va reseta la stela multe briliante Vega como indicador de la polo… donce no regrete tro multe la perde!

Me ia refere ja a la idea ce invernos norde ta es plu calda ca invernos sude, car la tera es la plu prosima a la sol en invernos norde. Ma pos 13 milenios, donce pos un dui de la sirculo de presede, la move asal va causa ce la tera es la plu prosima a la sol en estates norde. Estates norde va es alora plu calda ca aora, e invernos norde va es plu jelada; saisones sude va es jeneral plu jentil. On teori an ce esata esta spesie de cambia en la pasada ia crea alga de nosa desertos famosa, per esemplo la Sahara.

Fas de la luna Edit

Car me ia comensa parla de la luna, cisa me ta clari aora la aspeta de nosa acompanior. E lo es vera un acompanior. Esata como la tera viaja sirca la sol, la luna viaja tal sirca la tera. Se viaja dura tra poca plu ca 27 dias, un periodo de prosima un mense; e en fato la parola "mense" veni de la mesma radis antica como la nom engles de la luna ("moon") e la verbo "mesura" (car on ia usa la luna per mesura la menses).

La luna turna ance sirca sua ase propre, ma lo mostra sempre la mesma fas a nos, car per lo un turna dura tra esata la mesma tempo como un viaja: en otra parolas, sur la luna, la dia e la anio ave la mesma longia!

Tota de nos sabe ce la luna es a veses sirculo, a veses cresente. Sua formas diversa es nomida "fases" (de "fase", no "fas"!), e los aveni en un sicle cual repete se pos pico plu ca 29 dias. A veses on oia la idea ce la fases aveni cuando la luna pasa tra la ombra de la tera, ma esta es completa erante. Serta, la tera lansa un ombra en la universo, en un dirije a via de la sol. E de tempo a tempo la luna entra bon a esta ombra. Alora nos vide un eclis de luna, no tan dramosa como un eclis de sol, ma serta meritante un regarda. La luno eclisida aspeta min briliante, e a veses lo prende la color brun roja de cupre. Ma esta es un fenomeno rara, con no relata a la fases. E si vos ia vide la luna cresente e la sol en la sielo a la mesma tempo, vos comprende ce la cresente no es causada par la ombra de la tera.

En loca, lo es un caso de la parte ombrosa de la luna mesma. Lo es un fato ce esata un dui de la luna es sempre luminada par la sol, ma nos no pote vide sempre tota de esta dui. Cuando la luna viaja sirca nos, nos vide a veses plu, a veses min. A la comensa de la sicle de fases, nos vide — o, en fato, no vide — un luna oscur, cuando la retro de la luna es luminada. Nos vide cuasi no cosa. Me dise "cuasi", car si on ta sta sur la luna oscur, on ta vide la tera plen luminada en la sielo, e la tera refleta alga acel lus a la luna. Donce a veses nos teranes pote videta la parte oscur de la luna par causa de nosa rebrilia propre.

SieloEsBlu05

Pos la luna oscur, un parte cresente de la dui luminada comensa apare. En la emisfera norde, esta es un cresente destra; en la sude, la arco apare sinistra. On pote alora vide ancora la parte oscur par causa de lus refletada de la tera, e on refere a esta fenomeno par la nom bela "la luna vea en la brasos de la nova". Nos espeta tra un semana, e la luna viaja a un loca cual permete ce nos vide un dui de sua dui luminada (donce un cuatri de la completa). Pos du semanas, nos vide la luna plen, o plu esata sua dui plen luminada. Alora la luna comensa diminui asta la cresente oposada, e lo desapare final e renovi se.

Si vos atende bon, cisa vos ia nota un cosa strana. Me ia dise ce la fases depende de la viaja de la luna sirca nos, ce esta viaja dura tra 27 dias, ma ce la sicle de fases dura per prosima 29. E si vos atende vera bon, an tal, vos conose ja la solve. Lo es denova un caso de la viaja anial de la tera. La fases depende de la posa de la truple sol, tera e luna, e esta cambia tra la anio. Si la tera no ta viaja sirca la sol, la fases ta recomensa pos esata un sirculi de la luna, ma en realia acel du dias ajuntada es nesesada afin la truple reariva a la posa cual presenta un luna oscur a nos.

Bon: complicada, no? Me no vole ce vos serebros creve, donce me va parla aora de un cosa min sirculinte, ma ancora lunal.

Un misterio jigante Edit

Sin duta, de tempo a tempo, vos ia vide la luna cuando lo senta sur la orizon. E probable vos ia nota alora ce lo aspeta plu grande ca usual, cisa duple o truple plu grande. Evidente, la luna no veni subita truple plu prosima cuando lo senta sur la orizon de algun; esta ta es demente, car cada loca ave se propre orizon e diferente.

SieloEsBlu06

Ironial, cuando la luna mostra se sur la orizon, lo ave 6000 plu cilometres de distantia, la raio de la tera; par contrasta, cuando lo es direta supra nosa testas, la raio es su nos pedes e no es incluida en la distantia. La luna sur la orizon debe aspeta pico plu peti! Donce como nos esplica ce lo aspeta plu grande?

Multe culpa la aira. A la vide prima, esta pare es un idea alga bon. Si on inclina sua testa a retro e regarda la parte de la sielo direta a supra, e on vide ala un stela, per esemplo, alora on vide lo tra alga aira, alga atmosfera. Ma si on reveni sua testa a un angulo plu comfortosa e vide un stela asta la orizon, on vide lo tra multe plu aira — no sola tra la aira prosima a asi, ma ance tra la aira de tota otra locas entre asi e la orizon. E la aira cambia serta la aspeta de cosas. Lo es un caso de refrata.

Pone un culier en un vitro de acua, e lo aspeta rompeda. Esta es natural un ilude. Pasante de la acua a la aira con un densia diferente, la lus, par cual nos vide la culier, refrata — lo devia. La aveni es la mesma cuando, en un clima multe calda, la surfas de un via pare ondeta e dansa: la aira asta la via es plu calda e donce min densa ca la aira supra se, e esta refrata la lus.

Ave asi un otra esemplo. Cisa vos ia regarda la sol reposante e nota ce, cuando lo ariva a la orizon, sua parte basa aspeta multe compresada, e en no modo como la semisirculo espetada. Esta aveni car on vide la parte basa tra an plu aira ca la parte alta; donce la lus basa devia a supra e curvi la forma parente de acel parte. La sol reposante o levante es tal compresada sola en modo vertical; sua lados reteni la mesma forma, la un como la otra, car nos vide ambos lados tra la mesma cuantia de atmosfera.

La aira cambia ance la aspeta de la stelas. La stelas es tan estrema distante de nos ce los pare como puntos de lus simple. (La situa es completa diferente con la planetas, Venus, Marte, etc, cual es cuasi nos visinas, e donce mostra se como discos vera tra un telescopio an peti.) La stratos alta de nos atmosfera move constante, nondependente de la clima asta nos. Areas de aira densa e rara intercambia se sin fini, e esta devia cualce lus. Car nos vide la stelas como puntos minima pico, an un refrata la plu sutil cambia se posa e envia los en un dansa encantante de movetas. E cuando nos vide esta, nos dise ce la stelas "sintili".

La atmosfera refrata ance la lus de la planetas, ma lo es multe rara ce nos vide los sintili, car los mostra se como discos peti con multe puntos de lus. Si un de la puntos move, esta no cambia multe la aspeta de la completa. Ma, si on oserva un planeta con un telescopio e atenta regarda un loca spesifada sur sua surfas, per esemplo un crater o simil, esta pote serta aspeta nonclar par causa de la devia de sua lus.

Lo pare ce me ia devia alga de me intende, cual ia es esplica la aspeta jigante de la luna sur la orizon. An tal, lo es interesante ce la luna es alora vertical compresada, esata como la sol reposante. Donce lo debe aspeta alga min grande ca usual.

Multe persones crede ce la luna es plu grande ca lo es en realia. Posible vos va es surprendeda par la informa ce entre la orizones este e ueste, on pote pone en filo 360 copias de la luna. Si on estende plen sua braso e leva sua dito indicante, on trova ce lo aspeta sufisinte larga per covre la luna a du veses, a la min. E si on fa esta cuando la luna senta jigante sur la orizon, on trova ce, an con sua aspeta, lo ave ancora esata acel mesma grandia. Donce la cosa intera es un fantasma de la mente! La ilude an rompe direta si on regarda la luna cuando on sta sur sua testa — ma me duta ce multe persones ia esperia esta… a la min en publica.

On pote imajina ce nos mente engana nos car nos compara suconsensa la luna a otra ojetos sur la orizon, per esemplo casas e arbores. Ma la vide de la luna jigante es posible an sur un barcon a media de la mar, o tra la fenetra de un avion, donce esta no pote es la causa. E en fato, nun sabe vera la causa. Lo es un fenomeno alga misteriosa de la vide umana. An tal, teorias esiste, e me va presenta a vos esta cual pare a me la plu credable.

SieloEsBlu07

Si on desinia du linias orizonal de longia egal entre du linias cual es prosima vertical ma converjente, la orizonal plu alta aspeta direta plu longa. Simple, nosa oios refusa persepi ce la du orizonales es egal longa. Esta es un truco alga bon conoseda, e lo aveni car nosa serebros ia evolui en la mundo real, sin desinias jeometrial artifisial. Si nos vide linias tal converjente en la mundo real, es vera un caso de linias paralel cual distanti de nos. Bon: cuando nos vide du ojetos con la mesma grandia parente, ma nos crede ce un de la ojetos es min prosima, nosa serebros judi ce esta es plu grande. Si lo no ta fa esta, nos ta malcomprende completa la cosas ambiente, e nos ta pote apena opera.

Esta esplica la ilude jeometrial, ma no esta de la luna jigante. Ma me va mostra ce lo formi ja un parte de la esplica. On ave asi la otra parte.

Si vos demanda ce algun estende sua braso per indica un punto a media entre la orizon e la punto la plu alta, lo es multe probable ce la person va regarda vos como persones strana. Esta no aida. Ma si vos susede final convinse, es cuasi serta ce la braso de la person no crea un angulo de la 45 grados desirada. Cuasi cadun leva sua braso tra sola 30 grados, plu o min.

Nos persepi de la sielo es culpable. Nos vide lo como un emisfera, ma platida a supra, simil a un plato de sopa inversada. Donce la punto la plu alta, la zenite, pare plu prosima a nos ca la orizon. La situa es la mesma cuando nos regarda la tera: direta su nos lo es la plu prosima, e lo distanti par grados cuando nos leva nosa testas. Probable nos ia evolui un manera analoja de persepi la sielo.

Donce final nos ia trova tota cordas nesesada per lia la luna jigante e baldoni lo. La luna ave la mesma grandia, egal cuando lo senta alta o basa en la sielo. Ma si lo senta plu basa, alora nos judi ce lo es plu distante. E, esata car se grandia no cambia, nosa serebros persepi paradoxal lo como un ojeto plu grande. Consernante la luna, no fida an vos oios propre!

Mareas e cades Edit

Me vole parla sur un otra fenomeno interesante cual relata a la luna e, conveninte en Felixstowe, a la costa: la mareas. Cadun sabe ce la mares leva e cade periodal, o, en termas tecnical, enflue e esflue, e multes sabe ce esta es causada en alga modo par la luna. Ma vera poca persones comprende esata como esta aveni. An la claris de esta en libros es frecuente sola partal coreta, o no refere a alga partes de la cosa. E esta es strana, car on pote esplica sufisinte fasil la mareas, si on resta estra la calculas matematical.

On dise ce la luna orbita la tera, ma on ta dise plu coreta ce ambos orbita un sentro comun. La tera ave un masa otodesuple plu grande ca esta de la luna. La resulta es ce, si on ta comensa vade de la sentro de la tera sur un via direta a la sentro de la luna, on ta ariva ja a acel sentro comun — la sentro de la du masas — pos sola un otodesi de sua viaja. Donce la sentro de masa comun es situada en la tera, en fato a sola 1600 cilometres su nos pedes, ma no a la sentro de la tera mesma. La sentro de la tera e la sentro de la luna orbita comun la sentro de masa; simple, la tera fa esta par un sirculo vera multe min grande.

Bon: un orbita es un forma de cade. Nos cade cuando la fortia de gravita tira nos, e la situa es la mesma si nos orbita — ma simple, nos no senti alora la tira. Me ta clari.

Cuando spasiores flota completa lejera en orbita, esta es car la tera tira constante los a se par se gravita, e los cade en dirije a lo; ma la tera cade ance a via de los car lo es ronda, e los susede constante no colpa la tera. Donce un ojeto cadente o orbitante esperia la fortia de gravita — esta causa bon la cade — ma no senti lo, e ta mesura lo como asente. Per esta razona nos dise ce la spasiores es sin pesa.

Nos ta reveni tal a la tera, e a la demanda de la mareas. Lo es un leje fisical ce la tira de gravita entre du ojetos depende de la distantia entre los; si los es plu prosima, los es atraeda plu forte la un a la otra. Donce nos pote dise ce la parte de la mundo la plu prosima a la luna a un momento definida es la plu forte tirada a la luna, e ce la parte la plu distante, a la otra lado de la tera, es la plu debil tirada.

SieloEsBlu08

Ma recorda ce, en fato, la sentro de la tera orbita — cade, si vos prefere — sirca la sentro de masa comun de la tera e la luna. Si vos ta sta a la sentro de la tera, alora vos ta senti a no modo la tira gravital de la luna. (An tal, vos ta senti bon otra fortias de presa, cual ta destrui direta vos. Lo es felis ce vos sta ala sola en imajina.) Si on calcula la atrae de la luna en modo relativa a esta punto sentral de zero, on trova un atrae positiva per la parte de la mundo la plu prosima a la luna, e un atrae negativa — min ca la zero a la sentro — per la parte la plu distante. E on ave asi la causa de la mareas.

A un ves en cada dia, la turna de la tera porta cada parte de la mundo tra un punto do lo senti masima la atrae positiva de la luna; e pos un dui de un dia, esta mesma parte de la mundo pasa tra un punto de atrae masima negativa. A esta du puntos, la atrae infla la plu multe la acua, e un marea alta aveni en acel punto de la mundo; e a media entre la puntos masima es la du puntos de atrae minima, cuando la mareas basa aveni.

Lo no es jeneral conoseda ce la sol contribui ance a nosa mareas, con prosima un dui de la fortia de luna. La sol es serta multe plu grande e masosa ca la luna, ma nos senti min forte se atrae, simple car lo es min prosima.

La fases de la luna pertine ance asi. Cuando la luna es oscur o plen, la sol e la luna tira en la mesma dirije, e nosa mareas es alora la plu alta e la plu basa; on dise ce esta mareas es "sizijial". A otra veses, cuando nos vide la luna como sola un semisirculo, nosa mareas es la plu blanda, e an prende la nom "mor". En ajunta, nos viaja sur un via elise sirca la sol, e la luna viaja sirca nos, donce la distantias sesa nunca cambia, e esta influe ance la mareas.

Interesante, la parte de acua la plu inflada es constante portada a ante par la turna rapida de la tera, donce la infla es sempre alga ante la loca do on espeta trova lo. Bon: esta acua inflada ave un masa, e donce lo atrae ance alga la luna. E car lo es sempre portada a ante, lo tira la luna a ante — no multe, ma on pote mesura la efeto. En responde, esta puia la luna a un orbita plu alta; en otra parolas, esta puia lo pico a via de nos. La distantia entre nos e la luna grandi con cuatro sentimetres a cada anio. A esta momento, par un coaveni gustable, la luna ave esata la mesma grandia como la sol en nosa sielo; donce un eclis solal perfeta aveni cuando la luna pasa direta ante la sol. Ma pos alga sentenios, la luna va aspeta min grande: lo va pote eclisi sola un parte de la sol, e la eclises solal la plu bela va es alora anelin.

En reversa, cuando la acua inflada par la marea tira la luna a ante, la luna tira la infla alga a retro. Si vos core, ma alga fortia atenta retira vos, alora vos lenti, evidente. Lo es la mesma con nosa planeta. La luna retira la acua inflada, e la tera intera turna pico min rapida. Vera, siensistes ia mesura ce cada de nosa dias es, donce, plu longa ca la presedente. Esta no es sola un pare!

La mesma aveni a la luna, o plu esata, lo ia aveni ja. Nos ia retira la luna (ma con un fortia otodesuple plu grande ca sua retira de nos), e nos ia lenti lo, asta cuando lo ia sesa completa turna relativa a nos. E, en fato, lo es per esta razona ce nos vide en lo sempre la mesma fas.

A alga tempo en la futur estrema distante, la luna va susede para nosa turna, e la locas de cada en la sielo de la otra va es fisada per sempre. La dia — e la mense — va dura alora tra prosima 40 de nos dias presente.

Turna de la acua de banio Edit

Me crede ce esta es plu ca sufisinte sur la luna. Ma ante trata la demanda final cual me ia pone como la titulo de esta presenta, me va parla alga sur un cosa conoseda como "la efeto de Coriolis". Tra un tempo longa on ia reconose ja la esiste de esta efeto en situas militar. De alga loca, oteni un canon e xuta un bal de lo, en un dirije esata norde: la bal va colpa sempre la tera a este de la ojeto. La esplica de esta ia es donada par la matematiciste franses Gustave Gaspard Coriolis en 1835. Lo es un caso de la turna de la tera, cual porta constante nos a la este. Si vos ia congresa en Fortaleza, prosima a la ecuator, vos ia viaja a este a cada dia en un sirculo de 40 000 cilometres, an si vos ia resta en leto per la tempo intera. Vos ia viaja a plu ca 1600 cilometres per ora, e vos no ia senti an vertigosa.

SieloEsBlu09

A la otra lado, si vos ta partisipa en un congresa universal jelada a la polo norde, vos no ta viaja an poca a este; vos ta sta sur la punto polal, sur la ase de la tera mesma, e ta turna simple ala como un disco de fonograf. Vosa rapidia, cual es tan grande en Fortaleza, diminui plu cuando vos es plu norde, asta cuando lo deveni zero a la polo.

Donce cual aveni a acel bal? A la momento cuando nos xuta lo de la canon, lo es ja viajante a la este tan rapida como la tera ala. Ma cuando lo vola en la dirije norde, la tera su lo viaja sempre min rapida a la este, e donce, cuando la bal reveni a la tera, la punto direta a norde de la canon no ia ariva ancora. Lo es como xuta a un ojeto cual move, ma un ojeto cual move min rapida ca la xutor! La canonores en edas presedente ia aprende punta pico a la ueste cuando los ia xuta en la dirije norde.

La efeto de Coriolis reversa se si on xuta en la dirije sude. La bal devia a la ueste car la punto direta a sude viaja plu rapida a la este. E en la emisfera sude, la cosa es intera inversada. Ala, un bal xutada en la dirije norde surprende par atera tro ueste (e si en la dirije sude, donce tro este), ma par la mesma causas.

Coriolis es ance la causa de siclones en la clima. Un area de la atmosfera con presa basa opera como un sucapolvo, e tira a se la aira ambiente. La aira tirada de la norde move min rapida ca la aira ja en la area, e donce curvi en la dirije ueste; la aira tirada de la sude viaja plu rapida ca la area e vade en la dirije este. (En pasa, me suposa ce nos es en la emisfera norde.) La resulta es ce la area intera comensa turna contra la orolojo, e on nomi esta "un siclon".

SieloEsBlu10

On encontra a veses la idea ce on pote vide la efeto de Coriolis cuando on esflue acua de un bol. Ma boles es peti, e lo es un fato ce, a tal distantias peti, la efeto de Coriolis es apena persepable. Cuasi serta, moves acaso esiste ja en la acua ante cuando el esflue, e esta moves asconde completa cualce devia pico par Coriolis.

En la desenio de 1950, siensistes en la SUA ia construi un silindre jigante, e ia pleni lo con acua. Los ia espeta tra tre dias, afin la moves de la acua desapare, e los ia abri alora un buco pico en la sentro de la fondo. La acua ia comensa turna — esata como un siclon e como espetada: la parte de la acua a sude de la buco ia move plu rapida ca la parte norde, donce Coriolis ia fa sua efeto e ia turna la acua contra la orolojo. Ma per pote oserva esta en un bol de grandia comun, on nesesa lasa la acua sin turba per un mense intera, e alora esflue lo sola en gotas.

A la ecuator mesma, persones esiste ci mostra la efeto de Coriolis a turistes. Los teni alga acua en un bol, sta norde de la ecuator, e lasa lo esflue. Alora los pasea a sude de la linia de ecuator, repete la ata, e la oservores vide ce la acua turna en la otra dirije. Esta es un engana. Lo es multe fasil ce on causa ce la acua turna en cualce dirije, simple par moves conveninte de la corpo. Per esemplo, pos traversa la linia de ecuator, la enganor pote turna alga subita se a la oservores, e turna la acua a la mesma tempo.

Perce la sielo es negra? Edit

Vide: nos ia ariva cuasi a la fini — sola la demanda en la titulo resta, sur la color de la sielo.

Astronomistes informa nos ce la universo conteni un cuantia nonimajinable grande de galasias, e ce cada galasia conteni miliones de stelas. La galasias es situada sirca nos en asoluta cada dirije. Donce, cuando nos regarda la sielo de note, nos debe vide un monton de stelas en cada dirije. La sielo de note debe es plen de lus! Ma evidente, en realia, lo es cuasi tota sin lus, con sola un pico de puntos de stelas vidable.

La solve relata a la crese de la universo. Si vos permete ce me simpli alga, la otra galasias vade a via de nos, e la un de la otras, donce la universo deveni sempre plu grande. La galasias la plu distante vade plu rapida ca la plu prosimas. Bon: un cosa interesante aveni a la lus de un ojeto cual fuji de nos. Lo deveni plu roja.

Per comprende perce, imajina vos en un auto cual move rapida sur un via, e imajina un otra auto cual prosimi de la otra dirije. La sona de esta otra auto varia: lo es la plu alta en la momento cuando la auto pasa vos, lo deveni plu alta cuando lo prosimi, e denova plu basa cuando lo parti. Sin duta, vos ia oia esta sona tipal curva cuando vos ia viaja sur la autovias xef. On nomi lo "la efeto de Doppler", pos un fisiciste austrian de la sentenio des-nove. Vos oia la sona de la auto, como cada otra sona, cuando vibras ondin en la aira encontra vosa oreas. Cuando plu vibras encontra vos en un tempo definida, vos oia la sona como plu alta.

SieloEsBlu11

Lo es como si la auto lansa "bales de sona" a vos, un bal a cada secondo. Si la distantia entre vos e la auto no cambia, vos reseta un bal a cada secondo. Si la distantia diminui, car la auto prosimi a vos (o vos a lo, o ambos), vos reseta plu ca un bal a cada secondo, car la bales traversa sempre min spasio e donce ariva plu frecuente. Cuando la distantia entre vos e la auto grandi, lo es inversada: la bales traversa sempre plu spasio e donce ariva min frecuente. Vos oia esta como un cambia de la altia de la sona.

La lus opera simil. Do la sona alti, la lus azuli; do la sona basi, la lus roji. Esta aveni car nos persepi la color de la lus par se frecuentia, e la lus roja ave un frecuentia min alta ca la azul. Si un ojeto distanti sufisinte rapida, sua lus pasa a infraroja e an plu, e alora nosa oios no pote vide lo. Donce la paradox de la sielo negra de note ave un solve multe simple: la plu multe ojetos luminada en la universo fuji tan rapida ce sua lus no es plu vidable per nos.

Ma perce la sielo es azul en un dia sin nubes? La lus emeteda par la sol es vera un misca de tota colores, e nos persepi usual esta como blanca. Per esemplo, la nubes aspeta blanca car los refleta simple la lus de la sol. Si gotas de pluve trova se en la atmosfera, a veses los pote opera como prismas e desmisca la lus, e donce nos vide un arco de sielo bela de tota colores de la spetro.

Ma la aira es composada de moleculas de nitrojen e osijen, e la lus colpa estas a veses. Imajina ce, en loca de la lus, lo ta es un caso de folias e nozas. La nozas es plu pesosa, donce si los colpa la aira, esta no cambia multe sua dirije; ma la folias es multe lejera e, pos un colpa, los salta a via en un dirije acaso. La nozas cade cuasi direta a la tera, ma la folias es sperdeda.

SieloEsBlu12

Bon: la lus roja de frecuentia basa condui como la nozas pesosa, e devia apena. Ma la lus azul de frecuentia plu alta es distribuida en multe dirijes como la folias cuando lo desende a nos. E cada raio de lus pare veni de la loca de sua colpa la plu resente, cual (per la raios azul) pote es a cualce loca en la sielo. Donce, per promedia, la sielo aspeta azul.

An la lus roja salta a veses. Me ia nota ja ce, cuando la sol reposa o leva, nos vide lo tra multe plu aira. La lus esperia tan multe colpas en acel aira densa ce an sua parte roja devia, e la sielo prende un aspeta roja asta la orizon.

Pensa sur la ordina de la colores en la arco de sielo. La estrema nonroja es violeta. La lus violeta ave un frecuentia an plu alta ca la azul, donce on pote demanda perce la sielo no aspeta violeta. Bon: prima, la oio umana vide min bon la violeta ca la azul; e du, on ave simple min lus violeta ca azul en la misca cual la sol emete. Interesante, la sol emete la lus verde plu ca cualce otra color. Donce en alga sensa la sol es un stela verde. Regretable, lo no ave sinco puntos!

Ad blocker interference detected!


Wikia is a free-to-use site that makes money from advertising. We have a modified experience for viewers using ad blockers

Wikia is not accessible if you’ve made further modifications. Remove the custom ad blocker rule(s) and the page will load as expected.